កីឡា

អ្នកស្រី អ៉ីវ ចន្ទ័មន្នីរត្ន័ លើកឡើងពីសារប្រយោជន៍ក្រោយកូនៗហាត់កីឡាតេក្វាន់ដូ ITF

បានផុស

១០ ខែ មុន

នៅ

ថ្ងៃពុធ ២ កក្កដា ២០២៥

ដោយ

អ្នកស្រី អ៉ីវ ចន្ទ័មន្នីរត្ន័ បានជំរុញ និងលើកទឹកចិត្តកូនៗឲ្យហ្វឹកហាត់កីឡាតេក្វាន់ដូ ITF អស់រយៈពេលប្រហែល ៧ឆ្នាំមកហើយ ស្របពេលមើលឃើញពីការផ្ដល់អត្ថប្រយោជន៍ជាខ្លាំងចំពោះសុខភាពរាងកាយមាំមួន និងប្រាជ្ញាស្មារតី។

អ្នកស្រី អ៉ីវ ចន្ទ័មន្នីរត្ន័ និងគ្រួសារ

អ្នកស្រី អ៉ីវ ចន្ទីមន្នីរត្ន័ បានឲ្យដឹងថា កូនប្រុសរបស់អ្នកស្រីដែលទើបឈ្នះមេដាយមាស ជើងឯកអាស៊ីអាគ្នេយ៍ លើកទី២ នេះបានហ្វឹកហាត់កីឡាតេក្វាន់ដូ ITF អស់រយៈពេលប្រហែល ៧ឆ្នាំមកហើយជាមួយគ្រូជើងចាស់គឺលោក ប៉ាល់ ជីវ័ន។

យុវជន ឈួងរត្ន័ ឬទ្ធិរាជ

អាណាព្យាបាលខាងលើនេះលើកឡើងទៀតថា កីឡាមួយណាក៏ល្អដែរឲ្យតែហ្វឹកហាត់បានត្រឹមត្រូវតាមបច្ចេកទេសគឺសុទ្ធតែផ្ដល់អត្ថប្រយោជន៍ទាំងអស់។ ដោយឡែកចំពោះការមើលឃើញបន្ទាប់ពីកូនៗអ្នកស្រីហ្វឹកហាត់កីឡាតេក្វាន់ដូ ITF ជាច្រើនឆ្នាំមកនេះគឺបានផ្ដល់អត្ថប្រយោជន៍ច្រើនដូចជាធ្វើឲ្យកូនមានកម្លាំងល្អ សុខភាពរាងកាយមាំមួន ស្មារតីរឹងប៉ឹង កាយសម្បទារហ័សរហួនជាដើម។

យុវជន ឈួងរត្ន័ ឬទ្ធិរាជ និងមិត្តរួមក្លឹប

អ្នកស្រីបន្ថែមទៀតថា យុវជនហ្វឹកហាត់មានសុខភាពល្អហើយនោះក៏មានឱកាសបានបញ្ចេញសមត្ថភាពចំពោះកីឡាដែលខ្លួនបានហ្វឹកហាត់កន្លងមកទៀតផងទាំងកម្រិតជាតិ និងអន្តរជាតិ។ ទាំងនេះហើយជាចំណុចល្អ និងបទពិសោធសម្រាប់យុវជនឆ្ពោះទៅការរស់នៅក្នុងសង្គម។

យុវជនតេក្វាន់ដូ ITF

បញ្ជាក់ដែរថា អ្នកស្រី អ៉ីវ ចន្ទ័មន្នីរត្ន័ ជាអាណាព្យាបាលរបស់យុវជន ឈួងរត្ន័ ឬទ្ធិរាជ ដែលទើបឈ្នះមេដាយមាស ១គ្រឿងក្នុងព្រឹត្តិការណ៍ជ្រើសរើសជើងឯកតេក្វាន់ដូ ITF អាស៊ីអាគ្នេយ៍ លើកទី២ នៅកម្ពុជា។ អ្នកស្រីមានកូន ២នាក់កំពុងហ្វឹកហាត់កីឡាតេក្វាន់ដូ ITF រៀងរាល់ចុងសប្ដាហ៍ជាមួយលោក ប៉ាល់ ជីវ័ន គ្រូជើងចាស់ និងល្បីឈ្មោះប្រចាំសហព័ន្ធ៕