កីឡា

សោកស្ដាយ ឆង ថងសិទ្ធ និង ជូន ចាន់ចាវ របួសកជើងធ្ងន់ធ្ងរដូចគ្នា

បានផុស

៣ years មុន

នៅ

ថ្ងៃចន្ទ ២៥ ធ្នូ ២០២៣

ដោយ

សប្ដាហ៍ទី៣ ខែធ្នូ ចុងឆ្នាំ២០២៣ រឿងដែលមិននឹកស្មានដល់បានកើតឡើងទាំងក្នុងវិស័យគុនខ្មែរនិងបាល់ទាត់ក្នុងសប្ដាហ៍តែមួយ ដោយកីឡាករប្រដាល់ ឆង ថងសិទ្ធ និងខ្សែការពារភ្នំពេញក្រោន ជួន ចាន់ចាវ បានរបួសកជើងធ្ងន់ធ្ងរ ត្រូវវះកាត់ និងត្រូវប្រើពេលយូរក្នុងការសម្រាកព្យាបាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងការប្រកួតកាលយប់ថ្ងៃសៅរ៍ ទី២៣ ខែធ្នូ ឆ្នាំ២០២៣ នៅទឹកដីខេត្តព្រះវិហារ កីឡាករប្រដាល់ ឆង ថងសិទ្ធ បានរងរបួសកជើងឆ្វេងក្នុងកាប្រកួតទឹកទី២ជាមួយកីឡាករ ជ័យ គីមហុង។ កីឡាករត្រូវធ្វើដំណើរទៅខេត្តបាត់ដំបង ដើម្បីព្យាបាលរបួសនៅទឹកដីកំណើតតាមបែបវិជ្ជសាស្រ្ត។ នេះបើតាមការបញ្ជាក់របស់ពីស្ថានីយ៍ទូរទស្សន៏ជាតិកម្ពុជា។ ស្ថានភាពរបួសរបស់គេត្រូវការពេលយូរដើម្បីព្យាបាល។ ក្រោយពេលស្ថានភាពរបួសជាសះស្បើយក៏មិនអាចកំណត់ថាអាចនឹងវិលចូលសង្វៀនវិញបានឬយ៉ាងណានោះទេ។

រូបគេធ្លាប់ប្រកួត៥៦លើកគឺឈ្នះ៣៦ ចាញ់១៦ ស្មើ២ ហ្វឹកហាត់នៅក្លិបព្រះខែសែនជ័យខេត្តបាត់ដំបង បង្វឹកដោយលោកគ្រូ ស៊ន សារៀប។

ការប្រកួតពានរង្វាន់ខេមបូឌានព្រីមៀរលីគក្នុងជំនួបក្រុម ISI ដង្កោសែនជ័យ ជាមួយក្រុមភ្នំពេញក្រោន កាលពីយប់ថ្ងៃអាទិត្យ ទី២៤ ខែធ្នូ ឆ្នាំ២០២៣ ក៏មានរឿងគួរឲ្យសោកស្ដាយកើតឡើង។ ដើមវគ្គទី២ នាទី៤៧ ខ្សែការពារ ជួន ចាន់ចាវ បានរងរបួសជើងខាងស្តាំយ៉ាងធ្ងន់ធ្ងរ ក្រោយការព្យាយាមទប់ស្កាត់បាល់ពីការវាយបករបស់ក្រុមដង្កោសែនជ័យ។

ចំពោះស្ថានភាពរបស់កីឡាករ ជួន ចាន់ចាវ មានភាពល្អប្រសើរច្រើន ក្រោយទទួលបានជោគជ័យក្នុងការវះកាត់។ ខ្សែការពាររបស់ភ្នំពេញក្រោនរូបនេះនឹងអវត្តមាន ក្នុងការប្រកួតឲ្យក្រុមជម្រើសជាតិកម្ពុជាជាមួយក្រុមជម្រើសជាតិកាតារនៅចុងខែនេះ។ រូបគេក៏នឹងត្រូវអវត្តមានក្នុងពាន AFC Cup វគ្គពាក់កណ្តាលផ្តាច់ព្រ័ត្រប្រចាំតំបន់អាស៊ាននៅពេលភ្នំពេញក្រោនត្រូវប៉ះក្រុមខ្លាំងអូស្ត្រាលី Central Coast Mariners នៅដើមខែកុម្ភៈ។

រូបគេអាចនឹងអវត្តមានពីការប្រកួតលីគកំពូលកម្ពុជា២០២៣-២៤ រហូតដល់រដូវកាលថែមទៀត ប្រសិនបើក្នុងរយៈពេល៦ខែដំបូងនៃឆ្នាំ២០២៤មិនអាចជាសះស្បើយ១០០%៕

អត្ថបទ៖ ផា រតនា