ស្ងាត់ៗ Chelsea ចុះកុងត្រាយកបានខ្សែប្រយុទ្ធ ព័រទុយហ្គាល់ ដែលជាគោលដៅ Man UTD បាត់

ក្លិបតោខៀវ Chelsea បានឈានដល់កិច្ចព្រមព្រៀងចុះកុងត្រាយកខ្សែប្រយុទ្ធស្លាបសញ្ជាតិ ព័រទុយហ្គាល់ Geovany Quenda របស់ក្រុម Sporting Lisbon។

យោងតាមការចុះផ្សាយដោយអ្នកកាសែត អ៉ីតាលី លោក Fabrizio Romano បានឱ្យដឹងថា Chelsea បានព្រមព្រៀងលើការចុះកុងត្រានេះរួចរាល់ ទាំងជាមួយក្លិប និងកីឡាករផ្ទាល់។ ចំណែកការពិនិត្យសុខភាពវិញក៏បានធ្វើរួចរាល់ផងដែរ ដែលធ្វើជាលក្ខណៈសម្ងាត់។

ប្រភពដដែលបានបន្ថែមថា កីឡាករ​ Quenda ដែលបច្ចុប្បន្នមានវ័យ ១៧ ឆ្នាំនឹងបន្តស្នាក់នៅជាមួយ Sporting មួយរដូវកាលទៀត ហើយរូបគេនឹងធ្វើដំណើរមកកាន់ទីក្រុង ឡុងស៍ ប្រទេស​អង់គ្លេស​ នៅខែ កក្កដា ឆ្នាំ ២០២៦។

យ៉ាងណាមិញ សម្រាប់ខ្សែប្រយុទ្ធស្លាបសញ្ជាតិ ព័រទុយហ្គាល់ រូបនេះ ក៏ធ្លាប់មានពាក្យចចាមអារ៉ាមកាលពីមួយរយៈមុន ថា លោក Ruben Amorim ដែលជាអតីតគ្រូបង្វឹក ចង់បានគេមកកាន់ទឹកដី Manchester United ផងដែរ ប៉ុន្តែ​ឥឡូវនេះ អ្វីៗបានបរាជ័យហើយ បន្ទាប់ពីរូបគេបានយល់ព្រមទៅលេងឱ្យ Chelsea៕

ប្រែសម្រួលអត្ថបទ៖ សេម កុសល
ប្រភព៖ Fabrizio Romano