យុវជនស្រឡាញ់កីឡាមួយក្រុម រួមគ្នារៃអង្គាសថវិកា​ ទិញសម្ភារសិក្សាជូនសាលាបឋមសិក្សាអូរក្បុល

នៅថ្ងៃស្អែកទី១១ ខែមករា ឆ្នាំ២០២៥នេះ យុវជនស្រឡាញ់កីឡាមួយក្រុម គឺក្រុមបាល់ទាត់ដំរីព្រៃ ដែលដឹកនាំក្រុមដោយ លោក នីសំអាន មុនីឧត្ដម និងតារាចម្រៀង លោក ថុល សុភិទិ បានរួមគ្នារៃអង្គាសថវិកាក្នុងក្រុមដើម្បីទិញសម្ភារសិក្សា និងសម្ភារកីឡា ក្នុងនោះមមានដូចជា៖ កាតាប ប៊ិក សៀវភៅ ខ្មៅដៃ ជ័រលុប ដបទឹក បាល់ទាត់ និងថវិកាមួយចំនួនទៀត ដើម្បីចែកជូនដល់លោកគ្រូ/អ្នកគ្រូ និងសិស្សានុសិស្ស នៅសាលារៀនបឋមសិក្សាអូរក្បុល ស្ថិតក្នុងស្រុកសំបូរ ខេត្តក្រចេះ។ 

លោក នីសំអាន មុនីឧត្តម ប្រធានក្រុមបាល់ទាត់ដំរីព្រៃ បានឱ្យដឹងថា បន្ទាប់ពីកិច្ចការមនុស្សធម៌ជាមួយសាលាបឋមសិក្សាអូរក្បុលរួច កម្មវិធីនឹងចាប់ផ្ដើមនៅម៉ោង៣រសៀល ដោយក៏នឹងមានការប្រកួតបាល់ទាត់មិត្ត រវាងក្រុមបាល់ទាត់ដំរីព្រៃ និងក្រុមបាល់ទាត់យុវជនសម្ភុបុរៈ ដឹកនាំដោយ លោក គង់ មេត្តា អភិបាលនៃគណៈអភិបាលស្រុកសំបូរផ្ទាល់ ក្រោមមូលបទ៖ «កីឡា-ទេសចរណ៍-ចែករំលែក ស្ថិតនៅក្នុងវិទ្យាល័យហ៊ុន សែនសម្ភុបុរ:» នៅថ្ងៃស្អែកនេះតែម្ដង។

លោក នីសំអាន មុនីឧត្តម បានបង្ហើបឱ្យដឹងទៀតដែរថា គោលបំណងនៃការបង្កើតកម្មវិធីប្រកួតបាល់ទាត់សប្បុរសធម៌នេះឡើងមក គឺមានបុព្វហេតុចម្បងចំនួន៣ ក្នុងនោះរួមមាន៖

 ទី១. មនុស្សធម៌ (ធ្វើសប្បុរសធម៌ និងកិច្ចការសង្គម) ទី២.ទេសចរណ៍ (ធ្វើដំណើរកម្សាន្ត ផ្សព្វផ្សាយតំបន់ទេសចរណ៍ក្នុងស្រុក) និងទី៣. កីឡា (រាល់សកម្មភាពកិច្ចការមនុស្សធម៌ និងទេសចរណ៍កម្សាន្ត គឺស្ដែងឡើងតាមរយ:សកម្មភាពកីឡា ដើម្បីបណ្ដុះស្មារតី ជម្រុញឱ្យសិស្សានុសិស្សទាំងអស់ ពិសេសយុវជនចូលរួមលេងកីឡា ជៀសឆ្ងាយពីគ្រឿងញៀន និងអបាយមុខផ្សេងៗទៀត)។

គួរជម្រាបថា ក្រុមបាល់ទាត់ដំរីព្រៃ បានបង្កើតឡើងគិតមកទល់ពេលនេះមានរយៈពេល២ឆ្នាំមកហើយ ក្រៅពីសកម្មភាពកីឡា ក្រុមបាល់ទាត់ដំរីព្រៃ ក៏គោលបំណងជាច្រើនដែលទាក់ទងនឹងកម្មវិធីសប្បុរសធម៌ ពិសេសការជួយដល់សិស្សានុសិស្សដែលរស់នៅតំបន់ដាច់ស្រយោល ដែលកំពុងខ្វះខាតសម្ភារសិក្សា ក្នុងដំណើរការសិក្សារៀនសូត្រ ផងដែរ៕