Real Madrid ចង់បានខ្សែការពារឆ្នើមនៅ Premier League ម្នាក់ទៀត បន្ទាប់ពី Arnold

ក្លិបអធិរាជស Real Madrid កំពុងចាប់អារម្មណ៍លើកីឡាករ William Saliba របស់ Arsenal និងបានចាត់ទុកខ្សែការពារសញ្ជាតិ បារាំង រូបនេះជាគោលដៅផ្ទេរដ៏មានសក្តានុពលនៅទីផ្សារដោះដូរកីឡាកររដូវក្តៅខាងមុខ។

យោងតាមការចុះផ្សាយដោយសារព័ត៌មាន បារាំង L’Equipe បានឱ្យដឹងថា ក្លិបយក្ស អេស្ប៉ាញ បានទាក់ទងជាមួយ Saliba រួចរាល់ហើយអំពីការផ្ទេរនេះ ហើយជំហានបន្ទាប់ ពួកគេនឹងព្យាយាមចរចាជាមួយ Arsenal វិញម្តងនារយៈពេលប៉ុន្មានខែខាងមុខទៀត។

Saliba គឺនៅសល់កិច្ចសន្យារយៈពេល ២ ឆ្នាំទៀតជាមួយ Arsenal ដូច្នេះនេះគឺជាឱកាសចុងក្រោយ ដែលក្រុមកាំភ្លើងធំអាចលក់ខ្សែការពារវ័យ ២៤ ឆ្នាំរូបនេះបានក្នុងតម្លៃថ្លៃ។ យ៉ាងណា Arsenal កំពុងតែខិតខំមែនទែន ដើម្បីបញ្ចុះបញ្ចូលឱ្យ Saliba បន្តកិច្ចសន្យាថ្មី ប៉ុន្តែប្រភពពី L’Equipe ដដែលបានអះអាងថា Real Madrid គឺជាក្លិបមួយ ដែលអាចឆក់យកចិត្តខ្សែការពារសញ្ជាតិ បារាំង ឱ្យចាកចេញពីទឹកដី Emirates បាន។

មុនរដូវកាលថ្មីមកដល់ Real Madrid កំពុងគិតគូយ៉ាងហ្មត់ចត់អំពីការនាំចូលកីឡាករថ្មីមកពង្រឹងក្រុម ជាពិសេសនៅតំបន់ការពារ បន្ទាប់ពីឆ្លងកាត់រដូវកាលនេះ ពួកគេបានជួបការលំបាកជាច្រើន ដោយសារខ្សែការពារសំខាន់ៗមួយចំនួនបានរបួសជាបន្តបន្ទាប់ និងសុទ្ធតែសម្រាករយៈពេលវែងដូចជា Dani Carvajal, David Alaba និង Eder Militao ជាដើម។

ខណៈថ្មីៗនេះទើបមានដំណឹងថា ពួកគេកាន់តែកៀកនឹងចុះកិច្ចសន្យាយកបាន Trent Alexander Arnold ហើយឥឡូវនេះពួកគេបានដាក់ការចាប់អារម្មណ៍លើ Saliba ដែលជាខ្សែការពារឆ្នើមប្រចាំ Premier League និង Arsenal ម្នាក់ទៀត៕

ប្រែសម្រួល៖ សេម កុសល
ប្រភព៖ GOAL