កីឡា

ព្រះខ័នរាជស្វាយរៀង បន្តឈរកំពូលតារាងលីគកំពូលកម្ពុជា

បានផុស

៣ ខែ មុន

នៅ

ថ្ងៃចន្ទ ២៦ មករា ២០២៦

ដោយ

ការប្រកួតនៅលីគកំពូលកម្ពុជា រវាង ភ្នំពេញក្រោន និង ព្រះខ័នរាជស្វាយរៀង បានចំនួន ១៦ ប្រកួតស្មើគ្នាហើយ គិតត្រឹមសប្តាហ៍ទី១៧ ខែបញ្ចប់ទៅកាលពីថ្ងៃអាទិត្យ ទី២៥ ខែមករា ឆ្នាំ ២០២៦។

ភ្នំពេញក្រោន បានយកឈ្នះ គិរីវង់សុខសែនជ័យ ដោយលទ្ធផល ៣-១ នៅក្នុងសប្តាហ៍ទី១៧ ដើម្បីទទួលបាន ៣ ពិន្ទុបន្ថែម ដូច្នេះ ក្រុមមួយនេះមាន ៣៧ ពិន្ទុ កំពុងឈរលេខ ២ នៃតារាងលីគកំពូលកម្ពុជា បន្ទាប់ពីឈ្នះ ១១ ប្រកួត ស្មើ ៤ ប្រកួត និងចាញ់ ១ ប្រកួត។

ចំណែក ព្រះខ័នរាជស្វាយរៀង បានសម្រាកនៅក្នុងសប្តាហ៍ទី១៧ ប៉ុន្តែនៅតែបន្តឈរលើកំពូលតារាង ដោយមាន ៣៩ពិន្ទុ ពីការឈ្នះ ១៣ និងចាញ់ ៣។ ព្រះខ័នរាជស្វាយរៀង បាននាំមុខ គូប្រជែង ភ្នំពេញក្រោន ២ ពិន្ទុ។

ចំណែក ណាហ្គាវើលដ៍ និង វិសាខា នៅតែបន្តរកបានពិន្ទុបន្ថែមទៀត បន្ទាប់ពីក្រុមទាំងពីរស្មើគ្នា ១-១។ ណាហ្គាវើលដ៍បន្តលេខ ៣ ពីការឈ្នះ ៨ ស្មើ ៥ និងចាញ់ ៤ មាន ២៩ពិន្ទុ ដោយនាំមុខ ១ពិន្ទុលើក្រុមចំណាត់ថ្នាក់លេខ ៤ បឹងកេត ដែលបានចាញ់ ២ ប្រកួតជាប់គ្នាចុងក្រោយគឺ ចាញ់ អឹមអូអាយ កំពង់ដេវ៉ា ០-១ និងចាញ់ អង្គរថាយហ្គឺរ ០-១។ អង្គរថាយហ្គឺរ រកបានជ័យជម្នះវិញហើយ បន្ទាប់ពី៦ប្រកួតចុងក្រោយបានចាញ់ទាំងអស់។

ក្រុមកំពង់ដេវ៉ា បានឈ្នះ ២ ប្រកួតចុងក្រោយដើម្បីមាន ២៤ ពិន្ទុឈរលេខ ៧ ហើយជាក្រុមមានឱកាសក្នុងការប្រជែងយកក្រុមលំដាប់កំពូលទាំង ៦ ពីព្រោះពួកគេហាក់ធ្វើបានល្អមែនទែនពីការប្រកួតជាមួយក្រុមខ្លាំង។

គិរីវង់សុខសែនជ័យ មាន ១១ពិន្ទុ កំពុងឈរលេខ ៩ ពីការឈ្នះ ៣ ស្មើ២ និងចាញ់ ១១ ហើយឡាយហ្វ ព្រះសីហនុ ឡើងពីបាតតារាងមកលេខ ១០ វិញ បន្ទាប់ពីឈ្នះ ២-១ លើក្រុម អាយអេសអាយ ដង្កោសែនជ័យ ដែលមាន ៦ ពិន្ទុពីការឈ្នះ ១ ស្មើ ៣ និងចាញ់ ១២ ប្រកួត៕