Ronaldo បានបំពាក់ចិញ្ចៀនពេជ្រ ភ្ជាប់ពាក្យ​ដល់​គូស្នេហ៍មានតម្លៃខ្ទង់លានដុល្លារ

ខ្សែប្រយុទ្ធជម្រើសជាតិ ព័រទុយហ្គាល់ Cristiano Ronaldo បានសម្រេចចិត្តភ្ជាប់ពាក្យជាមួយមិត្តស្រីរបស់ខ្លួន​អ្នកនាង Georgina Rodriguez ដោយបានបំពាក់ចិញ្ចៀនពេជ្រដ៏ធំមួយមានតម្លៃខ្ទង់លានដុល្លារអាមេរិក។

ថ្មីៗនេះអ្នកនាង Georgina Rodriguez បានប្រកាសនៅលើគណនី IG របស់នាងអំពីការភ្ជាប់ពាក្យនេះ ដោយបានបង្ហោះរូបចិញ្ចៀនពេជ្រដ៏ធំមួយនៅម្រាមដៃ​ខាងឆ្វេង អមជាមួយសំណេរថា៖ «ចាស ខ្ញុំធ្វើវាហើយ។ នៅក្នុងនេះ វាគឺជាជីវិតរបស់ខ្ញុំទាំងមូល»។

យ៉ាងណា លក្ខណៈលម្អិត និងតម្លៃនៃចិញ្ចៀនពេជ្រនេះ គឺមិនទាន់ត្រូវបានគេទម្លាយជាផ្លូវការនៅឡើយទេ ប៉ុន្តែបើតាមការស្មានដោយអ្នកជំនាញបានឱ្យដឹងថា ចិញ្ចៀនដ៏ធំសម្បើមនេះ អាចមានទំហំធំជាង ៥ សង់ទីម៉ែត្រ ហើយមានទម្ងន់ចន្លោះពី ២៥ ទៅ ៣០ ការ៉ាត់។ សម្រាប់ចិញ្ចៀននេះផងដែរ ត្រូវបានគេអះអាងថា អាចមានតម្លៃទាបបំផុត ២ លានដុល្លារអាមេរិក ហើយខ្ពស់បំផុតអាចដល់ ៥ លានដុល្លារអាមេរិក។

តាមរយៈការភ្ជាប់ពាក្យនេះបានបង្ហាញថា Ronaldo និងតារាបង្ហាញម៉ូតសញ្ជាតិ អាហ្សង់ទីន Georgina Rodriguez ជិតរៀបការជាមួយគ្នាហើយ បន្ទាប់ពីអ្នកទាំង ២ រួមរស់ជាមួយគ្នាអស់រយៈពេល ៩ ឆ្នាំ និងមានកូនជាមួយគ្នាចំនួន ២ នាក់៕

ប្រែសម្រួល៖ សេម កុសល
ប្រភព៖ Marie Claire