មន្ទីរធនធានទឹកខេត្តពោធិ៍សាត់ ណែនាំឲ្យអាជ្ញាធរ​មូលដ្ឋាន ពិសេសពលរដ្ឋឲ្យប្រុងប្រយ័ត្នគ្រោះទឹកជំនន់ពីស្ទឹងពោធិ៍សាត់

មន្ទីរធនធានទឹក និងឧតុនិយម ខេត្តពោធិ៍សាត់ នៅព្រឹកថ្ងៃទី២០ ខែវិច្ឆិកា ឆ្នាំ២០២៥នេះ បានណែនាំឲ្យអាជ្ញាធរគ្រប់ ក្រុង ស្រុក ជាពិសេសប្រជាពលរដ្ឋរស់នៅតាមដងស្ទឹងពោធិ៍សាត់ និងស្ទឹងពាក់ព័ន្ធ ឲ្យបង្កើនការយកចិត្តទុកដាក់ប្រុងប្រយ័ត្នខ្ពស់ ដើម្បីជៀសវាងនូវគ្រោះថ្នាក់ផ្សេងៗ ដែលអាចកើតមានឡើងដោយយថាហេតុពីគ្រោះទឹកជំនន់ និងត្រៀមរកទីទួលសុវត្ថិភាពសម្រាប់ជម្លៀសប្រជាពលរដ្ឋដែលងាយរងគ្រោះ។

ការណែនាំនេះ ធ្វើឡើងបន្ទាប់ពីមន្ទីរធនធានទឹក និងឧតុនិយមខេត្ត បានតាមដានលើស្ថានភាពធាតុអាកាសខេត្តពោធិ៍សាត់ និងសង្កេតឃើញពីស្ថានភាពទឹកស្ទឹងពោធិ៍សាត់ មានកម្ពស់ទឹកបានកើនឡើងក្នុងកម្រិតមួយដែលត្រូវប្រកាសអាសន្ន។

តាមប្រកាសព័ត៌មានរបស់មន្ទីរធនធានទឹក បន្ទាប់ពីបានធ្វើការសង្កេតតាមដានលើស្ថានភាពអាកាសធាតុ ខេត្តពោធិ៍នឹងមានមានភ្លៀងធ្លាក់នៅតំបន់ជួរភ្នំក្រវាញ ស្ទឹងអារ៉ៃ និងស្ទឹងធំ មានកម្រិតខ្ពស់មកលើដងស្ទឹងពោធិ៍សាត់។ ឥទ្ធិពលនៃស្ទឹងខាងលើនេះ នឹងធ្វើអោយទឹកស្ទឹងពោធិ៍សាត់ មានសន្ទុះកើនឡើងបន្តបន្ទាប់ និងអាចបង្កអោយមានទឹកជំនន់នៅក្នុងខេត្តពោធិ៍សាត់។

លោក ខូយ រីដា អភិបាលនៃគណអភិបាល ខេត្តពោធិ៍សាត់ តាមរយៈទំព័រហ្វេសប៊ុក នាព្រឹកថ្ងៃទី២០វិច្ឆិកានេះ បានឲ្យដឹងថា ស្ថានភាពជំនន់ទឹកភ្លៀងតាមដងស្ទឹងពោធិ៍សាត់ បាននិងកំពុងដាក់សម្ពាធនៅក្រុងពោធិ៍សាត់ ពិសេសចំណុចសង្កាត់ព្រៃញី សង្កាត់បន្ទាយដី សង្កាត់រលកស សង្កាត់ផ្ទះព្រៃ និងក្បាលហុង ដោយសារតែក្បាលស្ទឹងទាំងបី នៅប៉ែកខាងលើបានបុកសម្រុកមក។ លោកថា អាជ្ញាធរខេត្ត បាននិងកំពុងយកចិត្តទុកដាក់ អន្តរាគមន៍ជួយទប់ទឹក និងជម្លៀសប្រជាពលរដ្ឋដែលប្រឈមខ្លាំង។ លោកអភិបាលខេត្ត ក៏អំពាវនាវដល់ប្រជាពលរដ្ឋ ដែលរស់នៅតាមដងស្ទឹង ជាពិសេសនៅស្រុកកណ្តៀង សូមមេត្តាប្រុងប្រយ័ត្នខ្ពស់៕

អត្ថបទ៖ សុខុម