ព័ត៌មានជាតិ

មន្ត្រីជាន់ខ្ពស់ក្រសួងការងារ ចូលរួមវេទិកាជាន់ខ្ពស់អាស៊ានស្ដីពី ការងារសមរម្យក្នុងសេដ្ឋកិច្ចតាមថ្នាលបច្ចេកវិទ្យា

បានផុស

៥ ខែ មុន

នៅ

ថ្ងៃសុក្រ ៦ កុម្ភៈ ២០២៦

ដោយ

លោក សោម ចំណាន រដ្ឋលេខាធិការក្រសួងការងារ និងបណ្ដុះបណ្ដាលវិជ្ជាជីវៈ ចាប់ពីថ្ងៃទី ៣ ដល់ថ្ងៃទី ៥ ខែកុម្ភៈ ឆ្នាំ ២០២៦ បានអញ្ជើញដឹកនាំប្រតិភូចូលរួមវេទិកាជាន់ខ្ពស់អាស៊ាន ស្ដីពី ការងារសមរម្យក្នុងសេដ្ឋកិច្ចតាមថ្នាលបច្ចេកវិទ្យា ដែលរៀបចំដោយក្រសួងមុខរបរ និងការងារ នៃសាធារណរដ្ឋហ្វីលីពីន នៅទីក្រុងសេប៊ូ សាធារណរដ្ឋហ្វីលីពីន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វេទិកាជាន់ខ្ពស់អាស៊ាននេះ មានគោលបំណងពិភាក្សាលើបញ្ហាប្រឈម ការស្វែងរកដំណោះស្រាយ ក៏ដូចជាការចែករំលែកនូវវឌ្ឍនភាព ឧត្តមានុវត្តន៍ និងនវានុវត្តន៍ ក្នុងការរៀបចំការងារសមរម្យសម្រាប់អ្នកធ្វើការតាមថ្នាលបច្ចេកវិទ្យា ឱ្យមានភាពធន់ បរិយាបន្ន និងនិរន្តរភាព។

ថ្លែងក្នុងវេទិកានេះ លោក សោម ចំណាន បានគូសបញ្ជាក់អំពីការអនុវត្តយុទ្ធសាស្ត្របញ្ចកោណ ដំណាក់កាលទី ១ របស់រាជរដ្ឋាភិបាលកម្ពុជា នីតិកាលទី ៧ នៃរដ្ឋសភា និងផែនការយុទ្ធសាស្ត្រអភិវឌ្ឍន៍វិស័យការងារ សន្តិសុខសង្គម និងបណ្ដុះបណ្ដាលវិជ្ជាជីវៈ ឆ្នាំ ២០២៤-២០២៨ របស់ក្រសួងការងារ និងបណ្ដុះបណ្ដាលវិជ្ជាជីវៈ ដែលមានលក្ខណៈគ្រប់ជ្រុងជ្រោយសម្រាប់ជំរុញការងារសមរម្យ និងការធ្វើឱ្យប្រសើរឡើងនូវជីវភាព និងសុខុមាលភាពរបស់ប្រជាជនកម្ពុជាទាំងអស់ រួមទាំងអ្នកធ្វើការក្នុងសេដ្ឋកិច្ចតាមថ្នាលបច្ចេកវិទ្យា ដើម្បីធានាថាមិនមាននរណាម្នាក់ត្រូវបានទុកចោល៕