កីឡា

មុនចូលក្លិបកម្ពុជា Dio ធ្លាប់ឈ្នះជើងឯកលីគបាល់ទះឥណ្ឌូណេស៊ី៣ដង មេដាយមាសស៊ីហ្គេម៣ដង

បានផុស

២ years មុន

នៅ

ថ្ងៃព្រហស្បតិ៍ ១១ មករា ២០២៤

ដោយ

ក្លិបបាល់ទះបញ្ជាការដ្ឋានអង្គរក្សទើបតែនាំចូលកីឡាករបរទេស៣រូបជាសញ្ជាតិឥណ្ឌូណេស៊ីដើម្បីត្រៀមប្រកួតលីគបាល់ទះកំពូលកម្ពុជារដូវកាលដំបូងនៅថ្ងៃទី១២ ខែមករា ឆ្នាំ២០២៤ នៅពហុកីឡដ្ឋានជាតិអូឡាំពិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងចំណោមកីឡាករឥណ្ឌូណេស៊ីទាំង៣នាក់ មានម្នាក់ឈ្មោះ Dio Zulfikri ជាកីឡាករដែលមានបទពិសោធច្រើននៅលីគបាល់ទះកំពូលឥណ្ឌូណេស៊ី Indonesia Proliga និងជាសមាជិកក្រុមបាល់ទះជម្រើសជាតិឥណ្ឌូណេស៊ី។

កីឡាករ Dio Zulfikri កើតនៅថ្ងៃទី១៥ ខែធ្នូ ឆ្នាំ១៩៩៦ នៅតំបន់ Padang ខេត្ត West Sumatra ប្រទេសឥណ្ឌូណេស៊ី ដែលកាន់សាសនាឥស្លាម។ រូបគេបានចាប់ផ្តើមលេងបាល់ទះអាជីពក្នុងលីគកំពូលឥណ្ឌូណេស៊ីនៅឆ្នាំ២០១៤។

នៅលីគឥណ្ឌូណេស៊ីដំបូងនោះ រូបគេបានចូលរួមជាមួយក្លិប Jakarta BNI ប៉ុន្តែនៅឆ្នាំ២០១៥បានចូលរួមជាមួយ Jakarta Pertamina Pertamax។ រដូវកាល២០១៦ Dio បានផ្លាស់ទៅចូលរួមក្រុម Palembang, Bank Sumsel Babel ប៉ុន្តែមិនទាន់ទទួលបានលទ្ធផលល្អប្រសើរទេ។

មួយឆ្នាំក្រោយមកពោលគឺឆ្នាំ២០១៧ រូបគេបានចូលរួមជាមួយក្រុម Jakarta Pertamina Pertamax ម្តងទៀត។ នៅរដូវកាលនេះហើយដែលរូបគេបានឈ្នះជើងឯកលីគបាល់ទះឥណ្ឌូណេស៊ីជាលើកដំបូង ហើយរូបគេបានឈ្នះពានឯកត្តជនជាអ្នកប៉ះសេ (Setter) ឆ្នើមប្រចាំរដូវកាល។ រូបគេបាននៅជាមួយក្លិបរហូតដល់ឆ្នាំ២០១៨។

ចូលរដូវកាល២០១៩ Dio Zulfikri បានផ្លាស់ទៅចូលរួមជាមួយក្លិប Jakarta BNI ដែលត្រូវបានគ្រូបង្វឹកផ្តល់ទំនុកចិត្តជាប្រធានក្រុម។ ឆ្នាំ២០២២ រូបគេបានជួយក្រុមឲ្យឈ្នះជើងឯកលីគកំពូលឥណ្ឌូណេស៊ី ដែលជាការឈ្នះជើងឯកលីគលើកទី២របស់ក្លិប និងជាការឈ្នះជើងឯកលីគលើកទី២របស់ខ្លួន។ រដូវកាល២០២៣ រូបគេបានជួយក្លិបឲ្យឈ្នះជើងឯកលីគកំពូលឥណ្ឌូណេស៊ីជាលើកទី៣ ហើយរូបគេបានឈ្នះពានឯកត្តជន អ្នកប៉ះសេ ជាលើកទី២។

និយាយពីក្រុមបាល់ទះជម្រើសជាតិឥណ្ឌូណេស៊ីវិញ Dio Zulfikri បានជួយឲ្យឈ្នះមេដាយមាសស៊ីហ្គេម៣លើកជាប់គ្នាគឺស៊ីហ្គេម លើកទី៣០ ឆ្នាំ២០១៩ នៅប្រទេសហ្វីលីពីន, ស៊ីហ្គេម លើកទី៣១ ឆ្នាំ២០២១ នៅប្រទេសវៀតណាម និងស៊ីហ្គេម លើកទី៣២ ឆ្នាំ២០២៣ នៅប្រទេសកម្ពុជា។

នៅខែមករា ឆ្នាំ២០២៤ Dio Zulfikri បានចាកចេញពីក្លិប Jakarta BNI មកចូលរួមជាក្លិបបញ្ជាការដ្ឋានអង្គរក្សនៅដើមខែមករា ឆ្នាំ២០២៤ ដែលនឹងចូលរួមប្រកួតលីគបាល់ទះកំពូលកម្ពុជារដូវកាលដំបូងនៅថ្ងៃទី១២ ខែមករា៕

ប្រវត្តិសង្ខេប