កីឡា

ការប្រកួតជឺជីតស៊ូជើងឯកជាតិឆ្នាំនេះ មានកម្រិតខ្ពស់ជាងឆ្នាំមុនៗ

បានផុស

១ year មុន

នៅ

ថ្ងៃពុធ ២៦ កុម្ភៈ ២០២៥

ដោយ

សហព័ន្ធកីឡាជឺជីតស៊ូកម្ពុជាបានរៀបចំការប្រកួតកីឡាជឺជីតស៊ូ ជ្រើសរើសជើងឯកថ្នាក់ជាតិ លើកទី៣ ប្រចាំឆ្នាំ២០២៤ ដែលបានបញ្ចប់ទៅកាលពីថ្ងៃអាទិត្យ ទី២៣ ខែកុម្ភៈ ឆ្នាំ២០២៥ នៅសាលដំបូកទូក នៃសាកលវិទ្យាល័យភូមិន្ទភ្នំពេញក្រោមអធិបតីភាពលោកទេសរដ្ឋមន្ត្រី ថោង ខុន ប្រធានគណៈកម្មាធិការជាតិអូឡាំពិកកម្ពុជា។

លោក Jasper Paas អនុប្រធានសហព័ន្ធជឺជីតស៊ូកម្ពុជាបានលើកឡើងក្នុងបទសម្ភាសជាមួយ«កម្ពុជាថ្មី»ថា ការប្រកួតជើងឯកថ្នាក់ជាតិឆ្នាំនេះមានម្រិតគុណភាពប្រកួតប្រជែងខ្ពស់ជាងឆ្នាំមុនៗ។ ជាពិសេសឆ្នាំនេះត្រូវបានដាក់បញ្ចូលប្រព័ន្ធប្រកួតថ្មីគឺ Fighting System ដែលជាលើកដំបូងនៅកម្ពុជា និងទទួលបានការគាំទ្រពីសហព័ន្ធកីឡាជឺជីតស៊ូពិភពលោក។ នេះជាជំហានថ្មីមួយដ៏សំខាន់ក្នុងការអភិវឌ្ឍកីឡាជឺជីតស៊ូនៅកម្ពុជាឲ្យរីកចម្រើន។

លោកប្រាប់ថា ៖«បើក្រឡេកមើលការប្រកួត និងលទ្ធផលពិតជាគួរឲ្យរីករាយ។ ការប្រកួតប្រជែងមានកម្រិតខ្ពស់ ចូលរួមច្រើនពីកីឡាករ កីឡាការិនី ទាំងកម្រិតយុវជន និងកម្រិតខ្ពស់។ ទាំងនេះជាផ្នែកដ៏សំខាន់សម្រាប់យើងក្នុងការត្រៀមខ្លួនសម្រាប់ការប្រកួតព្រឹត្តិការណ៍អន្តរជាតិជាច្រើនទាំងឆ្នាំនេះ»។

លោកបានបញ្ជាក់ថា គោលបំណងនៃការប្រកួតជើងឯកថ្នាក់ជាតិនេះគឺដើម្បីសម្រិតសម្រាំងស្វែងរកអត្តពលិកត្រៀមទៅប្រកួតព្រឹត្តិការណ៍អន្តរជាតិ៥ផ្សេងគ្នាគឺ ការប្រកួតកីឡាជឺជីតស៊ូជើងឯកអាស៊ី នៅប្រទេសហ្សក់ដានី ខែឧសភា, ការប្រកួតកីឡាជឺជីតស៊ូ Thai Grand Prix Open នៅប្រទេសថៃ ខែមិថុនា, ការប្រកួតកីឡាជឺជីតស៊ូជើងឯកអាស៊ាន នៅប្រទេសហ្វីលីពីន ខែកក្កដា, ការប្រកួតកីឡាជឺជីតស៊ូជើងឯកពិភពលោក នៅប្រទេសថៃ ខែវិច្ឆិកា និងកីឡាស៊ីហ្គេម នៅប្រទេសថៃខែធ្នូ។

តាមរបាយការណ៍ ការប្រកួតជឺជីតស៊ូ ជើងឯកថ្នាក់ជាតិ លើកទី៣ ពីថ្ងៃទី២២ ដល់ទី២៣ ខែកុម្ភៈ ឆ្នាំ២០២៥មានកីឡាករ កីឡាការិនីចុះឈ្មោះចូលរួមប្រកួតចំនួន១៦០នាក់ ដែលច្រើនជាងឆ្នាំមុនៗ។ ក្នុងពិធីបិទក្រោមវត្តមានលោកទេសរដ្ឋមន្ត្រី ថោង ខុន ប្រធានគណៈកម្មាធិការជាតិអូឡាំពិកកម្ពុជា៕