ព័ត៌មានជាតិ

ផ្លូវក្នុងក្រុងបាត់ដំបងក្នុងផែនការ ១៧ ខ្សែ បើកការដ្ឋានស្ថាបនាបន្តបន្ទាប់បានចំនួន ៧ ខ្សែ

បានផុស

២ ខែ មុន

នៅ

ថ្ងៃពុធ ១៨ មីនា ២០២៦

ដោយ

ផ្លូវក្នុងក្រុងបាត់ដំបងដែលរងការរិះគន់មានការខូចខាត មានជង្ហុកពិបាកធ្វើដំណើរ មកដល់ពេលនេះអាជ្ញាធរបានបើកការដ្ឋានសាងសង់ជួសជុលជាបន្តបន្ទាប់ ដើម្បីសម្រួលការធ្វើដំណើររបស់ពលរដ្ឋឲ្យបានល្អប្រសើរជាងមុន។

លោក ព្រួញ រិទ្ធថា ប្រធានមន្ទីរសាធារណះការខេត្តបាត់ដំបងបានឲ្យដឹងថា តាមគម្រោងក្នុងឆ្នាំ ២០២៦ ផ្លូវក្នុងក្រុងបាត់ដំបងគ្រោងត្រូវជួសជុលស្តារឡើងវិញសរុបចំនួន ១៧ ខ្សែ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកថា គិតមកត្រឹមពេលនេះ ក្រុមការងារមន្ទីរបានបើកការដ្ឋានសាងសង់បានចំនួន ៧ ខ្សែ និងនៅសល់ ១០ ខ្សែទៀត នឹងបន្តបើកដំណើរការបើកការដ្ឋានសាងសង់បន្តបន្ទាប់នៅពេលដ៏ខ្លីខាងមុខនេះ។

ផ្លូវក្នុងក្រុងបាត់ដំបង ត្រូវបានអាជ្ញាធរឈូសបើកផ្លូវឲ្យបានធំទូលាយ ដោយបានណែនាំឲ្យប្រជាពលរដ្ឋចូលរួមរុះរើដូចជា រោង រាន របង តូប សំយាប ដែលបានសង់រំលោភលើដីចំណីផ្លូវសាធារណៈរបស់រដ្ឋ ដូចជាតាមបណ្តោយផ្លូវ ១៥៤ ផ្លូវ ៤០៦ ផ្លូវ ៥២០ ដែលកន្លងទៅមានភាពតូចចង្អៀត មិនមានផាសុខភាព និងបរិយាកាសអាប់អ៊ួ។

ប្រជាពលរដ្ឋរស់នៅក្នុងក្រុងបាត់ដំបងសាទរចំពោះការរៀបចំរបស់រដ្ឋបាលក្រុង ដែលក្រោយហេដ្ឋារចនាសម្ព័ន្ធផ្លូវក្នុងក្រុងបានស្តារជួសជុលមានភាពស្រឡះ កាត់បន្ថយការកកស្ទះ និងបញ្ចៀសគ្រោះថ្នាក់ចរាចរជាដើម។

អាជីវករលក់និងជួសជុលទូរស័ព្ទដៃក្នុងក្រុងបាត់ដំបង លោក ឡាយ សុប៊ិន បានឲ្យដឹងថា លោកសាទរចំពោះកិច្ចខិតខំរបស់រដ្ឋបាលក្រុងក៏ដូចជាអាជ្ញាធរខេត្ត ដែលបានរៀបចំក្នុងក្រុងបើកស្តារឲ្យមានភាពទូលាយជាងមុន ងាយស្រួលសម្រាប់ពលរដ្ឋធ្វើដំណើរ និងភ្ញៀវបរទេសដើរកម្សាន្តប្រកបដោយផាសុខភាពល្អ៕

អត្ថបទ÷សៅ សារិទ្ធ