ប៉ាគីស្ថានប្រកាស «សង្រ្គាមបើកចំហ» ជាមួយអាហ្វហ្គានីស្ថាន ក្រោយការប៉ះទង្គិចនៅព្រំដែន

រដ្ឋមន្ត្រីការពារជាតិប៉ាគីស្ថាន លោក Khawaja Asif បានប្រកាស «សង្រ្គាមបើក​ចំហ» លើប្រទេសអាហ្វហ្គានីស្ថាន នា​ព្រឹកថ្ងៃសុក្រ​ទី​២៧​ខែ​កុម្ភៈ​នេះ បន្ទាប់ពីកងទ័ពប៉ាគីស្ថានបានបើកការវាយប្រហារតាមអាកាសលើមូលដ្ឋានយោធាអាហ្វហ្គានីស្ថានក្នុងខេត្ត Kabul, Kandahar និង Paktia។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការវាយប្រហារនេះ គឺជាការឆ្លើយតបទៅនឹងការឆ្មក់វាយប្រហាររបស់ក្រុមតាលីបង់នៅតាមព្រំដែនកាលពីថ្ងៃព្រហស្បតិ៍ ដែលបានសម្លាប់ទាហានប៉ាគីស្ថានពីរនាក់។ លោក Asif បានបញ្ជាក់ថា ការអត់ធ្មត់របស់ប៉ាគីស្ថានបានអស់កំណត់ហើយ ចំណែក​ឯ​​នាយករដ្ឋមន្ត្រី Shehbaz Sharif បានប្តេជ្ញាផ្តល់ «ការឆ្លើយតបយ៉ាងចាស់ដៃ» ចំពោះរាល់ការឈ្លានពានលើអធិបតេយ្យភាពជាតិ។

អ្នកនាំពាក្យក្រុមតាលីបង់ លោក Zabihullah Mujahid បានហៅការវាយប្រហារតាមអាកាសរបស់ប៉ាគីស្ថានថាជា «អំពើកំសាក» ប៉ុន្តែបានរាយការណ៍ថា មិនមានអ្នករងគ្រោះថ្នាក់ក្នុងហេតុការណ៍នោះទេ។ ភាពតានតឹងនេះបានកើតឡើងបន្ទាប់ពីមានការវាយបកទៅវិញទៅមក ដែលខាងអាហ្វហ្គានីស្ថានអះអាងថាបានកាន់កាប់ប៉ុស្តិ៍ត្រួតពិនិត្យរបស់ប៉ាគីស្ថាន​ចំនួន១៩កន្លែង ប៉ុន្តែប៉ាគីស្ថានបានបដិសេធ។

អគ្គលេខាធិការអង្គការសហប្រជាជាតិ លោក António Guterres បានជំរុញ​ឲ្យ​ភាគីទាំងពីរបញ្ឈប់ការបង្កគ្រោះថ្នាក់ដល់ជនស៊ីវិល និងស្វែងរកដំណោះស្រាយតាមផ្លូវការទូត ខណៈដែលពលរដ្ឋ​និងជនភៀសខ្លួននៅតំបន់ព្រំដែន Durand Line កំពុងនាំគ្នាជម្លៀសខ្លួនចេញឆ្ងាយ​ពីការប្រយុទ្ធគ្នា៕

ប្រែសម្រួល៖ ឈាង