គួរឲ្យស្តាយ ព្រៃវែងបាន​រំសាយក្លិបជាផ្លូវការ

រយៈពេលប៉ុន្មានឆ្នាំចុងក្រោយ ស្ថានភាពរបស់ក្លិបបាល់ទាត់អាជីពនៅកម្ពុជាកំពុងជួបបញ្ហាប្រឈមជាច្រើន ដែលជាហេតុធ្វើឲ្យក្លិបអាជីពមួយចំនួនប្រកាសរំសាយក្លិប។

ក្រោយការប្រកួតពានរង្វាន់លីគកំពូលបានបញ្ចប់ ក្លិបបាល់ទាត់ព្រៃវែង បានប្រកាសជាផ្លូវការក្នុងការរំសាយក្លិបក្រោយបង្កើតឡើងកាលពីឆ្នាំ២០២០ ដោយសារជួបបញ្ហាវិបត្តិហិរញ្ញវត្ថុ។ ក្លិបបាល់ទាត់ព្រៃវែងជាក្លិបអាជីពទី៨ នៅក្នុងប្រទេសកម្ពុជាដែលបានប្រកាសរំសាយ បន្ទាប់​ពី​ក្រុមអាស៊ីអឺរ៉ុប យូណាយធីត ក្រុមបន្ទាយមានជ័យ ក្រុមអគ្គិសនីកម្ពុជា ក្រុមកោះកុង ក្រុមត្បូងឃ្មុំ ក្រុមសូលទីឡូអង្គរ និង ក្រុមអង្គរស៊ីធី។

ទោះបីក្លិបមួយនេះទើបតែបង្កើតឡើងមែន ប៉ុន្តែពួកគេមានការអភិវឌ្ឍយ៉ាងល្អប្រសើរ។ ជាពិសេសនៅរដូវកាលឆ្នាំ២០២០ ក្លិបព្រៃវែង ទទួលបានជោគជ័យខ្លាំង ដោយបានរងជើងឯកលីគ២ ហើយឆ្នាំនោះដដែល​ទទួលបានចំណាត់ថ្នាក់លេខ៣នៅពានសម្តេចតេជោ ហ៊ុន សែន។

ក្រោយឡើងមកលីគកំពូលកម្ពុជាក្នុងរដូវកាលនេះ ក្លិបព្រៃវែងបន្ដធ្វើបានល្អ ក្រោយឈរនៅលេខ៨ ក្នុងតារាងពិន្ទុបន្ទាប់ពីប្រកួត២៧លើក ឈ្នះ៦ ស្មើ៥ ចាញ់១៦ មាន២៣ពិន្ទុ៕

អត្ថបទ៖ ផា រតនា