ព័ត៌មានជាតិ

នាយករដ្ឋមន្ត្រីស្នើពលរដ្ឋទុកចិត្តលើការបំពេញការងាររបស់មន្ត្រីជំនាញព្រំដែនកម្ពុជា

បានផុស

៥ ខែ មុន

នៅ

ថ្ងៃអាទិត្យ ៣០ វិច្ឆិកា ២០២៥

ដោយ

នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត ស្នើសុំឱ្យពលរដ្ឋស្ដាប់ការបកស្រាយរបស់មន្ត្រីជំនាញនៃរដ្ឋលេខាធិការកិច្ចការព្រំដែនកម្ពុជា និងទុកចិត្តលើការខិតខំរបស់ពួកគេ និងរដ្ឋាភិបាលលើការការពារអធិបតេយ្យបូរណភាពទឹកដីកម្ពុជា។

លើទំព័រហ្វេសបុកផ្ទាល់ខ្លួននៅព្រឹកថ្ងៃទី៣០ ខែវិច្ឆិកានេះ សម្ដេចធិបតី ហ៊ុន ម៉ាណែត បានបង្ហោះវីដេអូពីការបកស្រាយរបស់មន្ត្រីជំនាញរបស់រដ្ឋលេខាធិការដ្ឋានកិច្ចការព្រំដែនជាមួយនឹងសារបង្ហោះស្នើសុំឱ្យពលរដ្ឋស្ដាប់ការបកស្រាយរបស់មន្ត្រីជំនាញលើការចុះវាស់វែង និងបោះបង្គោលព្រំដែនបណ្ដោះអាសន្នបង្គោលលេខ ៤២-៤៧ នៅខេត្តបន្ទាយមានជ័យ និងពី៥២-៥៩ នៅខេត្តបាត់ដំបង។

សម្ដេចបានសរសេរថា៖ «ខ្ញុំសង្ឃឹមថាការបកស្រាយពន្យល់នេះ នឹងផ្តល់នូវភាពកក់ក្តៅ និងជំនឿទុកចិត្តលើការខិតខំប្រឹងប្រែងបំពេញភារកិច្ចដោយម៉ត់ចត់និងប្រកបដោយការទទួលខុសត្រូវខ្ពស់របស់មន្ត្រីជំនាញព្រំដែនកម្ពុជា ក៏ដូចជារាជរដ្ឋាភិបាលកម្ពុជា ក្នុងការការពារអធិបតេយ្យនិងបូរណភាពទឹកដីរបស់យើងដោយជានិច្ចកាលតែងតែតម្កល់នូវឧត្តមប្រយោជន៍ជាតិនិងប្រជាជនជាធំ»។

ក្នុងវីដេអូបានមានរយៈពេល៤៣នាទី៥៧វិនាទី មន្ត្រីជាន់ខ្ពស់មកពីរដ្ឋលេខាធិការដ្ឋានកិច្ចការព្រំដែន ៣រូប បានបកស្រាយពីដំណើរការវាស់វែង និងបោះបង្គោលបណ្ដោះអាសន្នលើកំណាត់ព្រំដែនខាងលើ ដោយបានបញ្ជាក់ថាការងារដែលសម្រេចបាននៅពេលបច្ចុប្បន្ននេះគឺកម្ពុជាថៃបានធ្វើរួមគ្នាតាំងពីឆ្នាំ២០០៦មកម្លេះ។ ឈរលើមូលដ្ឋាននៃឯកសារគតិយុត្តដែលបន្សល់ទុកពីអាណាព្យាបាលបារាំង ជាពិសេសកំណត់ហេតុបោះបង្គោលរបស់គណៈកម្មការកំណត់ព្រំដែនរវាងឥណ្ឌូចិន-សៀម ឆ្នាំ១៩០៨-១៩០៩ និងគណៈកម្មការបោះបង្គោលព្រំដែនរវាងឥណ្ឌូចិន-សៀម ឆ្នាំ១៩១៩-១៩២០ និងស្របតាមខ្លឹមសារនៃអនុស្សរណៈនៃការយោគយល់គ្នា( MOU) ឆ្នាំ២០០០, បែបបទការងារ (TOR)ឆ្នាំ២០០៣៕

អត្ថបទដោយ ហ៊ុន សិរីវឌ្ឍន៍