កីឡាករកម្ពុជាឆ្នើម ២ រូប នឹងចូលរួមជាមួយក្លិប​បាល់ទះ​វៀតណាម ឆាប់ៗនេះ

កីឡាករបាល់ទះជម្រើសជាតិ កម្ពុជា ២ រូបរួមមានស្មាត់ គួន ម៉ុម និងអ្នកលើកបាល់ សួន ចាន់ណារ៉ូ មានតម្រុយនឹងទៅចូលរួមជាមួយក្លិបក្នុង​ជើង​ឯក​​ជាតិ​វៀតណាម បន្ទាប់ពីបញ្ចប់ភារកិច្ចជាមួយក្រុមពួកគេរៀងៗខ្លួនក្នុងពាន​រង្វាន់​សម្តេចក្រឡាហោម ស ខេង លើក​ទី​៤។

យោងតាមសារព័ត៌មាន វៀតណាម Lao Dong បានឱ្យដឹង ថា កីឡាករ គួន ម៉ុម បានចុះកិច្ចសន្យារួចរាល់ ក្នុងការចូលរួមជាមួយក្លិបបាល់ទះ ហាណូយ (Ha Noi) ដើម្បីប្រកួតប្រជែងពានលីគបាល់ទះ វៀតណាម The Vietnam National Volleyball Championship សម្រាប់ការប្រកួតក្នុងជុំទី ១ នៅឆ្នាំ ២០២៦។

គួន ម៉ុម ធ្លាប់បានចូលរួមជាមួយក្រុម ហាណូយ នេះរួចម្តងហើយ កាលពី តុលា ឆ្នាំ ២០២៥។ ពេលនោះស្មាត់ កម្ពុជា វ័យ ២៧ ឆ្នាំ កម្ពស់ ១.៩៨ ម៉ែត្ររូបនេះ បានបង្ហាញសមត្ថភាពល្អគួរឱ្យកត់សម្គាល់ រហូតជួយស្រោចស្រង់ក្រុម ហាណូយ ឱ្យឡើងពីចំណាត់ថ្នាក់លេខ ៨ បាតតារាង មកកាន់ចំណាត់ថ្នាក់លេខ ៥ ដើម្បីបន្តលេងក្នុងលីគទី ១ វៀតណាម នៅឆ្នាំ ២០២៦ នេះ។

ងាកមកកាន់កីឡាករតួនាទីអ្នកលើកបាល់ សួន ចាន់ណារ៉ូ វិញ ក៏មានតម្រុយចូលរួមជាមួយក្លិបបាល់ទះក្នុងប្រទេស វៀតណាមដែរ។ នេះបើតាមអ្វី ដែលកីឡាករធ្លាប់ប្រាប់សារព័ត៌មាន «កម្ពុជាថ្មី» និងកីឡាករបង្ហោះនៅលើទំព័រ Facebook។ ទោះបីជាយ៉ាងណា សួន ចាន់ណារ៉ូ មិនទាន់បានបង្ហើបនៅឡើយទេ ថា រូបគេនឹងទៅចូលរួមជាមួយក្លិបមួយណានៅទីនោះ។

គួរបញ្ជាក់ ថា ការប្រកួត​កីឡាបាល់ទះ​ជើង​ឯក​ជាតិ​​វៀតណាម បែងចែកជា ២ ដំណាក់កាល។ ដំណាក់កាលទី ១ នឹងចាប់ផ្តើមពីថ្ងៃទី ៦ ដល់ថ្ងៃទី ១៩ ខែ មេសា ឆ្នាំ ២០២៦ និង​ដំណាក់កាលទី ២ ចាប់ពីថ្ងៃទី ២៨ ខែ តុលា ដល់ថ្ងៃទី ៨ ខែ វិច្ឆិកា ឆ្នាំ ២០២៦៕

អត្ថបទ៖ សេម កុសល