ថៃបញ្ជាក់ការមិនបិទឈូងសមុទ្រថៃ ​និងមិនប៉ះពាល់នាវាបរទេស​

ក្រសួងការបរទេសថៃ និងកងទ័ពជើងទឹកភូមិន្ទថៃ បានទទូចថា ខ្លួន​មិនមានវិធានការណាមួយដើម្បី «បិទ» ឈូងសមុទ្រថៃទេ ដោយនិយាយថា ទីក្រុងបាងកកនៅតែប្តេជ្ញាចិត្តចំពោះអនុសញ្ញាអង្គការសហប្រជាជាតិស្តីពីច្បាប់សមុទ្រ (UNCLOS) និងសេរីភាពនៃការធ្វើនាវាចរណ៍។ នេះបើតាមការចុះផ្សាយរបស់កាសែត The Nation។

ការបញ្ជាក់បែបនេះ ក្រោយ​មាន​សេចក្ដីរាយការណ៍ថា កងទ័ពជើងទឹកថៃមាន​គម្រោងបិទឈូងសមុទ្រថៃកាលពីអាទិត្យ ដើម្បីកាត់ផ្ដាច់ទំនិញយុទ្ធសាស្រ្តមកកម្ពុជា ដែលបង្កើនការរិះគន់ថាថៃអាចរំលោភលើច្បាប់សមុទ្រអន្តរជាតិ ច្បាប់មនុស្សធម៌អន្តរជាតិ និងបង្កើនកម្ដៅនៃភាពតានតឹង ដែលថៃ​រងការចោទប្រកាន់ពីឧក្រិដ្ឋកម្មសង្រ្គាមប្រឆាំងកម្ពុជា​រួចស្រាប់ទៅហើយ​។

ថ្លែង​ក្នុងសន្និសីទ​​សារព័ត៌មានរួមស្តីពីស្ថានភាពព្រំដែនថៃ-កម្ពុជា ​កាលពីថ្ងៃចន្ទ (១៥ ធ្នូ) ​លោកស្រី Maratee Nalita Andamo អ្នកនាំពាក្យរងក្រសួងការបរទេសថៃ ​បានឱ្យដឹងថា ថៃមិនចង់បង្កើនភាពតានតឹងនោះទេ ប៉ុន្តែនឹង​បង្កើនការត្រួតពិនិត្យលើនាវាបំពាក់ទង់់់ជាតិថៃ ដើម្បីកុំឱ្យនាំទំនិញយុទ្ធសាស្រ្តមកកម្ពុជា។

លោកស្រីបាន​បន្តថា ​ថៃកំពុងធ្វើសកម្មភាពស្របតាមគោលការណ៍មនុស្សធម៌ និងច្បាប់អន្តរជាតិ ដោយសង្កត់ធ្ងន់លើ UNCLOS (ឆ្នាំ ១៩៨២) និងតម្រូវការ​រក្សាសេរីភាពនៃការធ្វើនាវាចរណ៍ ដើម្បីកុំឱ្យរំខានដល់ពាណិជ្ជកម្ម ការដឹកជញ្ជូន ឬខ្សែច្រវ៉ាក់ផ្គត់ផ្គង់ រួមទាំងសម្រាប់ប្រទេសទី៣ផងដែរ។ ​នេះមាន​ន័យថា ថៃមិនប៉ះពាល់ដល់នាវាបរទេសនោះទេ។

លោក ប៉ារ៉ាច រតនាឆៃយ៉ាផាន (Parach Rattanachaiyapan) អ្នកនាំពាក្យកងទ័ពជើងទឹក ឯណោះវិញ ក៏បាននិយាយផងដែរថា មិនមានការបិទផ្លូវទឹក និងគ្មានការបិទដែនទឹកថៃទេ ដោយបន្ថែមថា ចេតនារបស់កងទ័ពជើងទឹកគឺកាត់បន្ថយភស្តុភារ និងការផ្គត់ផ្គង់ជាយុទ្ធសាស្ត្រ​មកកម្ពុជា ខណៈ​គោរពតាមការរំពឹងទុករបស់អន្តរជាតិ។

គួរគូសបញ្ជាក់ថា ​ក្រោយ​មាន​ការព្រមាន​បិទឈូងសមុទ្រថៃ​ លោក ផន រឹម អ្នកនាំពាក្យ​ក្រសួងសាធារណការ ​និង​ដឹកជញ្ជូនកម្ពុជា ​មានប្រសាសន៍ថា ​កម្ពុជាមានច្រកដឹកទំនិញតាមសមុទ្រចម្រុះ និងប្រទាក់ក្រឡា ដែលមានសក្តានុពល និងធានាបាននូវឯករាជ្យភាព និងម្ចាស់ការលើគ្រប់ទម្រង់ ស្របតាមច្បាប់ និងវិធានអន្តរជាតិ៕