រថយន្ដNissan បុកគោយន្ដកន្រ្តៃស្លាប់៤នាក់ របួស៤នាក់

មានករណីគ្រោះថ្នាក់ចរាចរណ៍មួយគួរឲ្យរន្ធត់រវាងរថយន្ត និងគោយន្តកន្ត្រៃបណ្តាលឲ្យមនុស្សស្រីប្រុសស្លាប់៤នាក់ និងរបួសធ្ងន់៤នាក់ លេីចំណុចផ្លូវកៅស៊ូ ត្រង់ចំណុចភូមិតាម៉ៅ ឃុំស្រក ស្រុកកំពង់សៀម ខេត្តកំពង់ចាម។

តាមប្រភពពីប្រជាពលរដ្ឋនៅតំបន់នោះបានឲ្យដឹងថា រថយន្តបេីកបរក្នុងស្ថានភាពល្បឿនលឿន បើកបរពីទិសខាងកើតទៅទិសខាងលិច ស្រាប់តែមកដល់ចំណុចកេីតហេតុនៅវេលាម៉ោង៣និង៣៥នាទី ថ្ងៃទី១៤ ខែឧសភា ឆ្នាំ២០២៣ បានមកបុកគោយន្ដកន្ត្រៃរបស់កសិករពេញទំហឹង។

ប្រភពសមត្ថកិច្ចបានបញ្ជាក់ទៀតថា រថយន្តបង្កម៉ាក Nissan Brontier ពណ៌ប្រផេះ ពាក់ស្លាកលេខ ភ្នំពេញ 2AN-9962 បើកបរដោយឈ្មោះ ព្រំ គឹមនាង ភេទប្រុស អាយុ៣២ឆ្នាំ មានទីលំនៅភូមិព្រែកព្រះអង្គ ឃុំព្រែកបាក់ ស្រុកស្ទឹងត្រង់។ ចំណែកអ្នកគោយន្ដកន្រ្តៃបើកបរដោយឈ្មោះ វ័ន ខន ភេទប្រុស អាយុ៤០ឆ្នាំ និងរួមដំណើរដោយមនុស្ស៧នាក់ រស់នៅភូមិដូនទរ ឃុំទួលព្រះឃ្លាំង ស្រុកស្ទឹងត្រង់។ ក្នុងហេតុការណ៍នេះបណ្តាលឲ្យមនុស្សដែលជិះក្នុងគោយន្ដស្លាប់​៤នាក់ និងរបួសធ្ងន់៤នាក់។

បច្ចុប្បន្ន សមត្ថកិច្ចបានយកវត្ថុតាងរថយន្ត និងគោយន្ដទៅរក្សាទុកនៅអធិការដ្ឋាននគរបាលស្រុកកំពង់សៀម រីឯសពទាំង៤នាក់ ត្រូវប្រគល់ឲ្យទៅក្រុមគ្រួសារធ្វេីបុណ្យតាមប្រពៃណី។ ចំពោះអ្នកបើកបររថយន្ត សមត្ថកិច្ចធ្វេីការឃាត់ខ្លួនជាបណ្តោះអាសន្ននៅអធិការដ្ឋាននគរបាលស្រុកកំពង់សៀម ដើម្បីដោះស្រាយតាមនិតិវិធី៕

អត្ថបទ៖ ឡេក ចាន់ពេជ្រ