សេដ្ឋកិច្ច

ចំណូលនាំចេញផលិតផលសំបកកង់រថយន្តសម្រេចបានជិត ១៦០ លានដុល្លារ កើនឡើងខ្ពស់

បានផុស

៥ ខែ មុន

នៅ

ថ្ងៃសៅរ៍ ២១ កុម្ភៈ ២០២៦

ដោយ

កម្ពុជារកប្រាក់ចំណូលបានជិត ១៦០ លានដុល្លារ ពីការនាំចេញផលិតផលសំបកកង់រថយន្តនៅក្នុងខែមករា ឆ្នាំ ២០២៦ កើនឡើង ៧០,៨១% ប្រៀបធៀបនឹងរយៈពេលដូចគ្នាកាលពីឆ្នាំមុន ឆ្លុះបញ្ចាំងពីកិច្ចខិតខំប្រឹងប្រែងរបស់រាជរដ្ឋាភិបាលក្នុងការធ្វើពិពិធកម្មសេដ្ឋកិច្ច នៅចំពេលដែលពិភពលោកកំពុងប្រឈមនឹងភាពមិនប្រាកដប្រជានៃសេដ្ឋកិច្ច ដោយសារតែបញ្ហាភូមិសាស្ត្រនយោបាយ និងការដាក់ពន្ធរបស់សហរដ្ឋអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក គឹន ឧត្តមមុនីស៊ីណាត នាយកប្រតិបត្តិក្រុមហ៊ុន Sailun ប្រាប់កម្ពុជាថ្មីថា កំណើននៃការនាំចេញសំបកកង់រថយន្ត ដោយសារការដាក់ចេញនូវគោលនយោបាយដ៏ល្អរបស់រាជរដ្ឋាភិបាល ដែលបានគាំពារទៅលើអ្នកវិនិយោគពីបរទេស។

លោក ម៉ែន សុភក្តិ ប្រធានសមាគមអភិវឌ្ឍន៍កៅស៊ូមានប្រសាសន៍ថា កំណើននៃការនាំចេញសំបកកង់រថយន្ត ជំរុញឱ្យការនាំចេញជ័រកៅស៊ូ និងតម្លៃកៅស៊ូមានស្ថិរភាពល្អ ទោះបីជាប្រឈមនឹងបញ្ហាស្ថានភាពសេដ្ឋកិច្ច និងនយោបាយនៅលើពិភពលោក។

លោក ម៉ែន សុភក្តិ យល់ឃើញថា៖ «គោលនយោបាយរបស់រាជរដ្ឋាភិបាល មានការគាំពារទៅលើអ្នកវិនិយោគដែលមកផលិតជាផលិតផលសម្រេចនៅក្នុងស្រុក ទន្ទឹមនេះ កម្ពុជាមានវត្ថុធាតុដើមច្រើនអាចផ្គត់ផ្គង់ទៅរោងចក្រកែច្នៃដែលមកពីក្រៅប្រទេសបាននោះ ជាពិសេស ដូចជារោងចក្រកង់ឡានមាន ៦ ហើយកំពុងដំណើរការ ដែលបានប្រមូលទិញវត្ថុធាតុដើមក្នុងស្រុកកមកកែច្នៃ»។

យោងតាមក្រសួងពាណិជ្ជកម្ម នៅក្នុងឆ្នាំ ២០២៥ កម្ពុជានាំចេញសំបកកង់រថយន្តដែលជាទៅកាន់ទីផ្សារអន្តរជាតិមានទំហំទឹកប្រាក់ ១,៣៨ ពាន់លានដុល្លារ កើនឡើង ៥៧,៨៦% ប្រៀបធៀបនឹងឆ្នាំ ២០២៤៕

អត្ថបទ៖ ឡេង ដេត