ព័ត៌មានអន្ដរជាតិ

អាមេរិកប្រាប់មូលហេតុ ដែលខ្លួនចង់បានកោះ Greenland

បានផុស

៥ ខែ មុន

នៅ

ថ្ងៃចន្ទ ១៩ មករា ២០២៦

ដោយ

«ភាពទន់ខ្សោយ» របស់ប្រទេសប៉ែកអឺរ៉ុបបណ្តាលឱ្យសហរដ្ឋអាមេរិកមានចិត្តចង់គ្រប់គ្រងលើកោះ Greenland សម្រាប់ស្ថិរភាពពិភពលោក។ នេះបើតាមរដ្ឋមន្ត្រីក្រសួងរតនាគារសហរដ្ឋអាមេរិក លោក Scott Bessent ដែលបានថ្លែងកាលពីថ្ងៃអាទិត្យ ថា ទោះបីជាសមាជិកសភាមួយចំនួនបានព្រមានចំពោះកិច្ចខិតខំប្រឹងប្រែងរបស់រដ្ឋបាល លោក ដូណាល់ ត្រាំ ដើម្បីទទួលបានទឹកដីនៅតំបន់អាកទិកដែលកាន់កាប់ដោយប្រទេសដាណឺម៉ាកក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងកម្មវិធីជួបជាមួយអ្នកសារព័ត៌មាន របស់ NBC លោក Bessent បាននិយាយថា៖ «ការកាន់កាប់កោះ Greenland គឺមានសារៈសំខាន់ណាស់ ក្នុងការប្រកួតកូនអុកភូមិសាស្ត្រនយោបាយជាមួយរុស្ស៊ី និងចិន»។

លោកបានធ្វើការកត់សម្គាល់មុនមួយថ្ងៃ បន្ទាប់ពីប្រធានាធិបតីអាមេរិក លោក ដូណាល់ ត្រាំ បានប្តេជ្ញាអនុវត្តពន្ធលើសមាជិកសហភាពអឺរ៉ុបប្រឆាំងនឹងការទិញយកកោះនេះ រួមទាំងប្រទេសដាណឺម៉ាក ដែលជាសម្ព័ន្ធមិត្តដ៏រឹងមាំបំផុតរបស់ទីក្រុងវ៉ាស៊ីនតោនក៏ដោយ។

លោក បានបន្ត៖«សហរដ្ឋអាមេរិកគឺជាប្រទេសខ្លាំងបំផុតនៅលើពិភពលោក ចំណែកបណ្តាប្រទេសអឺរ៉ុបគ្រាន់តែជាប្រទេសទន់ខ្សោយប៉ុណ្ណោះ។ ភាពខ្លាំងគឺនៅខាងអាមេរិក»។

តែយ៉ាងណា នៅពេលដែលមានភាពតានតឹងជាមួយសហភាពអឺរ៉ុបបានកើនឡើងកាលពីថ្ងៃអាទិត្យ លោក Bessent បាននិយាយថា៖«ខ្ញុំជឿថាមេដឹកនាំអឺរ៉ុបនឹងមកគាំទ្រគំនិតរបស់សហរដ្ឋអាមេរិកនៃការគ្រប់គ្រងលើកោះ Greenland នៅថ្ងៃណាមួយ ហើយខ្ញុំជឿថា ប្រជាជនអឺរ៉ុបនឹងយល់ថា ការធ្វើបែបនេះ គឺល្អបំផុតសម្រាប់ Greenland ខ្លួនឯង ល្អបំផុតសម្រាប់ប្រទេសអឺរ៉ុប និងសម្រាប់សហរដ្ឋអាមេរិកផងដែរ»។

បើតាមរ៉យទ័រ ប្រធានរតនាគារសហរដ្ឋអាមេរិកបានលើកឡើងថា ថ្មីៗនេះលោកមិនទាន់បានពិភាក្សាជាមួយលោក ត្រាំ នៅឡើយ ថានៅតែពិចារណាលើការប្រើប្រាស់អំណាចដោយបង្ខំណាមួយ ដើម្បីបង្ហាញពីភាពត្រឹមត្រូវនៃការប្រើប្រាស់កម្លាំងក្នុងការដណ្តើមយកកោះ Greenland ដែរឬយ៉ាងណា។

ទោះបីជាយ៉ាងណាក៏ដោយ សមាជិកព្រឹទ្ធសភា លោក Rand Paul មកពីគណបក្សសាធារណរដ្ឋនៃរដ្ឋ Kentucky របស់ព្រឹទ្ធសភាសហរដ្ឋអាមេរិកបានឆ្លើយតបថា៖ «ប៉ុន្តែការធ្វើបែបនេះ វានឹងក្លាយជារឿងគួរឱ្យអស់សំណើចណាស់ ពីព្រោះគ្មានភាពបង្ខំបន្ទាន់ណាមួយលើកោះ Greenland ឡើយ»។

លោកបន្តថា៖«គំនិតរបស់លេខាធិការរតនាគារ គឺដើម្បីការពារដោយអំណាចបន្ទាន់ណាមួយ! ប៉ុន្តែឥឡូវនេះយើងកំពុងប្រកាសអាសន្នដើម្បីការពារភាពអាសន្នឬ?»៕

ប្រែសម្រួល៖ ណឺ មិនា