ព័ត៌មានអន្ដរជាតិ

សិង្ហបុរីប្រាប់ថៃចំៗ ឲ្យដោះស្រាយជម្លោះជាមួយកម្ពុជាដោយសន្តិវិធី

បានផុស

៥ ខែ មុន

នៅ

ថ្ងៃព្រហស្បតិ៍ ២៩ មករា ២០២៦

ដោយ

រដ្ឋមន្ត្រីការបរទេសសិង្ហបុរី លោក វីវ៉ាន់ បាឡាគ្រឹស្នាន់ (Vivian Balakrishnan) បានជំរុញជាចំហឲ្យភាគីថៃដោះស្រាយភាពតានតឹងជាមួយកម្ពុជា ដោយសន្តិវិធីក្នុងជម្លោះព្រំដែនដែលបានផ្ទះការប្រយុទ្ធគ្នាដោយអាវុធទ្រង់ទ្រាយធំចំនួន២លើក កាលពីខែកក្កដានិងខែធ្នូឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សិង្ហបុរីជាប្រទេសតូចបំផុតនៅក្នុងប្លុកអាស៊ាន ប៉ុន្តែជាប្រទេសដែលមានឥទ្ធិពលនយោបាយដ៏ខ្លាំងនៅក្នុងតំបន់នេះដែលមានសមាជិក១១ប្រទេស ដោយសារតែនយោបាយការទូត ទំនាក់ទំនងជាមួយសម្ព័ន្ធមិត្តនៃប្រទេសអភិវឌ្ឍន៍ដ៏មានប្រសិទ្ធភាព និង ការអភិវឌ្ឍសេដ្ឋកិច្ចដ៏ខ្លាំងនិងរឹងមាំរបស់ខ្លួន។ ក្នុងពេលកន្លងមក សិង្ហបុរីតែងតែរក្សាគោលជំហរប្រយ័ត្នប្រយែងក្នុងការអត្ថាធិប្បាយក្នុងជម្លោះកម្ពុជានិងថៃ ដោយបានធ្វើឡើងតែក្នុងក្របខ័ណ្ឌអាស៊ានប៉ុណ្ណោះ ឬអំពាវនាវឲ្យភាគីទាំងពីររក្សាការអត់ធ្មត់ប៉ុណ្ណោះ ប៉ុន្តែពេលនេះ សិង្ហបុរីបានបង្ហាញជំហរផ្ទាល់ខ្លួនក្នុងការជំរុញឲ្យភាគីថៃដោះស្រាយជម្លោះនោះដោយសន្តិវិធី។

ក្នុងជំនួបទ្វេភាគីជាមួយរដ្ឋមន្ត្រីការបរទេសថៃ លោក ស៊ីហៈសាក់ ភួងកេតុកែវ (Sihasak Phuangketkeow) នៅឯក្រៅកិច្ចប្រជុំរដ្ឋមន្ត្រីការបរទេសអាស៊ាននៅទក្រុងស៊ីប៊ូ ប្រទេសហ្វីលីពីន រដ្ឋមន្ត្រីការបរទេសសិង្ហបុរី លោក វីវ៉ាន់ បាឡាគ្រឹស្នាន់ (Vivian Balakrishnan) បានជំរុញឲ្យដោះស្រាយដោយសន្តិភាពនូវតានតឹងតាមបណ្តោយព្រំដែនថៃនិងកម្ពុជា។

លោក វីវ៉ាន់ បាឡាគ្រឹស្នាន់ ដែលបានបង្ហោះសារតាមបណ្តាញសង្គមហ្វេសប៊ុក និងដកស្រង់ដោយសារព័ត៌មាន Straits Times បាននិយាយថា៖«សង្ឃឹមថាសន្តិភាពនឹងស្តែងឡើង ហើយភាគីទាំងពីរនឹងអាចដោះស្រាយភាពខុសគ្នារបស់ពួកគេតាមរយៈការសន្ទនា និងការចរចា»។

ជម្លោះព្រំដែនរវាងថៃនិងកម្ពុជា ហាក់បានទាញទម្លាក់គុណតម្លៃរបស់អាស៊ាន ដែលជាសហគមន៍សន្តិភាព រួមវាសនាតែមួយ នោះ ដោយសារតែភាគីថៃដែលមានទំនាស់នយោបាយផ្ទៃក្នុង រួចបង្វែរជម្លោះផ្ទៃក្នុងនោះមកកាន់ព្រំដែនជាមួយកម្ពុជា ដោយបង្កហេតុឲ្យមានការផ្ទុះអាវុធ និងប្រើប្រាស់មធ្យោបាយប្រយុទ្ធដ៏សាហាវដើម្បីកាន់កាប់តំបន់មួយចំនួនរបស់កម្ពុជា ក្នុងន័យផ្គាប់ចិត្តក្រុមអ្នកជាតិនិយមថៃ។

បើទោះបីជា ប្រទេសកម្ពុជានិងថៃសម្រេចបាននូវកិច្ចព្រមព្រៀងបទឈប់បាញ់រហូតដល់ទៅ២លើក និង កិច្ចព្រមព្រៀងសន្តិភាពដ៏ទូលំទូលាយ ក្រោមវត្តមានមហាអំណាចសហរដ្ឋអាមេរិក និងប្រធានអាស៊ានក៏ដោយ ប៉ុន្តែយោធារបស់ប្រទេសថៃនៅមិនទាន់ចូលរួមអនុវត្តពេញលេញដោយដកចេញពីទឹកដីរបស់កម្ពុជានៅឡើយ ដោយបំពានលើជនស៊ីវិល និងបូរណៈភាពទឹកដីកម្ពុជាយ៉ាងធ្ងន់ធ្ងរ។

កម្ពុជាដែលជាប្រទេសរងគ្រោះក្នុងជម្លោះនយោបាយថៃ បានអំពាវនាវម្តងហើយម្តងទៀត ឲ្យភាគីថៃចូលរួមអនុវត្តកិច្ចព្រមព្រៀងសន្តិភាពកូឡាំឡាំពូដែលចុះហត្ថលេខាកាលថ្ងៃទី២៦ខែតុលា២០២៥ ឲ្យបានពេញលេញ ដើម្បីស្តារសន្តិភាព និងកសាងទំនុកចិត្តគ្នាឡើងវិញ៕

រ៉ាន់ រើយ