កីឡា

ព្រះខ័នរាជស្វាយរៀង បន្តរឹងមាំលើកំពូលតារាង ខណៈ បឹងកេត ធ្លាក់មកលេខ ៤

បានផុស

៣ ខែ មុន

នៅ

ថ្ងៃចន្ទ ១៩ មករា ២០២៦

ដោយ

ព្រះខ័នរាជស្វាយរៀង បានយកឈ្នះ ភ្នំពេញក្រោន ដោយលទ្ធផល ៣-២ សម្រាប់ការប្រកួតសប្តាហ៍ទី១៦ នៃលីគបាល់ទាត់កំពូលកម្ពុជា នាថ្ងៃទី១៨ ខែមករា ឆ្នាំ ២០២៦ នៅកីឡដ្ឋានភ្នំពេញក្រោន។

ការប្រកួតដ៏ជក់ចិត្តក្រោមក្រសែភ្នែកអ្នកទស្សនាផ្ទាល់ចំនួន ៥០៤០នាក់ ភ្នំពេញក្រោន បានបើកការនាំមុខ ២-០ យ៉ាងលឿនដោយកីឡាករ Dyer Moses John នៅនាទីទី ១៩ ដោយការស៊ុតប៉េណាល់ទី និងកីឡាករ Andres Neito នៅនាទីទី២១។ ទោះបីជាយ៉ាងណា ចុងវគ្គទី១ កីឡាករ Kwame Peprah រកបានគ្រាប់បាល់តាមស្មើ ២-២ នៅនាទី៤០ និងនាទី៤៥+៤។ ចូលវគ្គទី២ Kwame ដដែលរកបានគ្រាប់បាល់ជ័យជម្នះនៅនាទី៥៩។ ក្រោយមកការប្រកួតយ៉ាងស្វិតស្វាញ និងឡើងកម្តៅនៅចុងម៉ោង ប៉ុន្តែគ្មានគ្រាប់បាល់កើតឡើងទៀតទេ។

តាមរយៈជ័យជម្នះនេះបានធ្វើឲ្យ ព្រះខ័នរាជស្វាយរៀង កាន់តែរឹងមាំក្នុងការគ្រប់គ្រងកំពូលតារាងដោយមាន ៣៩ពិន្ទុ ពីការឈ្នះ ១៣ លើក និងចាញ់ ៣ លើក ដែលនាំមុខ ៥ ពិន្ទុលើគូប្រជែងលេខ២ ភ្នំពេញក្រោន ដែលមាន ៣៤ពិន្ទុ ពីការឈ្នះ ១០ ស្មើ ៤ និងចាញ់ ១។ ទោះបីជាយ៉ាងណា ភ្នំពេញក្រោន នៅសល់ ១ ប្រកួតក្នុងដៃទៀត។

ក្រុមដែលគួរឲ្យចាប់អារម្មណ៍នោះគឺ ណាហ្គាវើលដ៍ ស្ងាត់ៗបានឡើងទៅដល់ចំណាត់ថ្នាក់លេខ៣ បន្ទាប់ពី ៥ ប្រកួតចុងក្រោយមិនទាន់បរាជ័យសោះ។ ពួកគបានឈ្នះកងយោធពលខមេរភូមិន្ទ ២-០, ស្មើ អាយអេសអាយ ដង្កោសែនជ័យ ១-១, ឈ្នះ អឹមអូអាយ កំពង់ដេវ៉ា ៣-០, ឈ្នះ អង្គរថាយហ្គឺរ ២-១ និងសប្តាហ៍ទី១៦ ឈ្នះគិរីវង់សុខសែនជ័យ ៣-១។ ឥឡូវនេះ ពួកគេឈ្នះ ៨ ស្មើ ៤ និង ចាញ់ ៤ មាន ២៨ពិន្ទុ។

ដោយឡែក ក្រុមដែលកំពុងទទួលបានការចាប់អារម្មណ៍ពីអ្នកគាំទ្រ គឺ បឹងកេត បានធ្លាក់ទៅលេខ ៤ វិញ បន្ទាប់ពីបានចាញ់ អឹមអូអាយ កំពង់ដេវ៉ា ដោយលទ្ធផល ១-០ ក្នុងសប្តាហ៍ទី១៦។ ៣ប្រកួតមុន ពួកគេបានយកឈ្នះ ព្រះខ័នរាជស្វាយរៀង ២-១, ឈ្នះ កងយោធពលខេមរភូមិន្ទ ៦-០ និងឈ្នះ អាយអេសអាយ ដង្កោសែនជ័យ ៣-១ ប៉ុន្តែចុងក្រោយចាញ់ អឹមអូអាយ កំពុងដេវ៉ា ដែលធ្វើឲ្យពួកគេ ឈ្នះ ៨ ស្មើ ៤ និង ចាញ់ ៤ មាន ២៨ ពិន្ទុ ឈរលេខ៤។

វិសាខា បានតាមទាន់ពិន្ទុ អង្គរថាយហ្គឺរ ហើយដោយមាន ២៤ពិន្ទុស្មើគ្នា ប៉ុន្តែឈរលេខ ៦ ដោយសារចាញ់គ្រាប់បាល់។ វិសាខា បានឈ្នះ ៣ ប្រកួតចុងក្រោយជាប់គ្នា ខណៈ អង្គរថាយហ្គឺរ រកមិនបានជ័យជម្នះសោះសម្រាប់ការប្រកួត ៥ លើកចុងក្រោយគឺ ស្មើ ២ និងចាញ់ ៣។