ភាគខាងត្បូងថៃ កាន់តែវឹកវរ ក្រោយការបោះឆ្នោត

ក្រុមផ្តាច់ខ្លួននៅភាគខាងត្បូងថៃ បានបង្កើនការវាយប្រហាររឹតខ្លាំងនិងញឹកញាប់ ក្រោយការបោះឆ្នោតសកលរបស់ប្រទេសនេះ រុញសភាពការណ៍កាន់តែវឹកវរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការវាយប្រហារទ្រង់ទ្រាយធំចុងក្រោយបំផុតគឺកើតឡើងនៅចំទិវានៃក្តីស្រឡាញ់ថ្ងៃ១៤កុម្ភៈ ដែលគ្រាប់បែកចំនួន៧គ្រាប់បានផ្ទុះបណ្តាក់គ្នាធ្វើឲ្យកក្រើកខេត្ត Narathiwat។

តាមការផ្សាយរបស់ Bangkok Post, គ្រាប់បែកទាំង៧បានផ្ទុះក្នុងស្រុក Yi-ngo និង Rangae ដោយគ្រាប់បែកដំបូង ផ្ទុះនៅម៉ោង១១យប់ថ្ងៃសៅរ៍ទី១៤ខែកុម្ភៈ ហើយក៏មានការផ្ទុះជាបន្តបន្ទាប់។

មិនត្រឹមបំផ្ទុះគ្រាប់បែកទេ ក្រុមផ្តាច់ខ្លួន ជាពិសេស BRN ក៏ធ្វើសកម្មភាពវាយប្រហារផ្សេងទៀតផងដែរ ដូចជាការបាញ់ប្រហារក្នុងពេលដំណាលគ្នានៅតាមខេត្ត Yala, Pattani និង Narathiwat។

វាត្រូវបានគេមើលឃើញថា ក្រុមផ្តាច់ខ្លួនចង់បញ្ជូនសារទៅកាន់រដ្ឋាភិបាលថ្មីថា បញ្ហានៅភាគខាងត្បូងមិនទាន់ត្រូវបានដោះស្រាយឡើយ ហើយពួកគេនៅតែមានឥទ្ធិពលខ្លាំង។ ម្យ៉ាងពួកគេក៏កំពុងប្រើប្រាស់អំពើហិង្សាជាឧបករណ៍ ដើម្បីបង្កើនសម្ពាធលើតុចរចាជាមួយរដ្ឋាភិបាលថ្មី ដើម្បីទាមទារសិទ្ធិស្វ័យភាព ឬលក្ខខណ្ឌនយោបាយដែលពួកគេចង់បានផងដែរ។

ជុំវិញអំពើហិង្សាកាន់តែខ្លាំងឡើងនេះផងដែរ កងទ័ពភូមិភាគ៤របស់ថៃ បានបង្កើនសន្តិសុខដល់កម្រិតខ្ពស់បំផុត និងដាក់ពង្រាយកម្លាំងបន្ថែមដើម្បីការពារទីប្រជុំជន និងមណ្ឌលរដ្ឋបាល ថែមទាំងមានការដាក់ប៉ុស្តិ៍ត្រួតពិនិត្យកាន់តែច្រើននៅតាមព្រំដែនថៃ-ម៉ាឡេស៊ី ទៀតផង។

សូមជម្រាបជាថ្មី ជម្លោះប្រដាប់អាវុធដ៏រ៉ាំរ៉ៃនៅភាគខាងត្បូងប្រទេសថៃ គឺកើតឡើងនៅក្នុងខេត្តចំនួន៤ដូចជា Narathiwat, Pattani, Yala និង Songkhla។ ជម្លោះនេះអូសបន្លាយពេលអស់ជាច្រើនទសវត្សរ៍មកហើយ ដោយមានឫសគល់ចេញពីប្រវត្តិសាស្ត្រនយោបាយនិងសាសនា។ 

យោងតាមតួលេខចុងក្រោយពីក្រុមស្រាវជ្រាវ Deep South Watch, គិតចាប់តាំងពីឆ្នាំ២០០៤មក មនុស្សស្លាប់នៅក្នុងអំពើហិង្សានោះ មានជាង ៧ ៥០០នាក់ ខណៈជាង ១៣ ៥០០នាក់ រងរបួស៕

អត្ថបទ៖ សុខ សុវណ្ណ