កម្មវិធីសំខាន់ៗ​ត្រៀម​រៀបចំ ជំរុញ​ព្រឹត្តិការណ៍បុណ្យ​ទន្លេនៅ​ខេត្ត​ក្រចេះ កាន់តែ​អធិកអធម

គណៈកម្មការអន្តរក្រសួងនឹងរៀបចំកម្មវិធីសំខាន់ៗ ដើម្បីជំរុញឱ្យប្រព្រឹត្តិការណ៍បុណ្យទន្លេលើក​ទី​១០​នេះ ព្រឹត្តទៅដោយភាពអធិកអធម។

ព្រឹត្តិការណ៍បុណ្យទន្លេលើកទី ១០ ឆ្នាំ២០២៦ នៅខេត្តក្រចេះ រៀបចំ​ឡើង​ក្រោមប្រធានបទ «ទន្លេបៃតង បេតិកភណ្ឌវប្បធម៌ និងធម្មជាតិមហាសាល» ដែលនឹងប្រព្រឹត្តទៅចាប់ពីថ្ងៃទី ២៧ ដល់ថ្ងៃទី ២៩ ខែមីនា ឆ្នាំ២០២៦ ដើម្បីផ្សព្វផ្សាយអំពីសក្តានុពលទេសចរណ៍ខេត្តជាប់ដងទន្លេកម្ពុជា ជាពិសេសខេត្តក្រចេះ, ទាក់ទាញភ្ញៀវទេសចរជាតិ-អន្តរជាតិ, ពង្រឹងនិងលើកកម្ពស់គុណភាព សេវាកម្មនានាក្នុងឧស្សាហកម្មទេសចរណ៍, លើកកម្ពស់តម្លៃនៃផលិតផលក្នុងស្រុក និងជំរុញការអភិវឌ្ឍនៅនឹងកន្លែងជូនដល់ប្រជាពលរដ្ឋ និងសហគមន៍ទេសចរណ៍ ក្នុងខេត្តក្រចេះ។

ពិធីបើកជាផ្លូវការ នៃព្រឹត្តិការណ៍ បុណ្យទន្លេលើក​ទី​១០ នឹងប្រព្រឹត្តទៅនៅរសៀលថ្ងៃទី២៨ ខែមីនា ឆ្នាំ២០២៦ ក្រោមអធិបតីភាព​សន្តិបណ្ឌិត នេត សាវឿន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន តំណាងដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រ កម្ពុជា។

គណៈកម្មការអន្តរក្រសួងនឹងរៀបចំកម្មវិធីសំខាន់ៗចំនួន ១០ ដើម្បីជំរុញឱ្យប្រព្រឹត្តិការណ៍បុណ្យទន្លេលើក​ទី១០ ដែលរៀបចំឡើងនៅខេត្តក្រចេះ ប្រព្រឹត្តទៅដោយភាពអធិកអធមនិងកាន់តែសប្បាយរីករាយ។

កម្មវិធីទាំងរួមមាន៖

១- ពិធីរាប់បាត្រព្រះសង្ឃចំនួន ៩៩អង្គ ដើម្បីឧទ្ទិសកុសលជូនដល់វិញ្ញាណក្ខន្ធ​បុព្វបុរស​ខ្មែរ វីរៈកងទ័ព និងកងកម្លាំងប្រដាប់អាវុធគ្រប់ប្រភេទ ដែលបានពលីក្នុងបុព្វហេតុការពារជាតិ មាតុភូមិ និងប្រជាជន។

២- កម្មវិធីដុតក្រឡានក្រចេះ ដឹងគុណវីរៈកងទ័ព និងកងកម្លាំងប្រដាប់អាវុធក្តីនឹករលឹកដល់ប្រជាជន​ភៀសសឹក។
៣- កម្មវិធីព្រលែងកូនត្រីចូលក្នុងទន្លេ ដើម្បីផ្តល់ជីវិតថ្មី បួងសួងសុំសេចក្តីសុខដល់ប្រជាជនកម្ពុជារស់​នៅក្នុងសុខសន្តិភាព។
៤- ការសម្តែងទស្សនីយភាពសិល្បៈ ដែលបង្ហាញពីប្រពៃណីទំនៀមទម្លាប់ និងសក្តានុពលទេសចរណ៍ខេត្តក្រចេះ ព្រមទាំងមានការប្រគំតន្ត្រីផងដែរ។
៥- ការតាំងពិព័រណ៍សមិទ្ធផលក្នុងវិស័យទេសចរណ៍ មហោស្រពម្ហូបអាហារ និងភេសជ្ជៈ ការតាំងពិព័រណ៍ពាណិជ្ជកម្ម ផលិតផលកសិ-ទេសចរណ៍ និងផលិតផលខ្មែរ ព្រមទាំងការបង្ហាញ សមិទ្ធផល និងគម្រោងអភិវឌ្ឍន៍នានារបស់ខេត្តក្រចេះ។
៦- សិក្ខាសាលា និងកិច្ចពិភាក្សាលើប្រធានបទសំខាន់ៗពាក់ព័ន្ធនឹងវិស័យទេសចរណ៍។
៧- សកម្មភាពកីឡាទេសចរណ៍ជាលក្ខណៈមហាជនជាច្រើនប្រភេទ។
៨- កម្មវិធីដាំដើមឈើស្របតាមទស្សនាទាន៖ ទេសចរម្នាក់ ដើមឈើមួយដើម។
៩- កម្មវិធីចែកអំណោយសប្បុរសធម៌។
១០- កម្មវិធីបណ្តែតប្រទីប ព្រមទាំងកម្មវិធីកម្សាន្តផ្សេងៗទៀតជាច្រើន។

បន្ថែមលើនេះ ដើម្បីជំរុញឱ្យព្រឹត្តិការណ៍បុណ្យទន្លេនៅឆ្នាំនេះ ទទួលបានជោគជ័យ ជាពិសេសរួមគ្នាជំរុញផ្សព្វផ្សាយ និងលើកកម្ពស់វិស័យទេសចរណ៍ និងយុទ្ធនាការផ្សព្វផ្សាយ «ទេសចរណ៍ដើម្បីទាំងអស់គ្នា ទាំង​អស់គ្នាដើម្បីទេសចរណ៍» «ទេសចរណ៍រីកលូតលាស់ក្នុងសន្តិភាព» និង «បុគ្គលម្នាក់ៗជាអ្នកផ្សព្វ​ផ្សាយ ទេសចរណ៍កម្ពុជាម្នាក់»៕

អត្ថបទ៖ ប្រុញ វិធិន