ព័ត៌មានអន្ដរជាតិ

The Nation៖ លោក Anutin នឹងទៅកិច្ចប្រជុំអាស៊ានថ្ងៃស្អែកវិញ បន្ទាប់ពីកាន់ទុក្ខមាតាស្តេចថៃ

បានផុស

៧ ខែ មុន

នៅ

ថ្ងៃសៅរ៍ ២៥ តុលា ២០២៥

ដោយ

Chheang

ក្រោយប្រកាសលុបចោលការធ្វើដំណើរទៅចូលរួមកិច្ចប្រជុំកំពូលមេដឹកនាំអាស៊ាននៅប្រទេសម៉ាឡេស៊ីនាថ្ងៃសៅរ៍ទី២៥ខែតុលានេះដើម្បីកាន់ទុក្ខចំពោះព្រះករុណាព្រះមហាក្សត្រី Sirikit ព្រះមហាក្សត្រី ដែលបានសោយទិវង្គតកាលពីល្ងាចថ្ងៃសុក្រ, នាយករដ្ឋមន្ត្រីថៃ លោក Anutin Charnvirakul នឹងដឹកនាំគណៈប្រតិភូទៅចូលរួមចុះកិច្ចព្រមព្រៀងសន្តិភាពកម្ពុជា-ថៃនាថ្ងៃអាទិត្យស្អែកវិញ។ នេះបើយោងតាមការចុះផ្សាយរបស់ The Nation។

លោក Anutin Charnvirakul (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពពីវិមានរដ្ឋាភិបាលបាននិយាយថា ពេលនេះលោក Anutin នឹងចេញដំណើរទៅកាន់ប្រទេសម៉ាឡេស៊ីនៅថ្ងៃស្អែក ដើម្បីចូលរួមក្នុងកិច្ចប្រជុំកំពូលអាស៊ាន ដែលត្រូវបានគេរំពឹងថានឹងស្របពេលជាមួយនឹងការចុះហត្ថលេខាលើកិច្ចព្រមព្រៀងសន្តិភាពកម្ពុជា-ថៃ ដែលមានប្រធានាធិបតីសហរដ្ឋអាមេរិក ដូណាល់ ត្រាំ ជាអ្នកសង្កេតការណ៍។ ការចុះហត្ថលេខានេះទំនងជាត្រូវផ្លាស់ប្តូរពីពេលរសៀលទៅសម័យប្រជុំពេលព្រឹក ហើយប្រសិនបើគណៈប្រតិភូអាមេរិកមិនអាចកែសម្រួលពេលវេលាតាម នាយករដ្ឋមន្ត្រីថៃនឹងផ្ទេរភារកិច្ចនេះទៅឲ្យរដ្ឋមន្ត្រីក្រសួងការបរទេស ដើម្បីចុះហត្ថលេខាជំនួសគាត់។

សូមជម្រាបថា នៅក្នុងកិច្ចប្រជុំកំពូលនេះ ប្រទេសកម្ពុជានិងថៃ នឹងចុះហត្ថលេខាលើកិច្ចព្រមព្រៀងបទឈប់បាញ់ដ៏ធំ ដើម្បីនាំមកនូវសន្តិភាព បញ្ចប់ជម្លោះព្រំដែន។

នាយករដ្ឋមន្ត្រីម៉ាឡេស៊ី អាន់វ៉ា អ៊ីប្រាហ៊ីម និងលោក ត្រាំ បានជួយសម្រុះសម្រួលបទឈប់បាញ់បឋម កាលពីថ្ងៃទី២៨ ខែកក្កដា។ រដ្ឋមន្ត្រីការបរទេសម៉ាឡេស៊ីថ្លែងថា លោក ត្រាំ ទន្ទឹងរង់ចាំធ្វើជាសាក្សីក្នុងពិធីចុះហត្ថលេខាក្នុងអំឡុងពេលកិច្ចប្រជុំអាស៊ាននេះ៕

ដោយ៖ ឈាង