រុស្ស៊ី វាយប្រហារច្រើនទីតាំងនៅអ៊ុយក្រែន មុនជំនួប ហ្សេលេនស្គី-ម៉ាក្រុង នៅ ប៉ារីស

កងកម្លាំងរុស្ស៊ីបានបើកការវាយប្រហារច្រើនទីតាំងនៅក្នុងប្រទេសអ៊ុយក្រែន ដោយបណ្តាលឲ្យមានមនុស្សស្លាប់និងបំផ្លិចបំផ្លាញហេដ្ឋារចនាសម្ព័ន្ធនានា ខណៈប្រតិបត្តិការនេះកើតឡើងមុនពេល មេដឹកនាំអ៊ុយក្រែន វ៉ូឡូឌីមៀរ ហ្សេលេនស្គី ជួបពិភាក្សាជាមួយប្រធានាធិបតីបារាំង អេម៉ានុយអែល ម៉ាក្រុង ក្នុងរដ្ឋធានីប៉ារីស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ Al Jazeera នៅថ្ងៃចន្ទទី១៧ខែវិច្ឆិកាឆ្នាំ២០២៥ រុស្ស៊ីបានបើកការវាយប្រហារក្នុងតំបន់ Kharkiv, Kherson និង Odesa។

នៅ Kharkiv មានសេចក្តីរាយការណ៍អំពីមនុស្សស្លាប់ចំនួន៣នាក់និងរបួស១០នាក់ ដោយសារការវាយប្រហារមីស៊ីលចំនួន២លើក ក្នុងទីក្រុង Balakliya នាពេលរាត្រី។ អភិបាលតំបន់ Kharkiv លោក Oleg Syniehubov​ និយាយថា អ្នករបួសគឺរួមមានទាំងក្មេងស្រីអាយុ១៤ឆ្នាំ, កុមារអាយុ១២ឆ្នាំនិងបុរសវ័យចំណាស់ម្នាក់ផងដែរ។

នៅ Kherson, បើយោងតាមប្រភពពីរដ្ឋបាលក្រុង ដ្រូនរបស់រុស្ស៊ី បានវាយប្រហារចំឡានពេទ្យក្នុងស្រុក Dniprovskyi បណ្តាលឲ្យអ្នកបើកបរនិងគ្រូពេទ្យម្នាក់រងរបួស។

ចំណែកនៅ Odesa ឯណោះវិញ រុស្ស៊ីបានបាញ់ទៅលើរោងចក្រថាមពលនិងកំពង់ផែ បង្កជាអគ្គិភ័យ ឆាបឆេះយ៉ាងសន្ធោសន្ធៅ។ លោក Oleksii Kuleba ឧបនាយករដ្ឋមន្ត្រីទទួលបន្ទុកស្តារប្រទេស បានថ្លែងថា ការវាយប្រហារនេះបង្កការខូចខាតដល់ឧបករណ៍កំពង់ផែ និង នាវាជាច្រើនគ្រឿងដែលកំពុងចត។

សូមជម្រាបជាថ្មី ការវាយប្រហារនេះកើតឡើងមុនពេលលោក ហ្សេលេនស្គីនិងម៉ាក្រុង ត្រៀមជួបគ្នាក្នុងទីក្រុងបារីស។ ក្នុងជំនួបនោះ គឺរំពឹងថា លោកហ្សេលេនស្គី នឹងសម្រេចបាននូវកិច្ចព្រមព្រៀង ជាមួយបារាំង ស្តីពីការផ្គត់ផ្គង់ខែលការពារដែនអាកាស យន្តហោះចម្បាំង និង មីស៊ីល ដើម្បីយកទៅតទល់ជាមួយរុស្ស៊ី៕

អត្ថបទ៖ សុខ សុវណ្ណ

ចុចអាន៖ អ៊ុយក្រែន​ព្យួរ​តំណែង​រដ្ឋមន្ត្រី​ជាន់ខ្ពស់ ជុំវិញ​រឿងអាស្រូវ​ពុករលួយ​ថាមពល​តម្លៃ១០០លាន​ដុល្លារ