នាយកុយ ខលមកសួរសុខទុក្ខ និងផ្ដល់កម្លាំងចិត្ត ដល់ នាយ ក្រិន ខណៈកំពុងសម្រាកព្យាបាល

នៅរសៀលថ្ងៃទី១៦ ខែមីនានេះ តាមរយៈវីដេអូបង្ហោះលើគណនីហ្វេសប៊ុកលោក សាវិន ហ្វីលីព បញ្ជាក់ថា នាយកុយ ដែលមហាជនជ្រាបថា ជាអ្នកមានគុណ និងជាមនុស្សសំខាន់ក្នុងជីវិតសិល្បៈរបស់ នាយ ក្រិន ដែលបាននាំនាយក្រិនប្រឡូកក្នុងវិស័យសិល្បៈមានឈ្មោះល្បីល្បាញ ដល់សព្វថ្ងៃ បានខលមកសួរសុខទុក្ខ និងផ្ដល់កម្លាំងចិត្តដល់តារាកំប្លែងមាឌល្អិតរូបនេះ ខណៈកំពុងទស្រាកព្យាបាលនៅមន្ទីពេទ្យ។ នេះក៏បានបង្ហាញពីមិត្តភាព និងការថែរក្សាស្រលាញ់រវាងអ្នកក្នុងវិស័យសិល្បៈខ្មែរ ក្នុងគ្រាលំបាកផងដែរ។

នាយកុយ និងនាយក្រិន ធ្លាប់ចាប់ដៃគ្នានាំយកសំណើចសើចក្អាកក្អាយជូនសាធារណជនខ្មែរ តាមរយៈកញ្ចក់ទូរទស្សន៍នៃកម្មវិធីល្បីៗជាច្រើន ទាំងក្នុងនិងក្រៅប្រទេស។ ជាង១០ឆ្នាំ ការសម្តែងរួមគ្នារបស់អ្នកទាំងពីរ បាននាំឱ្យនាយក្រិនទទួលបានភាពល្បីល្បាញ និងក្លាយជាតារាកំប្លែងដែលសំខាន់ក្នុងវិស័យកំប្លែងខ្មែរ ខណៈនាយកុយ ជាមនុស្សសំខាន់ដែលដឹកនាំ និងគាំទ្រក្នុងអាជីពតារាកំប្លែងរបស់នាយក្រិន។

ទោះបច្ចុប្បន្ន តារាកំប្លែងទាំង២ដួង លែងមានឆាកសម្តែងរួមគ្នាក៏ពិតមែន តែការសហការសម្តែងរួមគ្នាកន្លងមករបស់ពួកគាត់ នៅតែដក់ក្នុងការចងចាំអ្នកគាំទ្រ និងសហគមន៍សិល្បៈខ្មែរ។

លើសពីនេះ ទោះឆ្ងាយគ្នាក៏ដោយ តែនាយកុយ ពិសេសតារាកំប្លែងរួមក្រុម ប្រិមប្រិយ នៅតែបង្ហាញក្តីអាណិតស្រលាញ់ និងគាំទ្រគ្នាផងដែរ ពិសេសក្នុងគ្រាដ៏លំបាកនេះ៕