ធ្លាយព័ត៌មានថា អាមេរិក នឹងបើកការវាយប្រហារអ៊ីរ៉ង់ នៅចុងសប្តាហ៍នេះហើយ

យោងតាមប្រភពសម្ងាត់មួយបានទម្លាយថា សហរដ្ឋអាមេរិក ត្រៀមបើកការវាយប្រហារយោធាលើប្រទេសអ៊ីរ៉ង់នាចុងសប្តាហ៍នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដ្បិតមិនបញ្ចេញឈ្មោះ ប៉ុន្តែប្រភពដដែលបានប្រាប់ទៅសារព័ត៌មាន CNN នៅថ្ងៃព្រហស្បតិ៍ទី១៩ខែកុម្ភៈថា៖ «សេតវិមានត្រូវបានគេរាយការណ៍ជូនថា កងទ័ពអាចនឹងត្រៀមខ្លួនរួចរាល់សម្រាប់ការវាយប្រហារមួយនៅត្រឹមចុងសប្តាហ៍នេះ បន្ទាប់ពីមានការបង្កើនកម្លាំងជើងអាកាស និងជើងទឹកយ៉ាងខ្លាំងក្លានៅមជ្ឈិមបូព៌ានាប៉ុន្មានថ្ងៃថ្មីៗ»។

ចំណែកសារព័ត៌មាន CBS News ក៏បានចេញផ្សាយអំពីព័ត៌មានដ៏ភ្ញាក់ផ្អើលនេះដែរ ដោយអះអាងបានប្រភពពីមន្ត្រីសន្តិសុខជាតិកំពូលៗ ដែលនិយាយថា កងទ័ពបានប្រាប់ទៅលោក ដូណាល់ ត្រាំ រួចហើយ អំពីការត្រៀមលក្ខណៈរបស់យោធា សម្រាប់ការវាយប្រហារអ៊ីរ៉ង់ យូរបំផុតត្រឹមថ្ងៃសៅរ៍នេះ។

យ៉ាងណា ប្រភពខាងលើសុទ្ធតែអះអាងដូចៗគ្នាថា លោក ត្រាំ មិនទាន់សម្រេចចិត្តចុងក្រោយទេ ហើយលោកក៏កំពុងសួរយោបល់ពីទីប្រឹក្សានិងសម្ព័ន្ធមិត្តផងដែរថា តើអ្វីទៅជាជម្រើសដ៏ល្អបំផុតដែលគួរអនុវត្ត។ ម្យ៉ាង មិនទាន់មានការបញ្ជាក់ពីសេតវិមានឡើយ ពាក់ព័ន្ធព័ត៌មានទាំងនេះ។

ជុំវិញសភាពការណ៍ដែលកាន់តែតានតឹងទៅៗនេះ កាលពីសប្តាហ៍មុន មន្ត្រីអាមេរិកក៏ទម្លាយព័ត៌មានរួចហើយដែរថា ទីក្រុងវ៉ាស៊ីនតោន បានត្រៀមលក្ខណៈជាស្រេចសម្រាប់ប្រតិបត្តិការយោធាយូរសប្តាហ៍ លើអ៊ីរ៉ង់។

កាលនោះ មន្ត្រីអាមេរិក២រូបសុំមិនបញ្ចេញឈ្មោះ ត្រូវបានដកស្រង់សម្តីដោយសារព័ត៌មាន Reuters ដែលនិយាយនៅថ្ងៃសៅរ៍ទី១៤ខែកុម្ភៈថា៖ «កងទ័ពអាមេរិកកំពុងត្រៀមលក្ខណៈសម្រាប់ប្រតិបត្តិការយោធាយូរសប្តាហ៍ប្រឆាំងនឹងអ៊ីរ៉ង់ ប្រសិនបើប្រធានាធិបតី ដូណាល់ ត្រាំ បញ្ជាឲ្យមានការវាយប្រហារមែន។ យុទ្ធនាការយោធាប្រឆាំងអ៊ីរ៉ង់អាចនឹងរីកធំទៅជា ជម្លោះដ៏ធ្ងន់ធ្ងរជាងមុនឆ្ងាយណាស់ បើធៀបនឹងអ្វីដែលធ្លាប់កើតមានរវាងប្រទេសទាំងពីរនាពេលកន្លងមក»។

មន្ត្រីម្នាក់ក្នុងចំណោមនោះបានលើកឡើងថា ជាផ្នែកមួយនៃយុទ្ធនាការដែលអាចកើតមាន ទីក្រុងវ៉ាស៊ីនតោនអាចនឹងបើកការវាយប្រហារលើមូលដ្ឋានសន្តិសុខ និងស្ថាប័នរដ្ឋរបស់អ៊ីរ៉ង់ មិនមែនត្រឹមតែរចនាសម្ព័ន្ធនុយក្លេអ៊ែរប៉ុណ្ណោះទេ ហើយទីក្រុងវ៉ាស៊ីនតោនគិតទុកជាមុនថា ទីក្រុងតេហេរ៉ង់នឹងវាយបកវិញ ដែលនឹងបង្កឲ្យមាន ការវាយប្រហារតបតគ្នាទៅវិញទៅមកនិងការសងសឹកក្នុងរយៈពេលវែង»៕

អត្ថបទ៖ សុខ សុវណ្ណ