វេទិកា​សហគ្រិន​កំពូល​ ឆ្នាំ២០២៥ បើក​ឱកាស​ឱ្យ​អ្នករកស៊ីជួបជុំគ្នា​ កំណត់ទិសដៅ​ធុរកិច្ច​

លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជានៅព្រឹកថ្ងៃទី ​២១ ខែវិច្ឆិកា ឆ្នាំ ២០២៥​ ​បានអញ្ជើញជាអធិបតីក្នុងពិធីបើក វេទិកាសហគ្រិនកំពូល ឆ្នាំ២០២៥ (PEF) ក្រោម​ប្រធានបទ «ពិភពលោករីកចម្រើននៅពេលយើងសហការគ្នា៖ ជំរុញធុរកិច្ច, ឌីជីថល, និងនវានុវត្តន៍​នៅក្នុងអាស៊ាន» និងកម្មវីធីប្រគល់ពានរង្វាន់បណ្តាញសហគ្រិនស្ត្រីឆ្នើមអាស៊ាន ឆ្នាំ២០២៥។​

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

​វេទិកាសហគ្រិនកំពូល (PEF) គឺជាវេទិកាធុរកិច្ចថ្នាក់តំបន់មួយ ​ដែលបានចាប់ផ្តើម​ដំណើរការ​លើក​ដំបូងកាលពីឆ្នាំ​២០២៤ នៅក្នុងរាជធានីភ្នំពេញ ជាមួយ​នឹង​ចក្ខុវិស័យ​ក្នុងការប្រែក្លាយខ្លួនទៅជាវេទិកាដ៏មានឥទ្ធិពល និងឈានមុខគេមួយនៅក្នុងអាស៊ាន សម្រាប់ថ្នាក់ដឹកនាំធុរកិច្ចដែលមានទស្សនៈវិស័យវែងឆ្ងាយ អ្នកបង្កើតនវានុវត្តន៍ និងសហគ្រិន​អាច​ជួបជុំគ្នាដើម្បីកំណត់ទិសដៅធុរកិច្ចសម្រាប់អនាគត។ ​

​ក្រៅពីការជំរុញកិច្ចសន្ទនាកម្រិតខ្ពស់ វេទិកាសហគ្រិនកំពូល​ បានប្តេជ្ញាជំរុញលទ្ធផលជាក់ស្តែង តាមរយៈការបង្កើត​ភាពជាដៃគូឆ្លងព្រំដែន ការបើកឱកាសវិនិយោគ និងការតស៊ូមតិលើ​គោល​នយោ​បាយនានា ដែល​ផ្តល់គុណប្រយោជន៍ដល់សហគ្រិន ដោយមិនត្រឹមតែភ្ជាប់បណ្តាញ​ក្នុងសមាគម​អាស៊ានប៉ុណ្ណោះទេ ថែមទាំងតភ្ជាប់ទៅកាន់ទីផ្សារសកល។​

កម្មវិធីប្រគល់ពានរង្វាន់បណ្តាញសហគ្រិនស្ត្រីឆ្នើមអាស៊ាន (AWEN) គឺជាការទទួលស្គាល់ដ៏មានកិត្យានុភាព ដែលបង្ហាញនូវ​ការសាទរ​ចំពោះសមិទ្ធផល និងការរួមចំណែកដ៏ឆ្នើមរបស់សហគ្រិនស្ត្រី នៅទូទាំងតំបន់អាស៊ាន។

​ពានរង្វាន់នេះបានគូសបញ្ជាក់ពីភាពធន់ នវានុវត្តន៍ និងភាពជាអ្នកដឹកនាំរបស់ស្ត្រី ដែលមាន​ឥទ្ធិពល​យ៉ាងខ្លាំងក្លានៅក្នុងឧស្សាហកម្ម និងសហគមន៍របស់ពួកគេ ជាមួយនឹងគោលបំណង​បំផុសគំនិតដល់អ្នកដឹកនាំស្ត្រីជំនាន់ក្រោយ និងជំរុញប្រព័ន្ធអេកូឡូស៊ីដែលគាំទ្រដល់​ស្ត្រីក្នុង​វិស័យធុរកិច្ច។

កម្មវិធីប្រគល់ពានរង្វាន់នេះ ដែលបានរៀបចំឡើងជាផ្នែកមួយនៃ PEF បាន​បញ្ជាក់​យ៉ាងច្បាស់អំពីសារៈសំខាន់នៃសមភាពយេនឌ័រ និងការពង្រឹងអំណាចស្ត្រី ក្នុងការជំរុញកំណើន​សេដ្ឋកិច្ច និងកិច្ចសហប្រតិបត្តិការនៅក្នុងតំបន់ផង​ដែរ។

លោកឧបនាយករដ្ឋមន្ត្រី បានធ្វើការកត់សម្គាល់លើចំណុចសំខាន់ចំនួន ៤ ដែលមានឥទ្ធិពលធ្វើឱ្យវិសាលភាពនៃ PEF កាន់តែមានភាពទូលំទូលាយ ក្នុងនោះរួមមាន៖ ១. ការបង្កើតបណ្តាញទំនាក់ទំនងឆ្លងព្រំដែន, ២. ការគាំទ្រសហគ្រិនស្ត្រីក្នុងទ្រង់ទ្រាយធំ, ៣. ការលើកកម្ពស់នវានុវត្តន៍ និងបច្ចេកវិទ្យាប្រកបដោយបរិយាប័ន្ន, និង៤. ការលើកកម្ពស់អាជីវកម្ម ប្រកបដោយនិរន្តរភាព និងការជំរុញឥទ្ធិពលអាជីវកម្មឱ្យកាន់តែរឹងមាំ។

លោកឧបនាយករដ្ឋមន្ត្រី បានលើកយកសុភាសិតខ្មែរមួយឃ្លាថា៖ «ដើមឈើតែមួយដើម មិនអាចបង្កើតជាព្រៃបានទេ» ដើម្បីឆ្លុះបញ្ចាំងឱ្យឃើញពីស្មារតីនៃកិច្ចសហការ និងកំណើនដែលគ្រប់គ្នាត្រូវការ។

លោកឧបនាយករដ្ឋមន្ត្រីបន្ថែមថា ការពង្រីកវិសាលភាពនៃការផ្លាស់ប្តូរប្រកបដោយអត្ថន័យ ទាមទារឱ្យមានការខិតខំប្រឹង​ប្រែងរួមគ្នា ដោយគ្មានសហគ្រិនណាម្នាក់អាចធ្វើតែឯងបានឡើយ គឺមានតែការរួបរួមសហការ ភាពជាដៃគូ និងការគាំទ្រគ្នាទៅវិញទៅមកប៉ុណ្ណោះ ទើបយើងអាចពង្រីកឥទ្ធិពលនៃវេទិកាមួយនេះបានយ៉ាងពិតប្រាកដ៕