កីឡា

ក្លិបបាល់ទាត់កម្ពុជា កំពុងបង្កើតរឿងភ្ញាក់ផ្អើល មិនធ្លាប់មាន ត្រៀមរដូវកាលថ្មី

បានផុស

៩ ម៉ោង មុន

នៅ

ថ្ងៃអង្គារ ៨ កក្កដា ២០២៥

ដោយ

អ្នកគាំទ្របាល់ទាត់កម្ពុជាកំពុងមានការភ្ញាក់ផ្អើលយ៉ាងខ្លាំងសម្រាប់ក្លិបបាល់ទាត់កម្ពុជា ដែលបានធ្វើការដោះដូរ កីឡាករខ្លាំងស្ទើរមិនធ្លាប់មានក្នុងប្រវត្តិក្លិបបាល់ទាត់កម្ពុជា។

ព្រះខ័នរាជស្វាយរៀង

ក្លិបព្រះខ័នរាជស្វាយរៀង បានធ្វើឲ្យអ្នកគាំទ្រចាប់អារម្មណ៍មិនស្ទើរទេ។ ក្រោយចប់រដូវកាលភ្លាម លោក Pep Munoz បានប្រកាសចាកចេញ ហើយតែងតាំងគ្រូជំនួយជា Mattew McConkey ជាគ្រូបង្គោលថ្មី។ អ្នកគាំទ្រសោកស្តាយចំពោះខ្សែបម្រើការពារ Breno Caetano និង Gabi ដែលត្រូវបានចែកផ្លូវគ្នា ប៉ុន្តែការនាំចូលកីឡាករក្នុងស្រុកបានធ្វើឲ្យមានការចាប់អារម្មណ៍ខ្លាំងមែនដោយយកបានកីឡាករដើមកំណើតជប៉ុន សញ្ជាតិខ្មែរ Yudai Ogawa, ខ្សែប្រយុទ្ធ សៀង ចន្ធា និង ខ្សែការពារ សឿត បារាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចុងក្រោយ ព្រះខ័នរាជស្វាយរៀង នាំចូលខ្សែប្រយុទ្ធបរទេសសញ្ជាតិហ្គាណា Kwame Peprah និងប្រេស៊ីល Patrick Souza Monteiro បន្ថែមលើខ្សែប្រយុទ្ធមានស្រាប់ Cristian និង Bounkong។

ភ្នំពេញក្រោន

ភ្នំពេញក្រោន បានបញ្ចេញកីឡាករបរទេសស្ទើរទាំងអស់ ដោយសល់តែខ្សែការពារសញ្ជាតិកូរ៉េខាងត្បូង Park Yi-young ម្នាក់គត់ត្រូវបានបន្តកុងត្រាថ្មី។ ខ្សែប្រយុទ្ធដើមកំណើតកូឡុំប៊ី សញ្ជាតិខ្មែរ Andres Neito, ខ្សែការពារដើមកំណើតជប៉ុនសញ្ជាតិខ្មែរ Takaki Ose និងខ្សែបម្រើកណ្តាលដ៏ឆ្នើម Yodai Ogawa ព្រមទាំងខ្សែការពារស្លាប សឿត បារាំង បានចេញថែមទៀត។

ក្រោយមក អ្នកគាំទ្របានភ្ញាក់ផ្អើលចំពោះការនាំចូលកីឡាករបរទេសថ្មីគឺសុទ្ធតែមកពីតំបន់អឺរ៉ុបចំនួន ៤ នាក់គឺខ្សែការពាររ៉ូម៉ានី Raul Feher, ខ្សែការពារហូឡង់ Rick Ketting, ខ្សែប្រយុទ្ធអ៊ុយក្រែន Maksym Prydun និងខ្សែប្រយុទ្ធនូវែលសេឡង់ Mose Dyer។ ពេលនេះ ភ្នំពេញក្រោនមានកីឡាករបរទេស ៥ នាក់ ហើយនៅខ្វះ ១ នាក់ទៀត។

វិសាខា

វិសាខា ដែលជាក្លិបសំបូរធនធានហិរញ្ញវត្ថុក៏មិនធម្មតាដែរដែលបានត្រៀមខ្លួនទ្រង់ទ្រាយធំមែនទែនដើម្បីដាក់គោលដៅឈ្នះជើងឯកលីគកំពូលកម្ពុជាជាលើកដំបូង។ ពួកគេបានតែងតាំងគ្រូបង្គោលថ្មី Gerard Jones ជនជាតិអង់គ្លេសដែលមានបទពិសោធច្រើននៅលើឆាកអន្តរជាតិ។

ពួកគេបានធ្វើឲ្យភ្ញាក់ផ្អើលនៅពេលនាំចូលកីឡាករប្រេស៊ីល Breno Caetano ដែលទទួលបានការចាប់អារម្មណ៍ពីអ្នកគាំទ្រខ្លាំងនៅពេលលេងឲ្យព្រះខ័នរាជស្វាយរៀងកាលពីពាក់កណ្តាលរដូវកាលមុន។ បន្ថែមលើនេះទៀត ពួកគេបាននាំចូលខ្សែប្រយុទ្ធបរទេស ២ នាក់ទៀតគឺ Benson Omala សញ្ជាតិកេនយ៉ា និង Nana Kwame សញ្ជាតិហ្គាណា។

