ព័ត៌មានជាតិ

មន្ត្រីនគរបាល ដែលដឹកប្រពន្ធចេញចូល នៅតំបន់បិទខ្ទប់ ត្រូវសមត្ថកិច្ចកោះហៅមកធ្វើកិច្ចសន្យា

បានផុស

៥ years មុន

នៅ

ថ្ងៃព្រហស្បតិ៍ ១៥ មេសា ២០២១

ដោយ

មន្ត្រីនគរបាលមួយរូប ដែលដឹកប្រពន្ធចេញចូល នៅតំបន់បិទខ្ទប់នៅភូមិទ្រង់មាន់ សង្កាត់អូបែកក្អម ខណ្ឌសែនសុខ ហើយត្រូវបានប្រជាពលរដ្ឋបង្ហោះពេញហ្វេប៊ុកនោះ ត្រូវបានសមត្ថកិច្ចកោះហៅមកធ្វើកិច្ចសន្យានិងដាក់ពិន័យទៅតាមរដ្ឋបាលហើយ នៅព្រឹកថ្ងៃទី១៥ ខែមេសា ឆ្នាំ២០២១នេះ។

ការកោះហៅមន្ត្រីរូបនោះចូលខ្លួនមកធ្វើកិច្ចសន្យា និងបានធ្វើការព្រមានអំពីទង្វើខុសឆ្គងនេះ ធ្វើឡើងបន្ទាប់ពី ក្រុមការងារព័ត៌មាន និងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញ ទទួលបានព័ត៌មាន និងបានឃើញការបង្ហោះព័ត៌មានពាក់ព័ន្ធទៅនឹងការចោទប្រកាន់លើមន្ត្រីនគរបាលមួយរូប ដែលបានដឹកប្រពន្ធចេញចូលអំឡុងពេលដែលតំបន់ភូមិទ្រុងមាន់ សង្កាត់អូបែកក្អម ខណ្ឌសែនសុខ ត្រូវបានរដ្ឋបាលរាជធានីភ្នំពេញ ប្រកាសបិទខ្ទប់កាលពីថ្ងៃទី១០ ខែមេសា ឆ្នាំ២០២១ ។

បើយោងតាមសេចក្តីបំភ្លឺរបស់ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ នៅថ្ងៃទី១៥ មេសានេះ បានបញ្ជាក់ឲ្យដឹងថា បន្ទាប់ពីធ្វើការសាកសួរ និងស្រាវជ្រាវរួចរាល់ ពាក់ព័ន្ធទៅនឹងករណីនេះ ស្នងការដ្ឋាននគរបាលរាជធានីភ្នំពេញ បានធ្វើការកោះហៅមន្ត្រីរូបនោះ ចូលខ្លួនមកធ្វើកិច្ចសន្យា និងបានធ្វើការព្រមានអំពីទង្វើខុសឆ្គងនេះ។

សេចក្តីបំភ្លឺរបស់ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ បានបន្តថា«បើទោះបីមន្ត្រីរូបនោះមានភារកិច្ចនិងសិទ្ធិក្នុងការបំពេញការងារនៅតំបន់បិទខ្ទប់ក៏ពិតមែន តែការអនុញ្ញាតឲ្យក្រុមគ្រួសារជិះមធ្យោបាយធ្វើដំណើរជាមួយចេញ ចូលក្នុងតំបន់បិទខ្ទប់ គឺពិតជាមានការខុសឆ្គងពិតប្រាកដមែន »។ ពាក់ព័ន្ធទៅនឹងកំហុសឆ្គងនេះ ក្រុមប្រឹក្សាវិន័យនឹងអនុវត្តនូវវិធានការ ចំពោះមន្ត្រីរូបជាថ្មីម្តងទៀត។

ជាមួយគ្នានេះ ស្នងការដ្ឋាននគរបាលរាជធានីភ្នំពេញ សូមអរគុណចំពោះការចូលរួមផ្តល់ព័ត៌មាន ដែលជាចំណែកមួយមិនអាចខ្វះបានដើម្បីកែលម្អ និងចូលរួមគ្នាដើម្បីបង្ការ និងទប់ស្កាត់ការឆ្លងរាល ដាលវីរុសកូវីដ១៩ តាមការណែនាំរបស់រាជរដ្ឋាភិបាល ក៏ដូចជាក្រសួងសុខាភិបាល៕

អត្ថបទ៖ សំអឿន

សូមចុចអាន៖ បុរសរត់ម៉ូតូកង់បីម្នាក់ឆ្លងកូវីដ១៩ ធ្លាប់ទៅផឹកកាហ្វេ និងជល់មាន់ នៅភូមិគៀត ខេត្តតាកែវ