កីឡា

ចូលប្រកួតកីឡាជាតិ ពេជ្រ សម្បត្តិ ប៉ះ គង់ ហូវ ម៉ោង១ថ្ងៃនេះ

បានផុស

១ year មុន

នៅ

ថ្ងៃចន្ទ ៤ វិច្ឆិកា ២០២៤

ដោយ

ដំណើរស្វែងរកមេដាយថ្នាក់ជាតិរបស់ ក្របីព្រៃ ពេជ្រ សម្បត្តិ ចាប់ផ្តើមនៅវេលាម៉ោង១រសៀល ថ្ងៃទី៤ ខែវិច្ឆិកា ឆ្នាំ២០២៤ នៅស្តាតចាស់ ក្នុងព្រឹត្តិការណ៍កីឡាជាតិ លើកទី៤ និងកីឡាជាតិជនពិការលើកទី២។

ពេជ្រ សម្បត្តិ ជាអ្នកប្រដាល់មានកេរ្តិ៍ឈ្មោះល្បីរន្ទឺខ្លាំង និងបានសាងសមិទ្ធផលជាច្រើនក្នុងការប្រកួតកម្មវិធីឯកជន ប៉ុន្តែរូបគេមិនធ្លាប់បានចូលរួមប្រកួតក្នុងព្រឹត្តិការណ៍កីឡាជាតិឡើយ។ នេះជាលើកដំបូងហើយដែលរូបគេចូលរួមប្រកួតក្នុងព្រឹត្តិការណ៍កីឡាជាតិ លើកទី៤។

វេលាម៉ោង១រសៀល ថ្ងៃចន្ទ ទី៤ ខែវិច្ឆិកានេះ ពេជ្រ សម្បត្តិ ត្រូវប្រកួតជាមួយកីឡាករ គង់ ហូវ ក្នុងការប្រកួតគុនខ្មែរ ទម្ងន់៦០គីឡូក្រាម វគ្គពាក់កណ្តាលផ្តាច់ព្រ័ត្រ។ ប្រសិនបើទទួលបានជ័យជម្នះ រូបគេនឹងឡើងទៅវគ្គផ្តាច់ព្រ័ត្រដណ្តើមមេដាយមាស។

នៅថ្ងៃជាមួយគ្នានេះមានកីឡាករល្អៗជាច្រើនដែលត្រូវប្រកួតគុនខ្មែរមានដូច ជា ព្រុំ សំណាង, លន បញ្ញា និង កាន់ ម៉េងហុង ជាដើម។ នៅថ្ងៃជាមួយគ្នានេះ ការប្រកួតឃីកបុកស៊ីងក៏មានកីឡាករល្បីៗជាច្រើនក្នុងវគ្គសំខាន់ៗដែរ។

កន្លងមក ម្ចាស់មេដាយមាសកីឡាជាតិ ត្រូវបានជាប់ជម្រើសជាតិ ដើម្បីត្រៀមខ្លួនប្រកួតលើឆាកអន្តរជាតិដូចជាកីឡាស៊ីហ្គេមជាដើម។ ដូច្នេះហើយបានជាកីឡាករល្បីៗមួយចំនួនមិនមានឈ្មោះជាប់ជម្រើសជាតិ ដោយសារពួកគេមិនបានចូលរួមប្រកួតកីឡាជាតិ ដូចជា ធឿន ធារ៉ា ជាដើម៕