Boonsin Padklang ប្រកាសឈប់ធ្វើជាអ្នកផ្តល់យោបល់ បញ្ហាជម្លោះព្រំដែនកម្ពុជា-ថៃ

អតីតមេភូមិភាគ២ថៃ Boonsin Padklang បានប្រកាសថា ខ្លួនសូមបញ្ចប់តួនាទីជាអ្នកផ្តល់យោបល់ រឿងបញ្ហាជម្លោះព្រំដែនកម្ពុជា-ថៃ តទៅទៀតហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ Amarin កាលពីថ្ងៃអាទិត្យទី១៦ខែវិច្ឆិកាឆ្នាំ២០២៥, បុរសដែលអុជបញ្ឆេះសង្គ្រាមកម្ពុជា-ថៃរូបនេះ និយាយថា ដោយសារមិនសូវមានពេលជាមួយក្រុមគ្រូសារ ដូច្នេះរូបគេក៏សម្រេចចិត្តដើរចេញពីវិស័យនេះតែម្តង។

ការប្រកាសនេះកើតឡើងមួយសប្តាហ៍ បន្ទាប់ពី Boonsin បង្កចលាចលក្នុងស្រុកថៃ សម្រាប់ការចេញមុខអះអាងថា លោកផ្គើនបញ្ជារដ្ឋាភិបាលទីក្រុងបាកកដែលឲ្យឈប់ប្រយុទ្ធជាមួយកម្ពុជា ក្រោយផ្ទុះអាវុធបាន៦ម៉ោង។

Boonsin ប្រាប់ថា មានអ្នកបញ្ជាឲ្យឈប់បាញ់ ប៉ុន្តែមិនបញ្ចេញឈ្មោះឡើយ។ សម្តីនេះបានបង្កចលា​ចលនៅក្នុងប្រទេសថៃ ដោយមានមន្ត្រីជាច្រើននាក់ ប្រញាប់ចេញមុខបដិសេធ ហើយចង្អុលដាក់គ្នា។

ក្រោយមក គណៈកម្មាធិការព្រឹទ្ធសភាទទួលបន្ទុកកិច្ចការយោធានិងសន្តិសុខរដ្ឋ ដែលមានលោក Sawat Tassana ជាប្រធាន បាននិយាយថា៖ «គណៈកម្មាធិការសម្រេចអញ្ជើញ Boonsin Padklang ឲ្យចូលរួមក្នុងកិច្ចប្រជុំមួយនៅថ្ងៃអង្គារទី១១ខែវិច្ឆិកា ដើម្បីបំភ្លឺនិងផ្លាស់ប្តូរទស្សនៈលើស្ថានភាពព្រំដែនថៃ-កម្ពុជា»។

យ៉ាងណា Boonsin មិនបានចូលខ្លួនតាមការកោះហៅទេ ដោយប្រាប់ថា ជាប់រវល់បំពេញភារកិច្ច៕

អត្ថបទ៖ សុខ សុវណ្ណ

ចុចអាន៖ Boonsin Padklang មិនចូលខ្លួនបំភ្លឺក្នុងព្រឹទ្ធសភា រឿងផ្គើនបញ្ជារដ្ឋាភិបាលថៃទេ