មូលនិធិកសាងហេដ្ឋារចនាសម្ព័ន្ធតាមព្រំដែន ទទួលការគាំទ្រយ៉ាងផុសផុលពីពលរដ្ឋ

មូលនិធិកសាងហេដ្ឋារចនាសម្ព័ន្ធតាមព្រំដែន ផ្តួចផ្តើមដោយសម្តេចមហាបវរធិបតី ហ៊ុន ម៉ាណែត ត្រូវបានបង្កើតឡើង ដែលជាការផ្តល់ឱកាសដល់ប្រជាពលរដ្ឋគ្រប់មជ្ឈដ្ឋាន ចូលរួមជាកម្លាំងមហាសាមគ្គីជាតិខ្មែរ មានការទទួលគាំទ្រយ៉ាងផុសផុលពីពលរដ្ឋគ្រប់មជ្ឈដ្ឋាន នៅក្នុងប្រទេស ដើម្បីអភិវឌ្ឍតំបន់ព្រំដែន ដែលក្នុងនោះក្រៅពីធ្វើផ្លូវ ហេដ្ឋារចនាសម្ព័ន្ធ ក៏មានការកសាងសាលារៀននៅតាមតំបន់ព្រំដែនផងដែរ។

ប្រជាពលរដ្ឋបង្ហាញការសាទរ និងពេញចិត្តបំផុតចំពោះរាជរដ្ឋាភិបាល ដែលបានបង្កើតប្រព័ន្ធទំនាក់ទំនងមួយ អាចឱ្យប្រជាពលរដ្ឋទូទៅនៅគ្រប់មជ្ឈដ្ឋានអាចមានឱកាសចូលរួមចំណែក ក្នុងដឹងឮពីព័ត៌មានអភិវឌ្ឍន៍នៅតំបន់ព្រំដែន។ ជាពិសេសគ្រុបតាមប្រព័ន្ធតេឡេក្រាម ក៏ជាផ្នែកមួយអាចឱ្យពលរដ្ឋលើកជាមតិយោបល់សួរនាំ និងទទួលបានព័ត៌មានទៅវិញទៅមកបានដោយសេរី លើចម្ងល់ទាំងឡាយណាដែលពលរដ្ឋងឿងឆ្ងល់ ឬយល់មិនច្បាស់ពីការអភិវឌ្ឍន៍ហេដ្ឋារចនាសម្ព័ន្ធនៅតំបន់ព្រំដែន។

តាមរយៈការប្រមូលនិធិនេះ សម្តេចតេជោ ហ៊ុន សែន ប្រធានព្រឹទ្ធសភា បានសរសេរនៅហ្វេសប៊ុកផេកផ្ទាល់ខ្លួនរបស់សម្តេចមានខ្លឹមសារថា មូលនិធិកសាងហេដ្ឋារចនាសម្ព័ន្ធតាមព្រំដែនដែលនាយករដ្ឋមន្ត្រីហ៊ុន ម៉ាណែតបានផ្តួចផ្តើមបង្កើតឡើងតាមសំណូមពរប្រជាជនបានចេញជារូបរាង និងមានការចូលរួមយ៉ាងផុលផុស។ តាមរយៈមូលនិធិនេះយើងនឹងឃើញនូវស្មារតីសាមគ្គីការពារជាតិពិតប្រាកដពីសំណាក់គ្រប់មជ្ឈដ្ឋាននៃប្រជាជាតិយើង ពិសេសយើងនឹងអាចដឹងបានថា អ្នកចោទប្រកាន់ថាយើងកាត់៤ខេត្តឬច្រើនជាងនេះទៅឲ្យវៀតណាមតើពួកគេចូលលុយឬទេ? ប្រសិនបើពួកគេខ្លាចបាត់ដីមែនវាជាពេលវេលាល្អសម្រាប់ការចូលរួមរបស់ពួកគេដើម្បីកសាងផ្លូវថ្នល់ ការកសាងសាលារៀនមន្ទីរពេទ្យ អណ្តូងទឹក។ល។ នៅតាមភូមិថ្មីៗដែលរាជរដ្ឋាភិបាលនឹងចែកដីជូនប្រជាជនដែលគ្មានដីទៅរស់នៅនិងតាំងទីលំនៅទីនោះ។

សម្ដេតេជោបន្ថែមថា ការរំពឹងទុកប្រជាជនដែលគ្មានដី នឹងទទួលបានដីសម្រាប់បង្កបង្កើនផលដែលមានហេដ្ឋារចនាសម្ព័ន្ធទ្រទ្រង់ជាផ្លូវ ទឹកភ្លើង សាលារៀន មន្ទីរពេទ្យ។ល។ ជាងនេះទៅទៀតខឿនការពារជាតិរបស់ប្រជាជនត្រូវបានពង្រឹងតាមរយៈប្រជាជនដែលនៅតាមព្រំដែនដែលរឹងមាំជាងរបងបេតុង ឬដែកច្រើនជាន់ និងល្អជាងការពង្រាយកងទ័ពនិងអាវុធដើម្បីការពារទៅទៀត។

ជាមួយគ្នានេះ សម្ដេចក៏អំពាវនាវឲ្យជនរួមជាតិចូលរួមទោះតិចក្តីច្រើនក្តី និងជួយពិនិត្យមើលតើអ្នកចោទប្រកាន់បានចូលរួមឬទេ? នេះមិនមែនជាការដេញទាន់ជាន់កែងទេតែចង់ឲ្យជាតិខ្មែរសាមគ្គីគ្នាការពារទឹកដីប្រសិនយើងខ្លាចបាត់បង់ទឹកដី៕

អត្ថបទ៖ សុភា