ស៊ុតបាន២គ្រាប់ យ៉ុន យ៉ើន ក្លាយជាកីឡាការិនីល្អប្រចាំការប្រកួតម្សិលមិញ

កីឡាការិនីបាល់ទាត់ជម្រើសជាតិកម្ពុជា យ៉ុន យ៉ើន បានជួយក្រុមនារី Bangkork Women FC ទទួលបានជ័យជម្នះដោយលទ្ធផលយ៉ាងធំធេង ៧-១ លើក្រុមនារី Hinkhon United ក្នុងសប្តាហ៍ទី៦ នៃលីគបាល់ទាត់នារីថៃ កាលពីថ្ងៃអាទិត្យ ទី១៦ ខែមីនា ឆ្នាំ២០២៥។

ក្នុងចំណោមគ្រាប់បាល់ជ័យជម្នះទាំង៧គ្រាប់ កីឡាការិនីកម្ពុជា យ៉ុន យ៉ើន រកបាន២គ្រាប់ និងបានក្លាយជាកីឡាការិនីល្អប្រចាំការប្រកួតថែមទៀតផង។ ជាពិសេសសារព័ត៌មានបានសម្ភាសពីចំណាប់អារម្មណ៍ដោយបានសួរលើ៣ចំណុច។ ចម្លើយរបស់កីឡាការិនីកម្ពុជាគឺទី១ ការចូលរួមជាមួយក្រុម Bangkork Women FC ទាំងមិត្តរួមក្រុម និងថ្នាក់ដឹកនាំគ្រូបង្វឹកបានដាក់ គោលដៅយកអ្វីដែលក្រុមបានកំណត់ក្នុងរដូវកាលនេះ។

យ៉ុន យ៉ើន បានបន្តទៀតថា ទី២ ការទំនាក់ទំនងជាមួយមិត្តរួមក្រុម និងក្រុមការងារគ្រូបង្វឹក ពេលខ្លះប្រើប្រាស់ភាសាអង់គ្លេស ហើយពេលខ្លះក៏ប្រើប្រាស់ភាសាថៃផង និង​ទី៣ អ្នកគាំទ្រ ក្រុមគ្រួសារនៅប្រទេសកម្ពុជាតែងតែគាំទ្រ លើកទឹកចិត្តដល់នាងរហូតក្នុងការលេងបាល់ទាត់នៅប្រទេសថៃ។

កីឡាការិនី យ៉ុន ត្រូវបានគ្រូបង្វឹកដាក់ឲ្យលេងកាន់តែច្រើននាប៉ុន្មានប្រកួតចុងក្រោយ។ ជាពិសេសបានជាប់ជម្រើស១១នាក់ដំបូងក្នុងពីរប្រកួតចុងក្រោយ ហើយរកបាន៤គ្រាប់​ហើយ​ឲ្យក្រុមនារីថៃ Bangkork Women FC គិត​ត្រឹម​ថ្ងៃ​ទី​១៦ ខែ​មីនា ឆ្នាំ​២០២៥។

សូមបញ្ជាក់ថា កីឡាការិនី យ៉ុន យ៉ើន​ បានទៅដល់ទឹកដីថៃនៅសប្តាហ៍ទី២នៃលីគបាល់ទាត់នារីថៃចាប់ផ្តើម ដូច្នេះសម្រាប់ការប្រកួតសប្តាហ៍ទី១មិនបានបង្ហាញខ្លួនទេដោយស្ថិតនៅកម្ពុជានៅឡើយ។

ឆ្លងកាត់៦សប្តាហ៍កន្លងទៅ ក្រុម Bangkork Women FC ស្ថិតនៅចំណាត់ថ្នាក់លេខ៣នៃតារាងពិន្ទុក្នុងចំណោមក្រុមទាំងអស់ចំនួន៨ បន្ទាប់ពីឈ្នះ៣ ស្មើ១ និងចាញ់២ ដោយមាន១០ពិន្ទុ។

កីឡាការិនីកម្ពុជាម្នាក់ទៀតគឺ ហុក សៅឌី ក៏បានទៅចូលរួមក្លិប Bangkork Women FC ជាមួយ យ៉ុន យ៉ើន ដែរ ប៉ុន្តែហាក់មិនសូវបានបង្ហាញខ្លួននៅលើទីលានឡើយ៕

អត្ថបទ៖ វីរបុត្រ