អ៊ីរ៉ង់​ដាក់​លិខិត​​ទាម​ទារសំណងពីអារ៉ាប់រួម ព្រោះ​តែ​​​ឲ្យ​អាមេរិក​ប្រើទឹកដី​វាយ​ប្រហារអ៊ីរ៉ង់​

អ៊ីរ៉ង់កាលពីថ្ងៃ១៩ខែមីនា បានដាក់លិខិតមួយចោទប្រកាន់អារ៉ាប់រួម (UAE) ថា គាំទ្រសហរដ្ឋអាមេរិកឲ្យមកវាយប្រហារទឹកដីរបស់ខ្លួន ដោយទីក្រុងតេហេរ៉ង់ទាមទារសំណងសម្រាប់ការខូចខាត និងសង្កត់ធ្ងន់លើការទទួលខុសត្រូវក្រោមច្បាប់អន្តរជាតិ។ នេះបើយោងតាមការចុះផ្សាយពីទីភ្នាក់ងារ Reuters ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឯកអគ្គរដ្ឋទូតអ៊ីរ៉ង់ប្រចាំអង្គការសហប្រជាជាតិ លោក Amir Saeid Iravani នៅក្នុងលិខិតមួយផ្ញើទៅកាន់អគ្គលេខាធិការអង្គការសហប្រជាជាតិ លោក Antonio Guterres បាននិយាយថា ការសម្រេចចិត្តរបស់​អារ៉ាប់រួម​ ក្នុងការអនុញ្ញាតឲ្យទឹកដីរបស់ខ្លួនត្រូវបានប្រើប្រាស់សម្រាប់ការវាយប្រហារទាំងនោះ គឺជា «ទង្វើខុសឆ្គងអន្តរជាតិ ដែលទាមទារការទទួលខុសត្រូវរបស់រដ្ឋ»។ ពួកគេត្រូវផ្តល់សំណងសម្រាប់ការខូចខាតសម្ភារៈ និងការខាតបង់ផ្សេងៗ រួមទាំងសីលធម៌ទាំងអស់ដែលបានកើតឡើង។

ទោះជាយ៉ាងណាក៏ដោយ​ អារ៉ាប់រួម​ មិនទាន់ឆ្លើយតបចំពោះ​ការចោទប្រកាន់នៅឡើយទេ។ អស់រយៈពេលជាច្រើនឆ្នាំមកហើយ ប្រទេស​អារ៉ាប់រួម​ក្នុងតំបន់​ឈូងសមុទ្រនេះគឺជាដៃគូពាណិជ្ជកម្មធំទីពីររបស់អ៊ីរ៉ង់ បន្ទាប់ពីចិន ហើយបានដើរតួនាទីយ៉ាងសំខាន់ក្នុងការរក្សាសកម្មភាពសេដ្ឋកិច្ច​របស់​ទីក្រុងតេហេរ៉ង់ នៅពេលដែលប្រឈមមុខនឹងទណ្ឌកម្ម។

បន្ទាប់ពីអាមេរិក និងអ៊ីស្រាអែលបានបើកការវាយលុកប្រឆាំងនឹងអ៊ីរ៉ង់នៅចុងខែកុម្ភៈ អារ៉ាប់រួម​ បានក្លាយជាគោលដៅសងសឹកកំពូលមួយ។ ចំនួនអាវុធដែលអ៊ីរ៉ង់បានបាញ់ចូលទៅក្នុងទឹកដីអារ៉ាប់​រួម​នេះ ត្រូវបានគេនិយាយថា ច្រើនជាងប្រទេសដទៃទៀត ដែលថែមទាំងលើសពីអ៊ីស្រាអែលទៀតផង។

ការវិវត្តនេះដែរបានសបង្ហាញថា ភាពតានតឹងរវាងអ៊ីរ៉ង់ និង អារ៉ាប់រួម​ កំពុងកើនឡើង មិនត្រឹមតែផ្នែកយោធាប៉ុណ្ណោះទេ ប៉ុន្តែថែមទាំងរីករាលដាលដល់វិស័យច្បាប់ និងសេដ្ឋកិច្ចផងដែរ នៅក្នុងបរិបទដែលតំបន់មជ្ឈិមបូព៌ានៅតែបន្តរងផលប៉ះពាល់យ៉ាងខ្លាំងដោយជម្លោះ៕

អត្ថបទ៖ សាង ស្រីល័ក្ខ