ព័ត៌មានអន្ដរជាតិ

អ្នកស្រុកហាតយ៉ៃស្រែកគំហកដាក់លោក អានុទីន ពេលជិះរថយន្តដើរមើលស្ថានភាពទឹកជំនន់

បានផុស

៧ ខែ មុន

នៅ

ថ្ងៃសៅរ៍ ២៩ វិច្ឆិកា ២០២៥

ដោយ

នាយករដ្ឋមន្ត្រីថៃ លោក អានុទីន ឆានវីរៈគុល រងការរិះគន់យ៉ាងចាស់ដៃ អំឡុងពេលធ្វើដំណើរទៅកាន់ទីក្រុងហាតយ៉ៃ (Hat Yai) លើកទី៤ ដើម្បីត្រួតពិនិត្យស្ថានភាពទឹកជំនន់ដ៏សាហាវដែលបណ្តាលមនុស្សស្លាប់ជាង១០០នាក់ និងបណ្តាលឲ្យខូចខាតហេដ្ឋរចនាសម្ព័ន្ធយ៉ាងខ្លាំង។

លោកអានុទីន ធ្វើដំណើរទៅកាន់ទីក្រុងហាតយ៉ៃលើកទី៤។ Standard

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមឃ្លីបវីដេអូខ្លីដែលផ្សព្វផ្សាយដោយបណ្តាញសារព័ត៌មានថៃ Thai Enquirer នៅថ្ងៃទី២៩ខែវិច្ឆិកានេះ លោកអានុទីន បានធ្វើដំណើរទៅកាន់ទីក្រុងហាតយ៉ៃលើកទី៤ ដោយការជិះរថយន្តទ្រុង ស្រាប់តែពេលនោះ អ្នកស្រុកហាតយ៉ៃដែលជិះម៉ូតូ និងខឹងសម្បា បានមកស្រែកគំហកដាក់លោក អានុទីន ដោយសំឡេងខ្លាំងៗ និង មិនទុកមុខទុកមាត់ឲ្យក្នុងនាមគាត់ជានាយករដ្ឋមន្ត្រីឡើយ។

តាមការដកស្រង់មកចុះផ្សាយរបស់សារព័ត៌មានខាងលើ អ្នកជិះម៉ូតូម្នាក់ បានស្រែកទៅកាន់នាយករដ្ឋមន្ត្រី អានុទីន ថា៖«ប្រជាជនកំពុងរងទុក្ខ លោកនាយករដ្ឋមន្ត្រី! កុំជិះរថយន្ត ត្រូវចុះដើរ ពីព្រោះថា បើសិនខ្ញុំជានាយករដ្ឋមន្ត្រីវិញ ខ្ញុំនឹងចុះដើរភ្លាម»។

ក្នុងអំឡុងពេលនោះ នាយករដ្ឋមន្ត្រី អានុទីន បានឆ្លើយតបទៅវិញថា «បាទៗ»។

ក្រោយរងទឹកជំនន់ប្រមាណ១សប្តាហ៍ចាប់តាំងពីរសប្តាហ៍មុនមក តំបន់ភាគខាងត្បូងថៃបានរងផលប៉ះពាល់យ៉ាងខ្លាំង ជាពិសេសទីក្រុងហាតយ៉ៃ ដែលត្រូវបានគេរាយការណ៍ថា កម្ពស់ទឹកភ្លៀងនោះមានរហូតដល់២ម៉ែត្រ ដែលធ្វើឲ្យជន់លិចយ៉ាងខ្លាំងមិនធ្លាប់ជួបក្នុងរយៈពេល៣០០ឆ្នាំ។

ដោយសារតែមើលឃើញនូវវិធានការរបស់រដ្ឋាភិបាលកណ្តាលគ្មានប្រសិទ្ធភាពក្នុងការជួយប្រជាជនដោះស្រាយក្នុងពេលរងទឹកជំនន់ ការរិះគន់ចំពោះលោកអានុទីន បានកើនឡើងយ៉ាងខ្លាំង រហូតដល់មានការស្នើឲ្យលោកចុះចេញពីអំណាចទៀតផង។

ក្រោយទឹកចាប់ផ្តើមស្រកនៅថ្ងៃទី២៨ខែវិច្ឆិកា និង រងសម្ពាធកាន់តែច្រើនឡើងៗឲ្យលោកចុះចេញពីអំណាច លោក អានុទីន នៅល្ងាចថ្ងៃទី២៨ខែវិច្ឆិកា បានចេញសារសុំទោសប្រជាពលរដ្ឋថៃ ហើយ ក្នុងអំឡុងពេលនៃដំណើរទស្សនកិច្ចលើកទី៤របស់លោកទៅកាន់ទីក្រុងហាតយ៉ៃ ក៏ត្រូវរងការមើលស្រាលពីប្រជាជនដែលខឹងសម្បារនៅទីក្រុងហាតយ៉ៃទៀត៕

រ៉ាន់ រើយ