កីឡា

លោក សាន សុក្រិត គិតថាស្នងការរាជធានីភ្នំពេញនឹងអាចឡើងដល់វគ្គផ្ដាច់ព្រ័ត្រ ព្រោះ ចាន់ វាសនា រ៉ុន សុខជា រ៉ាស៊ីអ៊ែល ល្អខ្លាំងឆ្នាំនេះ

បានផុស

៤ ខែ មុន

នៅ

ថ្ងៃសុក្រ ១៣ កុម្ភៈ ២០២៦

ដោយ

លោក សាន សុក្រិត តាមការយល់ឃើញផ្ទាល់របស់លោកគឺគិតថាក្រុមស្នងការរាជធានីភ្នំពេញនឹងឡើងដល់វគ្គផ្ដាច់ព្រ័ត្រ ឬគ្រងពានសម្ដេច ក្រឡាហោម លើកទី៤ ឆ្នាំនេះ ព្រោះមើលឃើញសមត្ថភាពកីឡាករល្អៗដូចជា ចាន់ វាសនា HERRERA ខណៈក្រុមផ្សេងៗបរទេសមិនហួរគ្នាទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សាន សុក្រិត

ថ្លែងក្នុងកិច្ចសម្ភាសលោក សាន សុក្រិត បានឲ្យដឹងថា តាមការយល់ឃើញរបស់លោកគិតថា ពានរង្វាន់សម្ដេច ក្រឡាហោម ឆ្នាំនេះបែបបានលើក្រុមស្នងការរាជធានីភ្នំពេញហើយ ព្រោះទាំងសមត្ថភាពកលល្បិចប្រកួតគឺបានទាំងអស់។

គ្រូបង្វឹកជើងចាស់រូបនេះបន្ថែមទៀតថា ស្មាត់របស់ស្នងការគឺ ចាន់ វាសនា HERRERA ធំ និងលេងល្អណាស់ ចំណែកកីឡាករកណ្ដាលមាន ខន ហ្វី ក៏លេងល្អ ខណៈបាល់ ៣ម៉ែត្រក្រោយសូម្បីកីឡាករវៀតណាមរបស់ស្វាយរៀងក៏មិនលើ រ៉ុន សុខជា ដែរ។ មួយវិញទៀតស្នងការមានអ្នកប៉ះសេ ២នាក់ល្អស្មើគ្នាទៅទៀតដាក់មួយណាក៏បាន។

ក្រុមស្នងការរាជធានីភ្នំពេញ

ឥលូវនេះក្រុមស្នងការលេងយល់ពីបាល់បានល្អ និងតាមចាប់បាំងច្បាស់ថែមទៀត ដូច្នេះមានចំណុចល្អៗច្រើនទៀតដែលលោកមើលឃើញថាក្រុមមួយនេះអាចនឹងឡើងទៅដល់វគ្គផ្ដាច់ព្រ័ត្របើទោះជាជួបស្វាយរៀងម្ចាស់ជើងឯកឆ្នាំចាស់នៅវគ្គណាក៏ដោយ។

គ្រូៗរបស់ស្នងការរាជធានីភ្នំពេញ

បញ្ជាក់ដែរថា ពានរង្វាន់សម្ដេច ក្រឡាហោម លើកទី៤ ឆ្នាំ២០២៦ នេះកំពុងតែប្រកួតវគ្គសន្សំពិន្ទុក្នុងពូល ខណៈមានក្រុមខ្លះបានឡើងទៅវគ្គបន្តហើយបន្ទាប់ពីឈ្នះ ២ប្រកួត។ ចំពោះក្រុមស្នងការរាជធានីភ្នំពេញ គឺស្ថិតនៅក្នុងពូល E កំពុងមាន ៦ពិន្ទុពេញ ២ប្រកួតឈ្នះទាំង២ បានឡើងទៅជុំទី២ ហើយបើទោះជានៅសល់ ១ប្រកួតក្នុងដៃក៏ដោយ។ ក្រុមស្នងការរាជធានីភ្នំពេញ នៅឆ្នាំនេះកំពុងបង្ហាញភាពលេចធ្លោជាខ្លាំងតាមរយៈការឈ្នះបន្តបន្ទាប់ និងទើបឈ្នះពានរង្វាន់សប្បុរសធម៌ថ្មីនេះក្នុងចំណោម ៤ក្រុមធំៗទៀតផង។ រង់ចាំមើលថាក្រុមមួយនេះបានឡើងទៅដល់វគ្គផ្ដាច់ព្រ័ត្រ ឬលើកពានដូចការគិតរបស់លោក សាន សុក្រិត ដែរទេ៕

អត្ថបទដោយ៖ នួន ស៊ីណា