កីឡា

កាន់ ម៉ូ ប្រាប់ថា មិនចង់ចប់ត្រឹមនេះ ខណៈខ្លួនដាក់គោលដៅធំក្នុងពាន AFF Cup

បានផុស

១ year មុន

នៅ

ថ្ងៃចន្ទ ១៦ ធ្នូ ២០២៤

ដោយ

ខ្សែការពារជាប្រធានក្រុមបាល់ទាត់ជម្រើសជាតិកម្ពុជា កាន់ ម៉ូ បានទម្លាយឲ្យដឹងពីគោលដៅធំរបស់ខ្លួនក្នុងការប្រកួតពានរង្វាន់ AFF Championship បន្ទាប់ពីរូបគេបានរបួសពេលប្រកួតជាមួយសិង្ហបុរីកាលពីថ្ងៃទី១១ ខែធ្នូ ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងព្រឹត្តិការណ៍ ASEAN Championship កាន់ ម៉ូ ត្រូវបានលោកគ្រូបង្គោលផ្តល់ទំនុកចិត្តឲ្យក្លាយជាប្រធានក្រុម។ រូបគេបានដើរតួនាទីយ៉ាងសំខាន់ក្នុងការប្រកួតលើកស្មើជាមួយ ម៉ាឡេស៊ី ដោយលទ្ធផល ២-២ កាលពីថ្ងៃទី៨ ខែធ្នូ និង ចាញ់ សិង្ហបុរី ១-២។ សម្រាប់ការប្រកួតជាមួយ សិង្ហបុរី រូបគេបានខំប្រឹងយ៉ាងខ្លាំង និងប្តូរគ្រប់យ៉ាងរហូតត្រូវប៉ះទង្គិចក្បាលរបួស ត្រូវបានបញ្ជូនទៅសង្គ្រោះនៅមន្ទីរពេទ្យក្នុងប្រទេសសិង្ហបុរី។

តាមការឲ្យដឹងពីសហព័ន្ធកីឡាបាល់ទាត់កម្ពុជាថា កាន់ ម៉ូ មិនអាចលេងបានទេនៅពេលកម្ពុជាទទួលទីម័រខាងកើត ថ្ងៃទី១៧ ខែធ្នូ ឆ្នាំ២០២៤ នៅពហុកីឡដ្ឋានជាតិអូឡាំពិក។ រូបគេត្រូវបន្តតាមដានស្ថានភាពរបួសនៅប្រទេសសិង្ហបុរី។

នៅព្រឹកថ្ងៃទី១៦ ខែធ្នូឆ្នាំ២០២៤ កាន់ ម៉ូ បានបង្ហាញអារម្មណ៍ថា ៖«ខ្ញុំមិនចង់បញ្ចប់ការប្រកួតព្រឹត្តិការណ៍នេះត្រឹមពេលនេះទេ។ ខ្ញុំសង្ឃឹមយ៉ាងខ្លាំង និងដាក់គោលដៅធំក្នុងការតំណាងឲ្យជម្រើសជាតិកម្ពុជាក្នុងព្រឹត្តិការណ៍នេះ»។

កីឡាករបន្តថា ៖«ប៉ុន្តែជឿជាក់ថា ព្រះជាម្ចាស់មានគោលបំណងសម្រាប់គ្រប់យ៉ាងចំពោះអ្វីដែលព្រះអង្គប្រទាន និងអ្វីដែលព្រះអង្គទទួលយក។ សូមអរគុណសម្រាប់អាជីព និងឱកាសដែលផ្តល់ឲ្យខ្ញុំបានតំណាងឲ្យជមម្រើសជាតិកម្ពុជា។ សូមសំណាងល្អ និងជូនពរឲ្យកម្ពុជាទទួលបានជោគជ័យ»។

ការប្រកួតវគ្គសន្សំពិន្ទុក្នុងពូលចុងក្រោយជាមួយថៃ នៅថ្ងៃទី២០ ខែធ្នូ ក៏មិនទាន់ច្បាស់ថាតើ កាន់ ម៉ូ អាចជួយជម្រើសជាតិកម្ពុជាបានឬយ៉ាងណាទេ។ ប្រសិនបើកម្ពុជាធ្លាក់ត្រឹមវគ្គសន្សំពិន្ទុក្នុងពូល ហើយរូបគេមិនអាចលេងពេលប៉ះថៃគឺមានន័យថា ចប់ត្រឹមនេះ ប៉ុន្តែប្រសិនបើកម្ពុជាអាចឡើងវគ្គបន្ត ដូច្នេះរូបគេប្រហែលជាអាចមានឱកាសទៀត៕