ច្បាស់ហើយ! សួន ចាន់ណារ៉ូ បាន​បញ្ជាក់ពី​រឿង​វិល​ចូលជម្រើសជាតិ វិញ

អ្នកលើកបាល់ឆ្នើមសួន ចាន់ណារ៉ូ បានបញ្ជាក់ច្បាស់ៗអំពីពាក្យចចាមអារ៉ាម ដែលលេចឮគាត់នឹងត្រឡប់មកកាន់ក្រុមជម្រើសជាតិ កម្ពុជា វិញ។

នៅថ្ងៃ ចន្ទ ទី ១៩ ខែ ឧសភា ឆ្នាំ ២០២៥ នេះ អ្នកលើកបាល់វ័យ ៣០ ឆ្នាំ កម្ពស់ ១.៩០ ម៉ែត្របានបង្ហោះសារនៅលើបណ្តាញសង្គមមួយថា៖ «សង្ឃឹមថានឹងមានដំណឹងល្អជួបគ្នាឆាប់ៗពុកម៉ែបងប្អូន»។ តាមរយៈសារខ្លីនេះ បូករួមជាមួយវីដេអូការហ្វឹកហាត់មួយ ដែលគាត់បង្ហោះលើបណ្តាញសង្គម Tik Tok ផងនោះ បានធ្វើឱ្យអ្នកគាំទ្រសង្ស័យជាខ្លាំង ថាគាត់អាចនឹងត្រឡប់មកចូលរួមជាមួយជម្រើសជាតិ កម្ពុជា វិញ បន្ទាប់ពីប្រកាសចូលនិវត្តន៍កាលពីខែ តុលា ឆ្នាំ ២០២៤។

យ៉ាងណា បន្ទាប់ពីឆ្លើយឆ្លងតាមរយៈសារអេឡិចត្រូនិចជាមួយសារព័ត៌មាន «កម្ពុជាថ្មី» សួន ចាន់ណារ៉ូ បានបំភ្លឺថា «គាត់នឹងមិនត្រឡប់មកកាន់ក្រុមជម្រើសជាតិវិញទេ ហើយតាមរយៈការបង្ហោះសាររបស់គាត់ គឺក្នុងន័យផ្សេងប៉ុណ្ណោះ។ ចំណែកវីដេអូ នៅក្នុង Tik Tok គឺតាំងតែពីការប្រកួត SEA V League ឆ្នាំមុនមកម្ល៉េះ»។

គួរបញ្ជាក់ថា សួន ចាន់ណារ៉ូ គឺជាអ្នកលើកបាល់ដ៏ឆ្នើមបំផុតម្នាក់របស់ កម្ពុជា ក្នុងនោះរូបគេបានសាងស្នាដៃធំៗជាច្រើនជូនជម្រើសជាតិ កម្ពុជា ជាពិសេសគឺការឈ្នះមេដាយសំរិទ្ធ​កីឡា​ស៊ីហ្គេម​ ជា​លើក​ដំបូង​ ឆ្នាំ​២០២១ និង​ឈ្នះ​មេដាយ​ប្រាក់​កីឡា​ស៊ីហ្គេម ជា​លើក​ដំបូង​ ឆ្នាំ​២០២៣៕

អត្ថបទ៖ សេម កុសល