Connect with us

ព័ត៌មានជាតិ

ឥណ្ឌូណេស៊ី គាំទ្រកម្ពុជាចំពោះគោលការណ៍ដោះស្រាយបញ្ហាព្រំដែនដោយសន្តិវិធី ដើម្បីសន្តិភាពក្នុងតំបន់អាស៊ាន

បានផុស

នៅ

ឥណ្ឌូណេស៊ី គាំទ្រដល់កម្ពុជាចំពោះការប្រកាន់យកគោលការណ៍ដោះស្រាយបញ្ហាជម្លោះព្រំដែនជាមួយប្រទេសជិតខាងដោយសន្តិវិធី ដែលឥណ្ឌូណេស៊ី ថា ជាការធានាដល់សន្តិភាពសម្រាប់តំបន់អាស៊ាន។ ការគាំទ្ររបស់ឥណ្ឌូណេស៊ីដូច្នេះ បានបង្ហាញឡើងតាមរយៈលោក សាន់តូ ដាម៉ូស៊ូម៉ាតូ ឯកអគ្គរដ្ឋទូតឥណ្ឌូណេស៊ីប្រចាំភ្នំពេញ ក្នុងជំនួបពិភាក្សាការងារជាមួយលោកឧបនាយករដ្ឋមន្រ្តី ស សុខា រដ្ឋមន្ត្រីក្រសួងមហាផ្ទៃ កាលពីរសៀលថ្ងៃទី១៩ ខែកុម្ភៈ ឆ្នាំ២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងជំនួបដែលធ្វើឡើងនៅទីស្តីការក្រសួងមហាផ្ទៃ លោកឧបនាយករដ្ឋមន្ត្រី ស សុខា និងលោកឯកអគ្គរដ្ឋទូត សាន់តូ ដាម៉ូស៊ូម៉ាតូ បានជជែកគ្នាពីបញ្ហាជម្លោះព្រំដែនរវាងកម្ពុជា និងថៃ ដោយភាគីទាំងពីរ បានគូសបញ្ជាក់អំពីគោលជំហរចំពោះការដោះស្រាយជម្លោះព្រំដែន ដែលកំពុងកើតមានពេលនេះ។

លោក ស សុខា បានរំលេចឡើងវិញអំពីជំហរកម្ពុជា គឺនៅតែបន្តប្រកាន់ខ្ជាប់នូវកិច្ចព្រមព្រៀងសន្តិភាព និងយន្តការដោះស្រាយដោយសន្តិវិធី ដើម្បីធានាបាននូវសុខសន្តិភាពរវាងប្រទេសជិតខាង និងសហសន្តិវិជ្ជមានក្នុងតំបន់អាស៊ាន។

ជំហរកម្ពុជានេះ ត្រូវបានលោកឯកអគ្គរដ្ឋទូតឥណ្ឌូណេស៊ី បង្ហាញការគាំទ្រដល់កម្ពុជា ដែលប្រកាន់ខ្ជាប់នូវគោលការណ៍ដោះស្រាយដោយសន្តិវិធី និងជាពិសេសការប្រតិបត្តិយ៉ាងខ្ជាប់ខ្ជួននូវកិច្ចព្រមព្រៀងស្តីពីសន្តិសុខ ហើយលោកឯកអគ្គរដ្ឋទូត អះអាងជាថ្មីទៀតថា ឥណ្ឌូណេស៊ីត្រៀមសហការជួយគាំទ្រគ្រប់បែបយ៉ាង ដើម្បីនាំមកនូវសុខសន្តិភាពក្នុងតំបន់អាស៊ាន៕

Helistar Cambodia - Helicopter Charter Services
Sokimex Investment Group
Sokha Hotels

ព័ត៌មានពេញនិយម