ឥណ្ឌូណេស៊ី៖ កោះស៊ូម៉ាត្រាត្រូវ​ការ​ជាង​៣ពាន់លានដុល្លារ ដើម្បីកសាងឡើងវិញក្រោយទឹកជំនន់

រដ្ឋាភិបាលឥណ្ឌូណេស៊ី បាន​ឲ្យ​ដឹង​នៅ​ថ្ងៃ​ចន្ទ​ទី​៨​ខែ​ធ្នូ​ឆ្នាំ​២០២៥​នេះ​ថា កោះស៊ូម៉ាត្រា នឹងត្រូវការមូលនិធិសម្រាប់ការកសាង​ឡើងវិញចំនួន​ ៥១៨២​ទ្រីលានរូពី (ប្រហែល៣,១​​ពាន់លានដុល្លារ) បន្ទាប់ពី​ត្រូវ​ទឹកជំនន់ដ៏សាហាវ​​បំផ្លិចបំផ្លាញ។

យោង​តាម​ Asia One ចំនួនអ្នកស្លាប់ដោយសារទឹកជំនន់ និងការបាក់ដីដែលបង្កឡើងដោយព្យុះស៊ីក្លូន បានកើនឡើងដល់​៩៥០​នាក់ ខណៈ​២៧៤​នាក់ទៀតនៅតែបាត់ខ្លួន។ នេះបើយោងតាមទិន្នន័យរបស់ទីភ្នាក់ងារគ្រោះមហន្តរាយជាតិ។ ព្យុះដដែលនេះក៏បានសម្លាប់មនុស្សប្រហែល២០០​នាក់នៅភាគខាងត្បូងប្រទេសថៃ និងម៉ាឡេស៊ីផងដែរ។

លោក Suharyanto ប្រធានទីភ្នាក់ងារកាត់បន្ថយគ្រោះមហន្តរាយរបស់ឥណ្ឌូណេស៊ី បាន​ប្រាប់​ថា ការប៉ាន់ប្រមាណបច្ចុប្បន្នគ្របដណ្តប់លើខេត្តដែលរងផលប៉ះពាល់ធ្ងន់ធ្ងរបំផុតចំនួន៣ ដូចជា Aceh, ស៊ូម៉ាត្រាខាងជើង និងស៊ូម៉ាត្រាខាងលិច ប៉ុន្តែបានព្រមានថា តួលេខនេះអាចកើនឡើងនៅពេលដែលការវាយតម្លៃការខូចខាតនៅតែបន្ត។

លោកបានប្រាប់កិច្ចប្រជុំគណៈរដ្ឋមន្ត្រី​ដែលដឹកនាំដោយប្រធានាធិបតី លោក Prabowo Subianto នៅខេត្ត Aceh កាលពីយប់ថ្ងៃអាទិត្យថា ខេត្ត​ Aceh តែឯងនឹងត្រូវការ​២៥,៤១​ទ្រីលានរូពី ដែលជាចំណែកដ៏ធំបំផុតនៃចំនួនសរុប។ ខេត្តស៊ូម៉ាត្រាខាងជើងត្រូវការ​១២,៨៨​ទ្រីលានរូពី ខណៈស៊ូម៉ាត្រាខាងលិចត្រូវការ​១៣,៥២​ទ្រីលានរូពី។

លោកបាន​បន្ថែម​ថា តំបន់ខ្លះនៅស៊ូម៉ាត្រាខាងជើង និងស៊ូម៉ាត្រាខាងលិច បានមានស្ថិរភាពគ្រប់គ្រាន់ដើម្បីចាប់ផ្តើមការកសាងឡើងវិញ។ លោក Suharyanto បាន​លើក​ឡើង​ថា «តំបន់ដែលស្ថិតក្នុងស្ថានភាពល្អប្រសើររួចហើយអាចចាប់ផ្តើមដំណើរការកសាងឡើងវិញបាន។ យើងនឹងផ្លាស់ប្តូរទីលំនៅរបស់ប្រជាជនដែលរស់នៅក្នុងមជ្ឈមណ្ឌលជម្លៀស ទៅកាន់ផ្ទះបណ្តោះអាសន្ន»។

ជម្រក​បណ្តោះអាសន្នគឺជាសំណង់បន្ទះឈើទំហំ​៤០​ម៉ែត្រការ៉េដែលត្រូវបានសាងសង់សម្រាប់សហគមន៍ ដែលរងគ្រោះដោយសារគ្រោះមហន្តរាយ។ លោកបានបន្ថែមថា «នៅក្នុងដំណាក់កាលបន្ទាប់ ពួកគេនឹងត្រូវបានផ្លាស់ប្តូរទីលំនៅទៅក្នុងផ្ទះអចិន្ត្រៃយ៍ដែលសាងសង់ដោយក្រសួងលំនៅឋាន»៕

ប្រែសម្រួល៖ ឈាង