អ៊ីរ៉ាក់ ស្នើសុំប្តូរ កម្ពុជា ពីការធ្វើម្ចាស់ផ្ទះវគ្គជម្រុះ​ពាន U23 ASIAN CUP

សមាគមបាល់ទាត់ អ៉ីរ៉ាក់ (IFA) បានស្នើសុំទៅសហព័ន្ធបាល់ទាត់ទ្វីបអាស៊ី (AFC) ប្តូរប្រទេស កម្ពុជា ពីការធ្វើជាម្ចាស់ផ្ទះវគ្គជម្រុះពានរង្វាន់ AFC U23 ASIAN CUP។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមប្រភពពី ASEAN Football បានឱ្យដឹងថា សមាគមបាល់ទាត់ អ៉ីរ៉ាក់ (IFA) បានដាក់លិខិតជាផ្លូវការ ដើម្បីស្នើសុំទៅ AFC ឱ្យកែសម្រួលការប្រកួតវគ្គជម្រុះពានរង្វាន់ U23 ASIAN CUP ២០២៥ ក្នុងពូល G ដោយប្តូរ កម្ពុជា ពីការធ្វើជាម្ចាស់ផ្ទះ និងជ្រើសរើសប្រទេសផ្សេងជំនួសវិញ ដោយសារពួកគេបារម្ភពីបញ្ហាសុវត្ថិភាពកីឡាករ បន្ទាប់ពីមានជម្លោះព្រំដែនរវាងកម្ពុជា និង ថៃ។

ពាក់ព័ន្ធនឹងបញ្ហានេះ មន្ត្រីរបស់ IFA បានពន្យល់ថា៖ «ការសម្រេចចិត្តនេះបានកើតឡើង ដោយសារតែស្ថានភាពមិននឹងនររវាងកម្ពុជា និង ថៃ។ ជាពិសេស គឺគម្រោងរបស់យើង គ្រោងនឹងបោះជម្រុំហ្វឹកហាត់នៅប្រទេស ថៃ ដោយសារតែទីនោះកៀកនឹងប្រទេសធ្វើម្ចាស់ផ្ទះ»។

គួរឱ្យដឹងថា ការប្រកួតពានរង្វាន់ U23 ASIAN CUP វគ្គជម្រុះពូល G ដែលមាន អ៊ីរ៉ាក់ កម្ពុជា អូម៉ង់ និងប៉ាគីស្ថាន គ្រោងធ្វើនៅ កម្ពុជា ចាប់ពីថ្ងៃទី ១ ដល់ថ្ងៃទី ៩ ខែ កញ្ញា ឆ្នាំ ២០២៥៕

អត្ថបទ៖ សេម កុសល