កីឡា

កីឡាករខ្មែរ-អាមេរិក សំ សុវណ្ណកេសា នឹងប្រកួតគុនចម្រុះជើងឯកអាស៊ី

បានផុស

២ ខែ មុន

នៅ

ថ្ងៃសុក្រ ២៦ មេសា ២០២៤

ដោយ

កីឡាករប្រដាល់ខ្មែរ-អាមេរិក សំ សុវណ្ណកេសា នឹងចូលរួមប្រកួតក្នុងព្រឹត្តិការណ៍គុនចម្រុះជើងឯកអាស៊ី លើកទី២ ឆ្នាំ២០២៤ ដែលប្រទេសកម្ពុជាទទួលធ្វើជាម្ចាស់ផ្ទះលើកដំបូង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សំ សុវណ្ណកេសា ដែលមានកំណើនៅរដ្ឋកាលីហ្វញ៉ា សហរដ្ឋអាមេរិក បានសាងភាពល្បីល្បាញនៅក្រៅប្រទេសទាំងការប្រកួតគុនខ្មែរ និងគុនចម្រុះ ប៉ុន្តែរូបគេមិនធ្លាប់បានប្រកួតតំណាងឲ្យកម្ពុជាទេ។ តាមរយៈការចេញប្រកួតទាំងគុនចម្រុះ គុនខ្មែរ និងឃីកបុកស៊ីង អ្នកគាំទ្រកម្ពុជាពិតជាចង់ឃើញរូបគេទទួលបានឱកាសក្នុងការប្រកួតតំណាងឲ្យជម្រើសជាតិកម្ពុជា។

ស្របពេលសហព័ន្ធកីឡាគុនចម្រុះកម្ពុជាបានទទួលរៀបចំការប្រកួតគុនចម្រុះជើងឯកអាស៊ី នៅវិមានពហុកីឡដ្ឋានជាតិអូឡាំពិក និងកំពុងត្រូវការកីឡាករគុនចម្រុះដែលមានសមត្ថភាពផងនោះ សហព័ន្ធសម្រេចជ្រើសរើសយក សំ សុវណ្ណកេសា ដែលមានបទពិសោធគុនចម្រុះចូលរួមប្រកួតតំណាងជាតិកម្ពុជា។

ក្នុងនាមជាម្ចាស់ផ្ទះ កម្ពុជាបានត្រៀមកីឡាករ កីឡាការិនីចំនួន២០រូបដើម្បីប្រកួតគុនចម្រុះ ជ្រើសរើសជើងឯកអាស៊ី លើកទី២ ចាប់ពីថ្ងៃទី១១-១៣ ខែកក្កដា ឆ្នាំ២០២៤។ អត្តពលិកគុនចម្រុះដែលលេចធ្លោ និងមានឈ្មោះនៅពេលនេះ មានដូចជាកីឡាករគុនខ្មែរ ឈឿង ល្វៃ, ម៉ឺន មេឃា, មាស ម៉ើ, ចាន់ រតនា, ធាន អាត (ចាន់ សំអាត), កីឡាការិនី នៅ ស្រីពៅ, កីឡាការិនី អ៊ុំ ថារ័ត្ន, កីឡាករ ឡុង ឡា និង សំ សុវណ្ណកេសា។

សំ សុវណ្ណកេសា ដែលមានខ្សែក្រវាត់២ខ្សែបានប្រកួតដណ្តើមខ្សែក្រវាត់អាមេរិក (USA Championship) កាលពីខែធ្នូ ឆ្នាំ២០២៣។ រូបគេធ្លាប់បានប្រកួតនៅសង្វៀនធំលំដាប់ពិភពលោក Glory ពីរដង។

តាមការឲ្យដឹងពីគណៈកម្មាធិការជាតិអូឡាំពិកកាលពីថ្ងៃទី២៣ ខែមេសា លោក TANG GORDON អនុប្រធានក្រុមប្រឹក្សាអូឡាំពិកអាស៊ី(OCA) និងជាប្រធានសមាគមកីឡាគុនចម្រុះអាស៊ីបានចុះត្រួតពិនិត្យផ្ទាល់នៅវិមានពហុកីឡដ្ឋានជាតិអូឡាំពិកជាកន្លែងរៀបចំការប្រកួត។

ការប្រកួតគុនចម្រុះជើងឯកអាស៊ី លើកទី១ ឆ្នាំ២០២៣ បានធ្វើនៅទីក្រុងបាងកក ប្រទេសថៃ ដែលមានប្រទេសចំនួន១៩ចូលរួមប្រកួត។ ក្នុងនោះកម្ពុជាក៏បានបញ្ជូនកីឡាករទៅចូលរួមប្រកួតដែរដោយទទួលបានមេដាយសំរិទ្ធ២គ្រឿងគឺកីឡាករ ធាន អាត បានឈ្នះ១គ្រឿងក្នុងទម្ងន់៦០គីឡូក្រាម និង មាស ម៉ើ ឈ្នះ១គ្រឿងក្នុងទម្ងន់៧៧គីឡូក្រាម។ សម្រាប់ព្រឹត្តិការណ៍លើកទី២នៅទឹកដីកម្ពុជានឹងមានប្រទេសកាន់តែច្រើនថែមទៀត៕