ចំណូលថ្មីបរទេស ៣ នាក់នេះ បន្ថែមលើកម្លាំងបម្រើកណ្តាលបរទេសដ៏សំខាន់គឺកីឡាករកូរ៉េខាងត្បូង Park Jung-bing និងអ៊ូបេគីស្ថាន Alisher Mirzaev ព្រមទាំងខ្សែការពារ Vitalijs Jogodinskis ដែលគ្រប់ ៦ នាក់ល្មមសម្រាប់កីឡាករបរទេស។ ចំពោះកីឡាករក្នុងស្រុកមិនសូវមានអ្វីគួរឲ្យចាប់អារម្មណ៍ទេ ពីព្រោះវិសាខា សំបូរកីឡាករក្នុងស្រុកល្អស្រាប់។

បឹងកេត

រដូវកាលថ្មីខាងមុខអាចចាត់ទុកជាឆ្នាំដែល បឹងកេត ត្រៀមខ្លួនធំបំផុត។ ពួកគេរក្សាទុកគ្រូបង្វឹកដែលមានបទពិសោធស្រាប់គឺលោក Conor Nestor និងបន្តកុងត្រាកីឡាករអង់គ្លេស Charlie Scott ដែលអ្នកគាំទ្រពេញចិត្តតាំងពីពាក់កណ្តាលរដូវកាលមុន។ រឿងធំគួរឲ្យចាប់អារម្មណ៍បំផុត គឺ បឹងកេត មិនអាចរក្សាទុក ខ្សែប្រយុទ្ធ សៀង ចន្ធា បាន។

ទោះបីជាយ៉ាងណា បឹងកេត បានបើកវាំងនន បង្ហាញចំណូលថ្មីសុទ្ធតែមានបទពិសោធច្រើន ក្នុងនោះ ខ្សែប្រយុទ្ធសញ្ជាតិកាមេរ៉ូន Ndongo Louis Willy, ខ្សែបម្រើសញ្ជាតិអូស្ត្រាលី Louis Zabala, ខ្សែការពារសញ្ជាតិស្កុតឡែន Sean Kelly។ កីឡាករបរទេសថ្មី ៣ នាក់នេះ បន្ថែមលើកីឡាករបរទេសដែលល្អមានស្រាប់គឺកីឡាករប្រេស៊ីល Iago Bento និង Charlie Scott ពិតជាធ្វើឲ្យបឹងកេត នារដូវកាលថ្មី មិនភ្ញាក់ផ្អើលទើបចម្លែក ប៉ុន្តែនៅមិនទាន់អស់ទេ។ ពួកគេទំនងជាប្រកាសកីឡាករបរទេសម្នាក់ទៀត ពីព្រោះទើបតែប្រកាសជាផ្លូវការ៥នាក់ប៉ុណ្ណោះ។

ក្លិបផ្សេងទៀតក៏បានរៀបចំក្រុមយ៉ាងល្អដែរ។ ជាក់ស្តែង អាយអេសអាយ ដង្កោសែនជ័យ ត្រូវបានអ្នកគាំទ្រចាប់អារម្មណ៍មិនស្ទើរទេ។ ពួកគេបាននាំចូលខ្សែការពារព័រទុយហ្គាល់ Joao Rodrigues, ខ្សែប្រយុទ្ធហ្គីណេ Diakite Bunthab, ខ្សែប្រយុទ្ធប្រេស៊ីល Bruno Ernandes ព្រមទាំងខ្សែបម្រើសេរ៉ាលីអ៊ូន Umaru Samura។ ជាមួយគ្នានេះ រូបគេបានយកយុវជនសញ្ជាតិនីហ្សេរីយ៉ា Emmanuel Chinonso ដែលជាកីឡាករឆ្នើមប្រចាំលីគយុវជនកម្ពុជាអាយុ ១៩ឆ្នាំរដូវកាលមុន ព្រមទាំងកីឡាករជប៉ុន Sonosuke Onda។ ក្លិបណាហ្គាវើល៍ អង្គរថាយហ្គឺរ កងយោធពលខេមរភូមិន្ទ ឡាយហ្វព្រះសីហនុ គិរីវង់សុខសែនជ័័យ និង MOI កំពង់ដេវា ក៏សុទ្ធតែបានរៀបចំក្រុមយ៉ាងល្អផងដែរ។

តាមរយៈការត្រៀមខ្លួនយ៉ាងសស្រាក់សស្រាំបែបនេះ ខេមបូឌានព្រីមៀរលីគ នឹងកាន់តែមានការប្រកួតប្រជែងខ្ពស់ កាន់តែទាក់តាញមហាជនទាំងនៅក្នុងប្រទេស និងក្នុងតំបន់។ ស្របពេលក្លិបកម្ពុជា ២ មានភារកិច្ចប្រកួតពានរង្វាន់អន្តរជាតិ៕

អត្ថបទ៖ វីរបុត្រ

Related Topics:ខេមបូឌានលីគ (Cambodian Premier League)

ព័ត៌មានអន្ដរជាតិ៤ ថ្ងៃ ago

Google នឹងមិនប្តូរផែនទីនៅលើកម្មវិធី Maps តាមសំណើរបស់ថៃ ឡើយ

សេចក្ដីជូនដំណឹង៤ ថ្ងៃ ago

អ្នកឧកញ៉ា ឡេង ណាវ៉ាត្រា ចាត់ក្រុមការងារសហព័ន្ធយុវជនបូជាការពារយុត្តិធម៌ ទាំងយប់ចុះជួបវីរកងទ័ពកម្ពុជាដ៏អង់អាចក្លាហាន ដេញកងទ័ពថៃឈ្លានពាន ចេញនៅចំណុចភ្នំខ្មោច