អាច​ជា​ដំណឹង​រីក​រាយសម្រាប់​អ្នក​គាំទ្រ Charlie Scott មិនចង់លេង​ក្លិប​ផ្សេង បើ​បន្ត​នៅ​កម្ពុជា

ខ្សែបម្រើសញ្ជាតិ អង់គ្លេស Charlie Scott បានទម្លាយពីគោលបំណងរបស់ខ្លួន ដោយគាត់មានឆន្ទៈចង់លេងឱ្យតែក្លិប បឹងកេត មួយគត់ ប្រសិនបើបន្តអាជីពលេងនៅក្នុងប្រទេស កម្ពុជា ​ទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅក្នុងកិច្ចសម្ភាសតាមរយៈសារអេឡិចត្រូនិក​ជាមួយសារព័ត៌មាន «កម្ពុជាថ្មី» បន្ទាប់ពីសួរនាំអំពីការបន្តកិច្ចសន្យាថ្មី កីឡាករ Scott បានឆ្លើយតបមកវិញយ៉ាងដូច្នេះថា៖ «ខ្ញុំមិនទាន់បានចុះកិច្ចសន្យាជាមួយពួកគេ (បឹងកេត) ម្តងទៀតនៅឡើយទេ ប៉ុន្តែខ្ញុំគិតថា កីឡាករបរទេសទាំងអស់នៅពេលនេះ កំពុងតែសម្រាកលំហែរកាយនៅប្រទេសកំណើតរបស់ពួកគេ»។

អតីតយុវជនថ្នាលរបស់ Man United រូបនេះបានបន្តទៀតថា៖ «ប្រសិនបើខ្ញុំស្នាក់នៅប្រទេស កម្ពុជា បន្ត​ទៀត​ ខ្ញុំ​នឹង​បន្ត​លេង​នៅ​ជា​មួយ​ បឹងកេត មួយគត់។ ខ្ញុំមិនចង់លេងទល់នឹងនរណាម្នាក់ (កីឡាករបឹងកេត) ទេ។ បឹងកេត គឺជាក្លិបដ៏ល្អ ជាមួយនឹងមនុស្សល្អៗនៅទីនោះ»។

ជុំវិញការលើកឡើងខាងលើ Scott ប្រាប់ច្បាស់ៗ ថា បច្ចុប្បន្នគាត់មិនទាន់បានចុះកិច្ចសន្យាថ្មីជាមួយ បឹងកេត នៅឡើយទេ ប៉ុន្តែបើគាត់ស្នាក់នៅប្រទេសកម្ពុជាបន្ត គឺគាត់នឹងលេងនៅក្លិប បឹងកេត តែមួយគត់។ ជាមួយគ្នានេះ គាត់ក៏បានបង្ហើបផងដែរ ថាមូលហេតុដែល គាត់ចង់លេងឱ្យតែក្រុមបឹងកេត ដោយសារគាត់មិនចង់លេងទល់នឹងកីឡាករមកពីក្លិបនេះឡើយ ហើយម្យ៉ាងទៀត គាត់បានចាត់ទុកបឹងកេត គឺជាក្លិបដ៏ល្អមួយ ដែលពោរពេញទៅដោយមនុស្សល្អៗនៅទីនោះ។

គួរឱ្យដឹងថា បច្ចុប្បន្ន Scott បានអស់សុពលភាពកិច្ចសន្យាជាមួយ បឹងកេត ហើយ បន្ទាប់ពីចុះកិច្ចសន្យាចូលរួមជាមួយក្លិបនេះនៅខែ មករា ឆ្នាំ ២០២៥។ យ៉ាងណាមិញ ក្នុងការលេងនៅទីនេះកន្លះរដូវកាលមកនេះ ខ្សែបម្រើការពារវ័យ ២៧ ឆ្នាំ បានជួយឱ្យក្រុមរហស្សនាមនាគខៀវ បញ្ចប់រដូវកាល ២០២៤-២០២៥ ដោយឈរនៅចំណាត់ថ្នាក់ទី ៤ នៃលីគកំពូលកម្ពុជា និងដណ្តើមបានចំណាត់ថ្នាក់លេខ ៣ ក្នុងពានសម្តេចតេជោ៕

អត្ថបទ៖ កុសល