សេដ្ឋកិច្ច

ការដោះដូរទំនិញកម្ពុជា-ម៉ាឡេស៊ី សម្រេចបានជាង ១២៥ លានដុល្លារ នៅខែមករា កើនឡើងខ្ពស់

បានផុស

២ ខែ មុន

នៅ

ថ្ងៃអង្គារ ១៧ កុម្ភៈ ២០២៦

ដោយ

ការដោះដូរទំនិញកម្ពុជា-ម៉ាឡេស៊ី សម្រេចបាននូវទំហំទឹកប្រាក់ជាង ១២៥ លានដុល្លារ នៅក្នុងខែមករា ឆ្នាំ ២០២៦ កើនឡើង ៤២% ធៀបនឹងរយៈពេលដូចគ្នាកាលពីឆ្នាំមុន ដែលឆ្លុះបញ្ចាំងអំពីតម្រូវការកើនឡើងនៃប្រទេសទាំងពីរ ស្របពេលដែលកម្ពុជា នៅតែបន្តរក្សាបានទីផ្សារសំខាន់ៗរបស់ខ្លួន។

ទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា បង្ហាញថា នៅក្នុងខែមករា ឆ្នាំ ២០២៦ ទំហំពាណិជ្ជកម្មទ្វេភាគីកម្ពុជា-ម៉ាឡេស៊ីសម្រេចបានជាង ១២៥ លានដុល្លារ ក្នុងនោះកម្ពុជានាំចេញទៅម៉ាឡេស៊ីមានទំហំទឹកប្រាក់ ២១ លានដុល្លារ កើនឡើង ៧៧,៣% ចំណែកម៉ាឡេស៊ីនាំចូលមកវិញ មានតម្លៃ ១០៣ លានដុល្លារ កើនឡើង ៣៦,២%។

លោក ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម មានប្រសាសន៍ថា ទំហំពាណិជ្ជកម្មកម្ពុជាមានកំណើន ឆ្លុះបញ្ចាំងពីការរក្សាបាននូវទីផ្សារសំខាន់ៗរបស់ខ្លួន ដែលជាទីផ្សារនៅក្នុងតំបន់ និងពិភពលោក ដែលធានាបាននូវខ្សែច្រវាក់តម្លៃ និងផ្គត់ផ្គង់ ព្រមទាំងរក្សាបាននូវជំនឿចិត្តពីអ្នកបញ្ជាទិញ។

អ្នកតាមដានភូមិសាស្ត្រនយោបាយ និងសេដ្ឋកិច្ច លោកបណ្ឌិត ជ័យ តិច មានប្រសាសន៍ថា ការកើនឡើងនៃការនាំចូលទំនិញពីម៉ាឡេស៊ីដោយសារតែកម្ពុជាបានបង្វែរទំនិញមួយចំនួនពីប្រទេសថៃ បន្ទាប់ពីមានបញ្ហាព្រំដែនជាមួយគ្នា ជាមួយនឹងការធ្វើពហិការទំនិញថៃពីប្រជាជនកម្ពុជា។

យោងតាមក្រសួងពាណិជ្ជកម្ម នៅក្នុងឆ្នាំ ២០២៥ ពាណិជ្ជកម្មទ្វេភាគីកម្ពុជា-ម៉ាឡេស៊ី សម្រេចបាននូវទំហំទឹកប្រាក់ចំនួន ១,១ ពាន់លានដុល្លារ កើនឡើង ២៤,៦៦% ក្នុងនោះ កម្ពុជានាំចេញទៅម៉ាឡេស៊ី មានតម្លៃ ១៤៣ លានដុល្លារ ធ្លាក់ចុះ ២,៥៥% ចំណែកឯម៉ាឡេស៊ីនាំចូលមកវិញ មានតម្លៃ ៩៣៥ លានដុល្លារ កើន ៣០,២៥%។

ប្រទេសម៉ាឡេស៊ី គឺជាដៃគូពាណិជ្ជកម្មធំជាងគេទី ៧ របស់កម្ពុជា បន្ទាប់ពីប្រទេសចិន សហរដ្ឋអាមេរិក វៀតណាម ថៃ ជប៉ុន និងសិង្ហបុរី៕