កីឡា

លន បញ្ញា ប្រមាណ១០ប្រកួតចុងក្រោយវាយកម្រចប់ទឹក ខណៈសប្ដាហ៍នេះត្រៀមខ្លួនប៉ះអ៊ុយក្រែននៅ BTV

បានផុស

១ year មុន

នៅ

ថ្ងៃសុក្រ ១៤ មីនា ២០២៥

ដោយ

អ្នកលេងគុនខ្មែរមកពីខេត្តព្រៃវែង លន បញ្ញា ល្អឡើងៗប្រមាណ ១០ប្រកួតចុងក្រោយនេះផ្ដួលដៃគូឲ្យសន្លប់បោះបង់ការប្រកួតមុនបញ្ចប់ទឹករហូត ស្របពេលនេះកំពុងហ្វឹកហាត់យ៉ាងសកម្មបន្តទៀតត្រៀមប៉ះជើងខ្លាំងមកពីប្រទេសអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រូបភាពហ្វេសបុក លន បញ្ញា

លន បញ្ញា បានឲ្យដឹងថា បើរាប់មកប្រហែល ១០ប្រកួតមកហើយដែលរូបគេបានផ្ដួលដៃគូឲ្យសន្លប់មុនបញ្ចប់ការប្រកួត។ មិនមានអ្វីពិសេស ឬអាថ៌កំបាំងនោះទេគឺបានមកពីការខំប្រឹងប្រែងហ្វឹកហាត់ទៀងទាត់ និងការព្យាយាមដោយមិនខ្ជិលច្រអូស។

ពាក់ព័ន្ធការប្រកួតនៅសប្ដាហ៍នេះកូនសិស្សលោក ធន់ សុភា រូបនេះថាកំពុងសម្រុកហ្វឹកហាត់ពិសេសផ្ដោតលើកម្លាំងស៊ុហ្វតែម្ដងដោយសារប៉ះកីឡាករស្បែកសរ ឬប៉ែកអ៊ឺរ៉ុបភាគច្រើនកម្លាំងខ្លាំង។ ចំពោះក្បាច់ស្នៀតវិញ លន បញ្ញា ថាមានគ្រប់គ្រាន់ហើយពង្រឹងតែស៊ុហ្វទៅអាចទប់ទល់ជាមួយដៃគូបានហើយ។

រូបភាពហ្វេសបុក លន បញ្ញា

បញ្ជាក់ដែរថា លន បញ្ញា បច្ចុប្បន្ននេះជាកីឡាករល្បីឈ្មោះជួរមុខនៅកម្ពុជា និងបានហ្វឹកហាត់ជាមួយលោក ធន់ សុភា ក្នុងសមាគមប្រដាល់កងយោធពលខេមរភូមិន្ទ។ ថ្ងៃទី១៦ ខែមីនា ឆ្នាំ២០២៥ ជើងខ្លាំងរបស់កម្ពុជារូបនេះនឹងត្រូវប្រកួតជាមួយកីឡាករអ៊ុយក្រែន Denis Dotsenko នៅស្រុកស្ទោង ខេត្តកំពង់ធំ ផ្សាយផ្ទាល់តាមទូរទស្សន៍ BTV៕