ស្ថានភាពកូវីដមិនទាន់គ្រប់គ្រងបាន ឡាវ សម្រេចបន្តបិទខ្ទប់ប្រទេស

រដ្ឋាភិបាលប្រទេសឡាវ បានសម្រេចចិត្តបន្ថែមការបិទខ្ទប់ទូទាំងប្រទេស រហូតដល់ថ្ងៃទី ១៨ ខែសីហា ខណៈករណីឆ្លងជំងឺកូវីដ ១៩ នៅតែបន្តកើនឡើង ។

អនុប្រធានទីស្តីការគណៈរដ្ឋមន្រ្តីលោក Thipphakone Chanthavongsa បានប្រាប់សន្និសីទសារព័ត៌មានមួយនៅរដ្ឋធានីវៀងចន្ទន៍ ប្រទេសឡាវនៅថ្ងៃអង្គារនេះថា ការបិទខ្ទប់ប្រទេសនឹងត្រូវពង្រីង ដោយសារស្ថានភាពជំងឺកូវីដ ១៩ នៅឡាវ មិនទាន់ត្រូវបានគ្រប់គ្រងទាំងស្រុងនៅឡើយទេ ហើយស្ថានភាពនៅក្នុងប្រទេសជិតខាង ក៏នៅតែប្រថុយប្រថាន ។

ការបិទខ្ទប់ទូទាំងប្រទេសនាពេលបច្ចុប្បន្ន ដែលបានដាក់កាលពីថ្ងៃទី ១៩ ខែកក្កដា គឺនឹងផុតកំណត់នៅថ្ងៃអង្គារនេះ ។

ទន្ទឹមនោះ គណៈកម្មាធិការក្រុមការងារជាតិ ដើម្បីបង្ការ និងត្រួតពិនិត្យជំងឺកូវីដ ១៩ នៅថ្ងៃអង្គារនេះ បានរាយការណ៍ករណីនាំចូលថ្មីចំនួន ២៣៧ ករណី និងករណីឆ្លងក្នុងសហគមន៍ចំនួន ១៣ ករណី ។

ក្នុងចំណោមករណីនាំចូលទាំងនោះ មាន ៧៨ ករណីត្រូវបានរាយការណ៍នៅរដ្ឋធានីវៀងចន្ទន៍, ៦៣ ករណីនៅខេត្ត Savannakhet, ខេត្ត Champasak ៤៨ ករណី, ខេត្ត Khammuan ៣០ ករណី, ខេត្ត Saravan ១៦ ករណី និង ២ ករណីនៅខេត្តវៀងចន្ទន៍ ។

គួរបញ្ជាក់ថា គិតត្រឹមថ្ងៃអង្គារនេះចំនួនករណីឆ្លងជំងឺកូវីដ ១៩ នៅប្រទេសឡាវបានកើនដល់ ៧,០១៥ ករណី និងស្លាប់ ៧ នាក់ ខណៈអ្នកជំងឺសរុបចំនួន ៣,៦១៦ នាក់បានជាសះស្បើយ និងត្រូវបានអនុញ្ញាតឲ្យចេញពីមន្ទីរពេទ្យ ៕

ប្រែសម្រួលដោយ ៖ ជីវ័ន្ត

ប្រភព ៖ XINHUA

ចុចអាន ៖ ឡាវ រកឃើញករណីឆ្លងកូវីដប្រចាំថ្ងៃច្រើនបំផុតមិនធ្លាប់មាន