ចរាចរណ៍

ថៃនឹងយកប្រាក់៩ដុល្លារពីភ្ញៀវបរទេសម្នាក់ៗសម្រាប់ទ្រទ្រង់ទេសចរណ៍ខ្លួន

បានផុស

៥ years មុន

នៅ

ថ្ងៃព្រហស្បតិ៍ ១៣ មករា ២០២២

ដោយ

ប្រទេសថៃគ្រោងយកប្រាក់ប្រមាណ៣០០បាត (៩ដុល្លារអាមេរិក)ពីភ្ញៀវទេសចរបរទេសម្នាក់ៗចាប់ពីខែមេសាខាងមុខនេះដើម្បីអភិវឌ្ឍគោលដៅទេសចរណ៍ និងទទួលខុសត្រូវចំពោះធានារ៉ាប់រងគ្រោះថ្នាក់សម្រាប់ភ្ញៀវបរទេសដែលមិនអាចបង់ថ្លៃដោយខ្លួនឯង។ នេះបើតាមមន្ត្រីជាន់ខ្ពស់បាននិយាយកាលពីថ្ងៃពុធ។

ថៃដែលជាប្រទេសគោលដៅទេសចរណ៍ល្អបំផុតមួយនៅអាស៊ីទទួលរងការវាយប្រហារយ៉ាងធ្ងន់ធ្ងរលើវិស័យទេសចរណ៍របស់ខ្លួនដោយកូវីដ-១៩ ដែលទទួលបានភ្ញៀវទេចរប្រហែលជា២សែននាក់កាលពីឆ្នាំ២០២០ ប្រៀបធៀបនឹងឆ្នាំ២០១៩ទទួលបានភ្ញៀវជិត៤០លាននាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រឹងប្រែងថ្មីៗដើម្បីលើកកម្ពស់វិស័យនេះត្រូវបានរារាំងដោយវីរុសបំប្លែងខ្លួន Omicron ដែលកំពុងរាតត្បាតពិភពលោកយ៉ាងខ្លាំង។

ប្រធានអាជ្ញាធរទេសចរណ៍ថៃ លោក Yuthasak Supasorn បាននិយាយថា ៖«ចំណែកខ្លះនៃប្រាក់នេះនឹងប្រើដើម្បីថែរក្សាអ្នកទេសចរ។ យើងខ្ញុំបានជួបបញ្ហាជាច្រើនដែលភ្ញៀវទេសចរមិនមានធានារ៉ាប់រងដើម្បីចំណាយ ដូច្នេះវាបានក្លាយជាបន្ទុករបស់យើងដើម្បីមើលថែពួកគេ»។

តម្លៃបន្ថែមលើបញ្ជីនៃតម្រូវការសម្រាប់ភ្ញៀវទេសចរបរទេសដែលចូលប្រទេសថៃ ក្នុងនោះរាប់ទាំងបង់ថ្លៃធ្វើតេស្តកូវីដមុន តម្លៃស្នាក់នៅ ឬធ្វើចត្តាឡីស័ក និងមានធារ៉ាប់រងសុខភាពសម្រាប់ការព្យាបាលជំងឺកូវីដដែលហោចណាស់៥ម៉ឺនដុល្លារអាមេរិក។

ថៃបានឈប់ដាក់បំរាមធ្វើចត្តាឡីស័កកាលពីខែវិច្ឆិកាជំនួសវិញដោយគម្រោង«ការធ្វើតេស្ត និងទៅ»សម្រាប់ភ្ញៀវទេសចរបានចាក់វ៉ាក់សាំងរួច ប៉ុន្តែត្រូវបានផ្អាកកាលពីចុងខែមុនដោយសារកង្វល់នៃការរាលដាលវីរុស Omicron។

លោក Thanakorn Wangboonkongchana អ្នកនាំពាក្យរដ្ឋាភិបាលថៃបាននិយាយថា តម្លៃបន្ថែមថ្មីនេះនឹងត្រូវបង់ជាមួយតម្លៃសំបុត្រយន្តហោះ និងជាផ្នែកមួយនៃផែនការទេសចរណ៍និរន្តរភាពរបស់រដ្ឋាភិបាល។

លោកបន្ថែមថា ថៃរំពឹងទទួលបានភ្ញៀវទេសចរបរទេសចន្លោះពី៥ទៅ១៥លាននាក់នៅក្នុងឆ្នាំនេះដោយអាស្រ័យលើគោលនយោបាយសម្រាប់ទីផ្សារទេចរណ៍។ ឆ្នាំនេះថៃរំពឹងទទួលបានចំណូល២៣.៩៧ប៊ីលានដុល្លារអាមេរិក៕

ប្រែសម្រួល៖ វីរបុត្រ
ប្រភព៖ reuters