ញាក់សាច់! Nico Williams ព្រមព្រៀងលក្ខខណ្ឌផ្លាស់ទៅ Barcelona ហើយ

ខ្សែប្រយុទ្ធស្លាបរបស់ Athletic Club កីឡាករ Nico Williams ព្រមទទួលយកសំណើក្នុងការផ្លាស់ទៅចូលរួមជាមួយ FC Barcelona បន្ទាប់ពីភ្នាក់ងាររបស់គេ និងនាយកប្រត្តិបត្តិផ្នែកកីឡាលោក Deco ណត្តិជួបគ្នា ដើម្បីចរចាលើការផ្ទេរនេះ។

Williams ដែលបច្ចុប្បន្នមានវ័យ ២២ ឆ្នាំ ធ្លាប់មានទំនាក់ទំនងជាមួយ Barcelona ម្តងហើយ កាលពីរដូវក្តៅឆ្នាំ ២០២៤ ប៉ុន្តែចុងក្រោយ រូបគេបានសម្រេចចិត្តស្នាក់នៅជាមួយ Athletic Club បន្តទៀត ដោយច្រានចោលការផ្ទេរមកកាន់ទឹកដី Camp Nou។

យ៉ាងណាក៏ដោយ នៅរដូវក្តៅនេះ Williams នៅតែទទួលបានការចាប់អារម្មណ៍ពី Barcelona និងមានក្លិបមួយចំនួនទៀតដូចជា Bayern Munich និង Arsenal។ ប៉ុន្តែរបាយការណ៍ចុងក្រោយនេះ យោងតាមការចុះផ្សាយដោយអ្នកកាសែត អ៊ីតាលី លោក Fabrizio Romano បានឱ្យដឹងថា ខ្សែប្រយុទ្ធសញ្ជាតិ អេស្ប៉ាញ វ័យ ២២ ឆ្នាំ គឺចង់លេងនៅ La Liga បន្តទៀត ដោយចូលរួមជាមួយក្រុមអ្នកមានបុណ្យ។

ប្រភពដដែលបានបន្ថែមថា ភ្នាក់ងាររបស់ Williams និងនាយកប្រត្តិបត្តិផ្នែកកីឡារបស់ Barcelona លោក Deco បានណត្តិជួបគ្នា ដើម្បីពិភាក្សាអំពីការផ្ទេរនេះ។ សេចក្តីរាយការណ៍ចុងក្រោយបានឱ្យដឹងថា ខ្សែប្រយុទ្ធរបស់ Athletic Club រូបនេះ បានយល់ព្រមទទួលយកសំណើរបស់ Barcelona ដែលផ្តល់ប្រាក់ពលកម្មឱ្យខ្លួនចំនួន ៧.៣ លានដុល្លារអាមេរិកក្នុងមួយឆ្នាំ បន្ទាប់ពីបង់ពន្ធរួច។

គួរបញ្ជាក់ថា Williams គឺជាខ្សែប្រយុទ្ធដ៏លេចធ្លោរមួយរូបរបស់ Athletic Club និងក្រុមជម្រើសជាតិ អេស្ប៉ាញ ខណៈកាលពីរដូវកាលមុន ២០២៤-២០២៥ រូបគេរកបាន ១១ គ្រាប់ និង ៧ assist ក្នុងចំណោមការបង្ហាញខ្លួន ៤៥ ប្រកួតគ្រប់កម្មវិធី៕

ប្រែសម្រួល៖ សេម កុសល
ប្រភព៖ Fabrizio Romano